JEREMÍAS 44 - Quichua Imbabura Bible

Jeremiasca, Judá llacta runacunamanmi Egiptopi villashca

1Judá llacta runacuna, Egipto llactapi causanajushpaca, Migdol, Tafnes, Menfis shuti pueblocunapipash, Patros shuti llactapipashmi causajunajurca. Paicunamandami Mandaj Diosca, Jeremiasman villajurca. Chaitami Jeremiasca, cashna villajurca:

2“Tucuita Mandaj, israelcunapaj Taita Diosca, cashnami nin: ‘Jerusalenbi causajcunatapash, Judá llactapi tiaj pueblocunapi causajcunatapash, tucui llaquicunahuan ñuca llaquichijtaca, cangunallata ricurcanguichimi. Ricuichi, chai pueblocunaca, cunangamanmi llaquinayaita tucuchishca sirin. Chaicunapi causangapaca, pipash na tianllu.

3Paicunapash, cangunapash, cangunapaj ñaupa taitacunapash na rijsishca, shuj dioscunamanra inciensota carashpa alicachingapaj rishpami, ñucataca fiñachinajurca. Chashna nalita rurashcamandami, chai jatun llaquicunataca cachamurcani.

4Chashna cajpipash ñuca ima nishcata villaj, ñucata servijcunahuanmi, pundamandapacha na shaijushpa cashna nishpa villachijurcani: Cangunaca, ñuca na ricunayachishca cashna millanayaicunataca na ruranachu canguichi nishpa villachunmi cachamurca.

5Ashtahuangarin paicuna nalita rurashpa causanajushcata saquishpa ñucapajman tigraringapaca, paicunapaj rinrita mañachishpa uyangapajllapash na munarcachu. Chaimandami, shuj dioscunaman inciensota carashpa cushnichinatapash na saquirca.

6Shinamandami, ñuca ninandapacha fiñarishcapash talirimurca. Chashna talirishpami, Judá llactapi tiaj pueblocunapipash, Jerusalén ñangunapipash nina japirirca. Chulunlla pushtuman tigrachishcamandami, cunan punllacaman llaquinayaita tucuchi tucushca sirin’ ninmi” nishpami villajurca.

7Cunanga, tucuita Mandaj, israelcunapaj Taita Diosca, cangunataca cashnami nin: “¿Imashpata cangunapaj llaquipajllata, cai jatun nalitaca ruranguichi? Caita rurashcamandaca jaripash, huarmipash, huambrapash, chuchujuj huahuapash huañushpami, Judá llactapica huaquinllapash na puchushpa, tucuilla tucuringuichi.

8Cangunaca, cai Egipto llactapi causangapaj yaicumushpaca, cangunapaj maquihuan rurashcacunaman, shuj dioscunaman inciensota carashpa cushnichishpa, ninandapacha fiñachishcamandami, cangunallata tucuringuichi. Shinamandami cangunaca, tucui shuj llactacunapica, ima llaquipash japishpaca alicachari canman ni tucushpa, nalicachishpa tucushpa causanguichi.

9Cangunapaj ñaupa taitacunapash, Judá llactata jatun mandajcunapash, paicunapaj huarmicunapash, cangunapash, cangunapaj huarmicunapash, Judá llactapi, Jerusalén ñangunapica, jatun nalita rurashpami causarcanguichi. Chashna jatun nalita rurashcataca, ¿ñachari cungarcanguichi?

10Chashna cashpapash pingai tucushpa na urai cumurishpami, cunangaman napacha manllanguichi. Cangunapaj taitacunapash, cangunapash ñuca cushca mandashca shimicunata, pactachinajuchun cushca shimicunataca, napacha pactachishpami causarcanguichi” ninmi.

11Shinamandami tucuita Mandaj, israelcunapaj Taita Diosca, cashnatapash nin: “Ricuichi, cangunatapash ninanda llaquichingapaj Judá llactapi tucui causajcunatapash tucuchingapajmi, ninanda fiñashpa tigrarishpa ricujuni.

12Huaquinlla puchushca Judá llacta runacunaca, Egipto llactaman rishpa chaipi causangapajmi, chai llactata tigrashpa ricunajurca. Chai Egipto llactapillatami, tucuilla tucuchi tucunga. Paicunaca, espadahuan huañuchijpimi urmanajunga. Yarjaimanda huañushpami tucurinajunga. Espadahuan, yarjaihuanga, uchillamanda callarishpa runacunacamanmi tucurinajunga. Huaquin puchushcacunaca, ninanda millanayachi tucushca, manllachi tucushca, ima llaquipash japishpaca alichari canman ni tucushca, nalicachishpa rimai tucushcami causanga.

13Egipto llactapi causangapaj shamujcunataca, Jerusalenbi llaquichishcashnallatami espadahuan, yarjaihuan, jatun ung:uihuan llaquichisha.

14Huaquinlla puchushca, Judá llacta runacuna Egipto llactaman rishpa, chaipi causajcunaca pillapash na quishpiringachu. Judá llactaman tigrangapaca, shujllapash na causaj puchungachu. Paicunaca, chai llactaman tigrashpa chaipi causangapaj munashpami, ninanda llaquirishpa causanajun. Chaimanga, na tigrangachu. Ashtahuangarin pacajushpa huaquin llujshijcunallami tigranga” ninmi.

15Chaita villajpimi, paicunapaj huarmicuna shuj dioscunaman, inciensota carashpa cushnichishcata yachaj runacunapash, chaipi tandanajushca tucui huarmicunapash, ashtaca gentecunapash, Egipto llactapillata causaj tucui gentecunapash, Patros shuti llactapi causajcunapash, chaipi tandanajushca carca. Paicunami, Jeremiastaca cashna ninajurca:

16—Mandaj Diospaj shutipi can villashcataca, napacha uyashunllu.

