ÉXODO 34 - Quichua Imbabura Bible

Dioshuan ari nishcatami cutin mushujyachishca(Deut. 10:1-5)

1Mandaj Diosca, Moisestaca cashnami nirca:

—Punda rurarcangui, chashnallata ishcai tabla rumicunata, llambu llambuguta rurai. Chai tabla rumicunapimi, punda can faquishca tabla rumicunapi tiashca shimicunata escribisha.

2Canga cayapaca alichiringui. Shina alichirishpaca, Sinaí urcuman tutamandata vichai rishpa, chai urcu punda jahuapi ñuca ñaupajpi ricurimungui.

3Canhuanga, maijan runapash na vichai ringachu. Tucui chai urcupica, maijanllapash na ricuringachu. Chai urcu ladopica, llamacunapash, huagracunapash na micunajungachu— nircami.

4Moisesca, punda rumicunatashnallatami, ishcai tabla rumicunata llambu llambuguta rurarca. Chai jipami, Mandaj Dios imashna paita mandashcashnallata, ishcai tabla rumicunata apashpa, tutamandata jatarishpa, Sinaí urcuman vichai rirca.

5Chaipimi Mandaj Diosca, fuyupi uriajumurca. Shina uriajumushpami, Moiseshuan chaipi cashpa Mandaj Diosca, paipaj shutita villajurca.

6Mandaj Diosca, Moisespaj ñaupajta yalijushpami, cashna nishpa villajurca:

—¡Mandaj Dios, Mandaj Dios ñucami, tucuita ushaj, llaquij, juyaj, na ñapash fiñarij, ninanda llaquij, na llullaj cani!

7Huaranga huaranga miraicunacaman llaquijmi cani. Nalita rurashcata, na cazushcata, juchata rurashcatapash cungaj Diosmi cani. Shina cashpapash nalita rurajtaca, ima nalitapash na ruraj runatashnaca, na saquishachu. Ashtahuangarin taitacuna nalita rurashcata ricuj shamushpami, churicunapaj jahuapi, chai churicunapaj cati churicunapaj jahuapi, quimsa miraicunacaman, chuscu miraicunacaman llaquichisha— nircami.

8Shina nijpimi Moisesca, alpaman uchalla urai cungurishpa, Diosta alicachirca.

9Paica cashnami nijurca:

—Jatun Dioslla, cunan cambaj ñavipi ñuca ali ricurishca cajpica, cunanga can Jatun Diosca ñucanchi chaupipi ripashunyari. Cai gentecunaca, shinlliyashcapacha gentecunamari capan. Nalita ñucanchi rurashcata, ñucanchipaj juchacunata cungashpa, ñucanchitaca cambaj cachun chasquihuayari— nijurcami.

10Shina nijpimi Mandaj Diosca, cashna nishpa tigrachirca: “Ricui, can pushamushca tucui gentecunapaj ñaupajpimi, ñucaca ari nini. Tucui cai pachapica, maijan llactapillapash na rurashcacunatami, imapash juyaillacunata rurasha. Shina rurajpimi, tucui cambaj muyundipi causaj gentecunaca, Mandaj Dios rurashcata ricunajunga. Canhuanga, shuj jatun manllarinata rurajpimi, chashna ricunajunga.

Canaán llactapi shuj dioscunata ama mañachunmi, cutin cutin yachachishca(Deut. 7:1-5)

11Cunan ñuca mandashcataca cazushpa pactachingui. Chashna rurajpimi amorreo, cananeo, heteo, ferezeo, heveo, jebuseo nishca gentecunataca, cangunapaj ñaupajmanda llujchishpa cachasha.

12Canguna maipi causana llactaman yaicushpaca, chaipi causajcunahuanra imatapash ari ninguichiman. Chashna rurajpica, rumipi nitijachishpa urmachinshnami, paicunapaj chaupipi cangunataca urmachinajunga.

13Paicunapaj altarcunatapash urmachinami canguichi. Rumita rurashca dioscunatapash, Asera shuti huarmi diosman rijchajcunatapash, faquinami canguichi.

14Cangunaca, maijan shuj diostallapash na cungurinachu canguichi. Mandaj Diosca, paipajlla cachun Munaj shutimi. Paipajlla cachun munaj Taita Diosmi.

15Shina cashcamanda, chai llactapi causajcunahuanga, imata rurangapajpash na tandanajunachu canguichi. Paicunapaj dioscunata catishpa huainayashpami, paicunapaj dioscunaman animalcunata cushpa huañuchinajunga. Shina rurashpaca, cangunatapash cayajpimi, chai animalcunaman carashca aichata micunguichi.

16Chaicunata na micushpapash, cangunapaj churicunapaj huarmi cachunmi, paicunapaj ushicunata japinguichi. Chai huarmicunaca, paicunapaj dioscunata catishpa huainayanajushpami, cangunapaj churicunatapash, paicunapaj dioscunata catichishpa huainayachinajunga.

