EZEQUIEL 13 - Quichua Imbabura Bible

Llullashpa villajcunataca llaquichingami

1Mandaj Diosca cai shimicunatami, cashna nishpa villahuarca:

2“Huañuna aichayu runa. Paicunata llaquichinataca, Israel llactapi villajcunaman villai. Paicunapaj shungu yarishcatalla villajcunaman cashna ni: Mandaj Diospaj Shimita uyaichi.

3Mandaj Jatun Diosca, cashnami nin: ‘Imatapash na ricushpata, paicunapaj yuyaimandalla villaj juizu illaj villajcunaca, ¡aij imachari tucunga!

4Israelcunalla, cangunaman villajcunaca jichushca pambapi purij añascunashnami carca.

5Mandaj Dios llaquichijui punllapi shinlli shayaringapaca, pirca t'unirishcata alichingapajllapash na vichai rishpami causarcanguichi. Israel llacta muyundi jatun pircatapash, na pircashcachu canguichi.

6Paicunaca, yangacunatallami ricunajurca. Llullashpami yachanchimi nishpa, cashna ninajurca: Mandaj Diosmi chashna nin ninajurcami. Mandaj Diosca, paicunataca na cacharcachu. Ashtahuangarin paicuna imatalla villashcacunataca, Diosllata pactachijuchunmi shuyanajun.

7¿Nachu yangacunatalla muscuipishna ricurcanguichi? ¿Nachu llullashpa yachanchimi nishpa villarcanguichi? Cangunaca, napash ñuca imata nijujpitami: Mandaj Diosmi chashna nin nishpa villanajunguichi.

8Chaimandami Mandaj Jatun Dios ñucaca, cashna nini: Cangunaca yangacunatallami rimarcanguichi, llullacunatallami ricurcanguichi. Ricuichi, chaimandami cangunahuan fiñarishpa llaquichigrini. Mandaj jatun Dios ñucallatami, cashna nini.

9Yangacunatalla ricujcunatapash, llullashpa yachanimi nishpa villajcunatapashmi, ñuca maquihuan llaquichigrini. Paicunaca, ñuca agllashca Israel puracunahuanga, na tandanajungachu. Israelcunapaj shuticunata escribina libropipash, na escribishcachu canga. Israel llactamambash, na tigrangachu. Shina rurajpimi ñucataca, Mandaj Jatun Dios cajta yachanguichi.

10Ñuca agllashcacunataca: Napash casilla ali causai tiajpitami: Casilla ali causaimi tian nishpa umachinajurca. Chashna nijcunaca, shuj runa shayachishca pircata yacu turuhuanlla shujcuna quilpanajunshnami.

11Chai pircata yacu turuhuanlla quilpajcunataca: Chai pircapash urmangami nishpa villai. Chai pircata urmachijuchunga, manllanayai tamiata rumishna runducunatami cachamusha. Ninan huairahuan tamiami, chai pircataca urmachinga.

12Ricuichi, chai pirca urmajpica, ¿nachu cangunataca: ¿Pircata quilpashca turuca, imata tucurca? ninman?

13Chaimandami Mandaj Dios ñucaca, cashna nini: Ñuca ninanda fiñarishpami, chai pircata urmachijuchunga, ninan huairahuan tamiata cachamusha. Ninandapacha fiñarishpami, manllanayai tamiata cachamusha. Fiñarishpa tucuchingapajmi, rumishna rundutapash cachamusha.

14Yacu turuhuanlla canguna quilpashca pircataca, chashnami tucuchisha. Alpaman tucuillata shitajpimi, chai pirca callaripi churashca rumicunapash ricuringa. Chai pirca urmajpimi, cangunapash chaipi huañushpa tucuringuichi. Shina rurajpimi ñucataca, Mandaj Dios cajta yachanguichi.

15Ninandapacha ñuca fiñarishcataca, chai pircatapash, yacu turuhuanlla quilpajcunatapash, chashna rurashpami pactachisha. Chai jipaca, cashnami nisha: Pircapash, chai pircata turuhuan quilpajcunapash, na ashtahuan tianllu.

16Israelcunaman villajcunaca Jerusalenbica, napash casilla causai tiana cajpitami, paicunallata muscuipishna ricushpa: Caipica, casilla ali causaimi tianga’ nishpa villanajun” ninmi Mandaj Jatun Diosca.

17“Huañuna aichayu runa. Cambaj llacta huarmicunata ricushpa, paicuna ima tucunatapash villai. Chai huarmicunaca, paicunapaj shungu yarishcatallami villanajun.

18Paicunataca cashna ningui: Mandaj Jatun Diosca, cashnami nin: ‘Yumbucuna maquipi huatarina cintacunata sirajcunapash, yumbucunapaj umapi quilparina uchilla telata, jatun telata ruraj huarmicunapash ¡aij, imachari tucunguichi! Cangunapaj causaipi imatapash charingapajllami, chaicunata jatushpa ñuca agllashcacunapaj almataca, umachishpa pandachinajunguichi.

19Cangunaca, maqui junda cebadamanda, asha faqui tandamandallami, ñuca agllashca puracunapica, napash huañuchina runacunatara huañuchishpa, huañuna runacunataca na huañuchishpa saquinguichi. Shinami llullashcatara uyanajuj, ñuca agllashcacunataca llullarcanguichi. Chashnami, ñucataca yangapi churarcanguichi.

20Chaimandami Mandaj Jatun Dios ñucaca, cashna nini: Ricuichi, yumbucuna maquipi huatarichun canguna rurashca cintacunataca tucuchishami. Chaicunahuanmi, almacunatapash ñapash pandachinguichi. Paicunataca, cangunapaj maquimanda cacharichishami. Calpanajujta japinshna canguna pandachishca almacunataca, alasyu animalcuna calpanshna purinajuchunmi cacharisha.

21Shinallata yumbucunapaj umapi quilparichun canguna rurashca telacunatapashmi liquisha. Ñuca agllashcacunataca, cangunapaj maquimanda cacharichishami. Paicunaca, na ashtahuan cangunapaj maquipi japi tucungachu. Chaita ricushpami ñucaca, Mandaj Dios cajta yachanguichi.

22Cangunaca, chashna llullashpami, imatapash cashcatapacha rurajtaca llaquichinguichi. Paitaca, ñucaca na llaquichircanichu. Shinallata cangunaca, ñucata na manllajcunamanrami, paicuna nalita ruranajushcata ama saquichun, nali yuyaita cushpa cushichishpa shinllichircanguichi.

23Shinamandami, muscuipishna yangallacunata ricunatapash, na ashtahuan ricunguichi. Yachanimi nishpa llullashpa villanatapashmi saquinguichi. Ñuca agllashcacunataca, cangunapaj maquimanda cacharichishami. Shina rurajpimi ñucataca, Mandaj Dios cajta yachanguichi’ nishpa villai” nihuarcami.