EZEQUIEL 23 - Quichua Imbabura Bible

Ñaña purashna ishcai llactacuntami villajun

1Mandaj Diosca cai shimicunatami, cashna nishpa villahuarca:

2“Huañuna aichayu runa. Ishcai huarmicunami tiarca. Paicunaca, shujlla mamapaj ushicunami carca.

3Chai huarmicunaca, chairalla viñai cuitsa cashpallatami, Egiptopi huainayashpa causanajurca. Chaipimi, paicunapaj chuchucunata llapi tucunajurca. Chaipica, pipash nara tacarishca chuchucunatami ninanda llapi tucunajurca.

4Punda ñañaca, Ahola shutimi carca. Jipa ñañaca, Aholiba shutimi carca. Paicunami, ñuca huarmicuna tucurca. Paicunami jari huahuacunata, huarmi huahuacunata ungurca. Ahola shuti huarmica, Samaria shutimi tucurca. Aholiba shuti huarmica, Jerusalén shutimi tucurca.

5Ahola shuti huarmica, ñuca maquipi cashpapashmi huainayarca. Paipaj ladolla causaj paipaj juyashca asiriocunatami, ashtahuan ninanda juyai callarirca.

6Paicunaca, yana puca churajunata churajushca mandajcuna, soldadocunata mandajcunami carca. Tucui paicunami, chairalla viñai munanayai runacuna, caballopi tiarishpa calpaj runacuna carca.

7Paicunahuanmi huainayarca. Ashtahuan ali runatalla agllashca tucui asiriocunahuambash, pai juyashca tucui runacunahuambashmi huainayarca. Chai runacunapaj tucuilla yanga dioscunahuambashmi mapayarca.

8Egiptopi causajcunahuan huainayanataca, napacha saquircachu. Chai runacunaca, Ahola shuti huarmihuanmi chairalla viñai cuitsa cajpillata siririrca. Paicunami, pipash nara tacarishca chuchucunataca ninanda llapinajurca. Chashnami, paihuanga huainayanajurca.

9Chashna cajpimi, paita juyajcunapaj maquipi asiriocunapaj maquipi churarcani. Paicunatami ninanda juyarca.

10Paicunami, Ahola shuti huarmitaca, lluchullata saquishpa, paipaj churicunata, ushicunatapash quichurca. Chai huarmitaca, espadahuanmi huañuchirca. Paica, tucui huarmicunamanda yali rijsishca huarmimi tucurca. Paita ricushpami, yuyaita japinajurca.

11Paipaj ñaña Aholiba shuti huarmipash chaita ricushpami, nalita rurana munaihuanlla purishpa, paitapash yali loca tucurca. Paica, paipaj ñaña huainayashcatapash yalimi huainayashpalla causajurca.

12Paica, paipaj ladolla causanajuj asiriocunatami, ninanda juyai callarirca. Paicunaca, mandajcunapash, soldadocunata mandajcunapashmi carca. Paicunaca, alipacha churajunata churajushcacuna, alipacha macanajunacunata charijcuna, caballopi tiarishpa alipacha calpajcunami carca. Tucui paicunaca, chairalla viñai munanayai runacunami carca.

13Paicunahuan mapayashcatami, chai huarmitaca ricurcani. Ishcandi huarmicunami, chai ñandallata catinajurca.

14Shinallata patapi pintashca runacunata, caldeocunaman rijchajcunata, tauca colorcunahuan pintashcata ricushpami, ashtahuan huainayajurca.

15Chaicunaca, cinturaspi chumbilirina carahuan chumbilishca, umapipash tauca color tiara nishcacunata churajushcacunami carca. Tucui chai runacunaca, paicuna huacharishca Caldea shuti, Babilonia shuti llactacunamanda runacunashna, soldadocunata mandajcunaman rijchajcunami carca.

16Paicunataca, ricushcandimi munai callarirca. Shinamandami, caldeocunapaj llactaman villajcunata cacharca.

17Chashnami Babilonia llactamanda runacunaca, pai juyarishpa sirijuna camapi paipi chayashpa mapayachirca. Shinallata paipash, chai runacunahuanmi mapayarca. Chashna rurashpami paipaj shungupica, chai runacunataca millanayachirca.