17Cangunaca, imatapash yacuyachishpa rurashca dioscunataca na ruranachu canguichi.

Huatapi huatapi fiestacunata rurachunmi mandashca(Éx. 23:14-19; Deut. 16:1-7)

18Levadura illaj tandata micuna fiestataca pactachinami cangui. Levadura illaj tandataca, ñuca mandashcashnallata, canchis punllacaman micungui. Ñuca villashca punllapi, chai Abib nishca quillapi micungui. Abib nishca quillapimi, Egiptomandaca llujshimurcangui.

19Punda huacharishca tucui huahuacunaca, ñucapajmi. Cambaj animalcunamanda huarmi huagrapaj huahuapash, na cashpaca llamapaj huahuapash, punda huachashca jaricunaca ñucapajmi.

20Ashtahuangarin punda huachashca burro huahuamandaca, shuj maltun llamata cungui. Burromanda na maltun llamata cushpaca, paipaj cunga tulluta faquingui. Punda huacharishca tucuilla cambaj churicunamandapashmi, chashna cuna cangui. Ñuca ñaupajpica, maijanllapash chushaj maquihuanga na ricurimungachu.

21Sucta punllata trabajangui. Ashtahuangarin canchis punllapica samangui. Yapujushpapash, cozechajushpapash samangui.

22Shinallata punda fucushca trigota cozechajui semanacunapipash, jatun fiestata rurangui. Huata tucuripi, cozechana fiestatapash rurangui.

23Cambaj llactapi causaj tucui jaricunami, huatapi quimsa viajeta, Mandaj Jatun Dios uca ñaupajpi ricurimunga. Ñucaca, israelcunapaj Taita Diosmi cani.

24Ashtahuangarin llactacunapi causajcunataca, cambaj ñaupajmanda llujchishpa cachashpami, cambaj llactataca jatunyachisha. Canda Mandaj Taita Dios uca ñaupajpi, huatapi quimsa viajeta ricuringapaj, can vichai shamujpica, cambaj alpataca pipash na japingachu.

25Ñucaman cushpa huañuchishca animalpaj yahuartaca, imapash levadurahuan rurashcahuanga, na cunachu cangui. Pascua punllapi huañuchishca animalpaj aichataca, imatallapash cayapaca na puchuchinachu.

26Cambaj alpapi punda fucushca granocunataca, canda Mandaj Taita Dios uca huasimanra punda apamungui. Huahua chivopaj aichataca, mamapaj lechepica ama yanunguichu” nijurcami.

Moisesmandapash, mandashcacunata escribishca ishcai tabla rumicunamandapashmi villajun

27Mandaj Diosca, Moisestaca cashnami nirca: “Canga, cai shimicunata escribi. Cai shimicunapi nijunshnallatami, canhuambash, israelcunahuambash ari nircani” nircami.

28Moisesca, chuscu chunga punllata, chuscu chunga tutatami, micuitapash na micushpa, yacutallapash na ufiashpa, Mandaj Dioshuan chaipi carca. Chaipimi, Dios ari nishca shimicunatapash, tabla rumicunapi escribirca. Chaicunaca, chunga mandashca shimicunami.

29Chaipimi cashna tucurca: Moisesca, Sinaí urcumanda uriajumushpaca, imashna causanata yachachishpa escribishca ishcai tabla rumicunata chaririajmi uriajumurca. Moisesca, Taita Dioshuan parlashca jipa, paipaj ñavi cara ninanda punchayachijujtaca, na yacharcachu.

30Aaronbash, tucuilla israelcunapashmi Moisestaca ricunajurca. Paicunaca, Moisespaj ñavi carapash ninanda punchayachijujtami, ñapash ricunajurca. Shina cajpimi, Moisespajman quimiringapaca manllanajurca.

31Shina manllanajujpimi, paicunataca Moisesca cayarca. Shina cayajpimi Aaronbash, tandanajushca israelcunata tucuilla mandajcunapash, paipajman tigrajpi Moisesca, paicunata rimarca.

32Chaipaj catica, tucuilla israelcunami quimirinajurca. Paicunamanmi, Sinaí urcupi tucui imata, Mandaj Dios paiman villashcacunata mandarca.

33Paicunahuan Moisés rimaita tucuchishpaca, shuj telahuanmi paipaj ñavita quilparirca.

34Mandaj Diospaj ñaupajman Moisés parlangapaj shamushpaca, chaimanda llujshingacamanmi quilparishca telataca anchuchin carca. Ña llujshijushpami, paiman imata mandashcataca, israelcunaman villajurca.

35Moisespaj ñavita israelcuna ricunajushpaca, paipaj ñavi carapash ninanda punchayachijujtami ricunajurca. Shinamandami Moisesca, Taita Dioshuan rimangapaj yaicungacaman, telahuan cutin paipaj ñavita quilparin carca.