17Ashtahuangarin ñucanchi shimihuambacha tucui imatalla rimashcatami rurashpa causashun. Ñucanchi ñaupa taitacunapash, ñucanchita jatun mandajcunapash, ñucanchita mandajcunapash, Judá llactapi tiaj pueblocunapi, Jerusalén plazacunapica, jahua pachata jatun mandaj nishca huarmi diosmanmi, inciensota carashpa cushnichin carcanchi. Talina vinotapash carashpami, talin carcanchi. Chashna rurashpami, ashtaca granocunata charircanchi. Ima llaquipash na ricushpami, cushijushpa causanajurcanchi.

18Ashtahuangarin jahua pachata mandaj nishca huarmi diosman inciensota carashpa cushnichinatapash, talina vinota carashpa talinatapash saquishca punllamandapachami, tucui imapash illaj causanajunchi. Chaimandami espadahuan, yarjaihuan huañushpa tucurinajunchi.

19Jahua pachata mandaj nishca huarmi diosman inciensota cushnichishpa, talina vinotapash talishpa carashpaca, ¿nachu ñucanchi cusacunamambash imatallapash na pacashpa tucuita villashpa, tortillacunatapash rurashpa, talina vinotapash caranchi?— ninajurcami.

20Chaimandami Jeremiasca, tucui gentecunata, jaricunata, huarmicunata, paita tapuj tucui gentecunataca cashna nijurca:

21—Cangunapaj ñaupa taitacunapash, cangunata jatun mandajcunapash, cangunata mandajcunapash, Judá llactapi causajcunapash, Judá llacta pueblocunapi, Jerusalén ñangunapi, shuj dioscunaman inciensota carashpa cushnichishcataca, Mandaj Diospaj yuyaipica, ¿nachu yariajun?

22Shina yarijushpami Mandaj Diosca, cangunataca nalicunata rurashpa, millanayaicunatalla rurashpa causanajujpi, ricujuitallapash na usharca. Shinamandami, cangunapaj llactaca llaquinayaita tucuchi tucushca, manllachi tucushca, ima llaquipash japishpaca alichari canman ni tucushca, chaipi causangapajpash shuj gentellapash illaj, cunan punllacunacaman chashna sirin.

23Cangunallatami, Mandaj Diosta fiñashpa, shuj dioscunamanra inciensota carashpa, juchata rurarcanguichi. Mandaj Dios rimashpa mandashcatapash, pactachinajuchun cushca shimicunatapash, imashna causanata yachachishcatapash, na pactachishpami causarcanguichi. Shinamandami cangunapaj jahuapica, cunangaman cai jatun llaquicuna shamushca— nijurcami.

24Jeremiasca, tucui gentecunata, tucui huarmicunatami cashna nijurca:

—Egipto llactapi causanajuj, Judá llactamanda tucui gentecuna, Mandaj Dios rimashcata uyaichi.

25Tucuita Mandaj, israelcunapaj Taita Diosca, cashnami nin: ‘Cangunaca, cangunapaj huarmicuna, cangunapaj shimihuan rimashcataca, cangunapaj maquihuambachami ruranajunguichi. Cangunaca: Jahua pachata mandaj nishca huarmi diosman inciensota carashpami cushnichishun. Talina vinotapashmi carashpa talishun nishcataca pactachishumbachami ninajurcanguichimi. Cangunaca, chaitapachami ruranajunguichi. Paiman imatalla carashun nishcatapashmi ruranajunguichi’ ninmi.

26Shina cashcamandaca, Egipto llactapi causanajuj, Judá llactamanda tucui gentecuna, Mandaj Diospaj Shimita uyaichi: ‘Ricuichi, Mandaj Dios ñucami, ñuca jatun shutipi cashna nishpa juramenturcani: Tucui Egipto llactapi causanajuj, Judá llactamanda maijan runa cashpapash, ñuca shutipi na mañanajungachu. Mandaj jatun Diosca causajumbachami nishpaca, na ashtahuan rimanajungachu.

27Ricuichi, paicunaman ima alita rurangapaj randica, jatun llaquita rurangapajmi ricuriajuni. Egipto llactapi causanajuj Judá llactamanda runacunaca, tucuilla tucuringacamanmi, espadahuan, yarjaihuan huañunajunga.

28Espadahuan huañunamanda quishpirij huaquin runacunallami, Egipto llactamandaca, Judá llactaman tigranajunga. Judá llactamanda Egiptoman shamushpa, chaipi causanajuj huaquin gentecunami yachanajunga. Paicunaca, ñuca rimashca shimi, na cashpaca paicuna rimashca shimi pactashcatami yachanajunga.

29Cangunata llaquichishami nishcataca pactachishapachami. Ñucaca, cai llactapillatami cangunataca llaquichigrini. Chashna rurajta ricushpaca, ñucataca imata nishpapash, chaitaca pactachijpacha cashcatami yachanguichi’ ninmi Mandaj Diosca.

30Mandaj Diosca, cashnatapashmi nin: ‘Ricuichi, Judá llactata jatun mandaj Sedequías shuti runataca, paita fiñashpa huañuchingapaj munajuj, Babilonia llactata jatun mandaj Nabucodonosor runapaj maquipimi churarcani. Shinallatami Egipto llactata jatun mandaj Hofra shuti Faraondaca, paita fiñashpa huañuchingapaj munajcunapaj maquipi churani’ ninmi— nijurcami.