18Chashnami pai huainayashcacunapash ricunalla tucushpa, paipaj lluchullapash ricunalla tucurca. Chaimandami ñuca shungupica, paipaj ñañatashnallata paitapash millanayachircani.

19Paica, chairalla viñai cuitsa cashpa, Egipto llactapi huainayashcata napacha cungashpami, ashtahuan huainayashpa catijurcalla.

20Paica, nalicunatalla ruraj runacunatami, ninanda juyai callarirca. Chai runacunaca, ruparijuj burrocunashna, nalita rurana munaihuanlla purijcuna, caballocunapaj llausashna yuraj yacu talirijuj runacunami carca.

21Canga chashnami, pipash nara tacarishca cambaj chuchucunata, Egiptomanda runacuna ninanda llapijpi can chairalla viñai cashpa, nalita rurana munaihuanlla purishcataca, cutin yarijurcangui” nishpami villahuarca.

22Aholiba huarmilla. Shinamandami Mandaj Jatun Diosca, candaca cashna nin: “Ricui, cambaj shungupi millanayachishca, cambaj juyashca runacunatallatami, canda llaquichinajuchunga cachamusha. Shinallata cambaj muyundita shamuchunmi cachamusha.

23Babilonia llactamanda runacunata, tucui caldeocunata, Pecod, Soa, Coa shuti llactacunapi causajcunata, tucui Asiria llactamanda runacunatapashmi, canda llaquichinajuchun cachamusha. Paicunaca, chairalla viñai munanayai runacuna, mandajcuna, soldadocunata mandajcuna, alicachi tucushcacuna, tucuicuna rijsishcacunami carca. Tucui paicunaca, caballopi tiarij runacunami carca.

24Canda llaquichingapaca, macanajuna carrocuna, ruedata charij carretacuna, ashtaca gentecunami shamunga. Chai gentecunaca, jarcarina jatun escudocunahuan, uchilla escudocunahuan, umapipash jirru churajunata churajushcacunami, cambaj muyundipica shayarinajunga. Paicunataca, ñucallatami llaquichinallami canguichi nishpa mandasha. Paicunapaj mandashcacunapi nishcashnallatami, candaca llaquichinajunga.

25Ñucapajlla cachun munashcamandami, candaca ninanda llaquichisha. Chaimandami paicunapash, ninanda fiñashpa candaca llaquichinajunga. Paicunami, cambaj singatapash, rinritapash fitinajunga. Chaipi puchushcacunaca, espadahuanmi huañuchi tucunajunga. Cambaj churicunatapash, ushicunatapashmi apanajunga. Huaquin puchushcacunataca, ninami tucuchinga.

26Shinallata cambaj churajunacunatapash, can huatarishpa juyaillata alichirishcatapashmi quichunajunga.

27Nalita rurana munaihuanlla purishcatapash, Egipto llactapi huainayashpa causashcatapashmi anchuchisha. Shinamandami paicunataca, alsarishpapash na ricungui. Egipto llacta runacunataca, ima horallapash na ashtahuan yaringuichu.

28Ashtahuangarin Mandaj Jatun Dios ñucaca, cashnami nini: Ricui, candaca can na ricunayachishca runacunapaj maquipillata, cambaj shungupi millanayachishca runacunapaj maquipillatami churani.

29Paicunami, candaca ninandapacha na ricunayachishpa llaquichinajunga. Can imatalla rurashcamanda charishcacunataca, tucuillatami quichunajunga. Candaca, tucuillata llujchichishpa, lluchullatami saquinajunga. Chashnami, can huainayashpa mapayashcapash, nalita rurana munaihuanlla purishpa mapayashcapash, culquimanda can huainayashcapash ricuringa.

30Shuj llactacunapi causajcunata catishpa paicunahuan huainayashcamandami, cai llaquicunaca japinga. Paicunapaj yanga dioscunahuanmi mapayarcangui.

31Canga, cambaj ñañapaj ñandallatami catircangui. Shinamandami, cambaj ñañaman cushca vasopi ufianatallata, cambaj maquipipash cusha.

32Mandaj Jatun Dios ñucaca, cashnatapashmi nini: Cambaj ñañaman cushca jundu, ancho vasopillatami, cambash ufiangui. Chai vasoca, ashtacata apaj, jatumbachami. Shuj llactacunapi causajcunaca, candaca ninandami nalicachishpa, na cazushpa asinajunga.

33Canga chulunlla sirina, llaquinayaita tucuchi tucuna vasomanda ufiashpami, ninanda machashpa, nanaitapash japingui. Cambaj ñaña Samariaman cushca vasomandallata ufiashpami, chashna tucungui.

34Chaitaca, shaijungacaman ufiashpami, vasocunataca faquingui. Cambaj chuchucunatapashmi aspiringui. Chaitaca, ñucami chashna nircani” ninmi Mandaj Jatun Diosca.

35Chaimandami Mandaj Jatun Diosca, cashnatapash nin: “Ñucata cungashpami, huashaman churahuarcangui. Shina cashcamandaca nalita rurana munaihuanlla purishpa huainayashcamandami, cambash llaquita apangui” ninmi.

36Mandaj Diosca, cashnatapashmi nihuarca: “Huañuna aichayu runa. Ahola shuti huarmipash, Aholiba shuti huarmipash ima nalita ruranajushcataca, ¿nachu ricuchina cangui? Millanayaita paicuna rurashcataca, ¿nachu can villana cangui?

37Paicunaca, cazarashca jahua shujcunahuan causashcamandami, paicunapaj maquipash yahuarlla tucushca. Shinallata paicunapaj yanga dioscunahuanmi huainayanajurca. Paicuna ñucaman ungushca churicunatapash, ninapimi rupachinajurca.

38Paicunaca, ashtahuan caicunatapashmi ruranajurca: Ñucapajlla huasitapashmi, chai punllapica mapayachirca. Samana ñuca punllacunatapash, yangapimi churarca.

39Paicunapaj churicunataca, paicunapaj yanga dioscunaman cushpa rupachishca punllallatami, ñucapajlla huasita mapayachingapajpash yaicunajurca. Ricui, chashnami ñucapajlla huasi chaupipica ruranajurca.

40Chashna rurashca jahuami, caru llactamanda runacunata pushamuchun cachanajurca. Paicunataca, villaj runacunahuanmi cayachun cachashca carca. Shina cachajpimi shamunajurca. Paicuna juyachunmi armarcangui, ñavicunatapash pintarircangui, juyailla huatarinatapash huatarircangui.

41Micungapaj alichishca meza ladopi tiaj juyailla tiarinapimi tiarircangui. Chai meza jahuapillatami, ñuca inciensotapash, ñuca aceitetapash churarcangui.

42Paihuan samanajuj tandanajushca gentecuna caparinajujmi uyarirca. Paicunaca, jichushca pambapi causaj sabeocunami, yanga runacunahuan shamushca carca. Chai runacunaca, chai huarmicunapaj maquipica, brazaletecunata huatachishpa, umapica juyailla coronacunatapashmi churachinajurca.

43Cazarashca jahua shujcunahuan causashpa payayashca huarmimandaca, cashnami nircani: ‘¿Chai huarmihuanga, cunangamanllu huainayashpa catinajun, paipash chai jaricunahuan huainayajunrachu?’ nircanimi.

44Culquimanda huainayashpalla causaj huarmipajman shamunshnami shamunajurca. Ahola shuti huarmipajmambash, Aholiba shuti huarmipajmambash, na pinganayachij chai huarmicunapajmanmi chashna shamunajurca.

45Chaimandami chai huarmicunataca, cazarashca jahua shujcunahuan causajcunata imashna llaquichinata mandashcapi nijunshnallata, huañuchishpa yahuarta jichajcunata imashna llaquichinata mandashcapi nijunshnallata, imatapash cashcatapacha ruraj runacuna llaquichinajunga. Cazarashca jahua shujcunahuan causaj huarmicuna, yahuarlla maqui huarmicuna cajpimi, chashna ruranga” nihuarcami.

46Chaimandami Mandaj Jatun Diosca, cashna nihuarca: “Ñucami, chai huarmicunata llaquichinajuchunga, soldadocunata vichai cachasha. Chai huarmicunataca pandachijcunaman, shuhuajcunamanmi cusha.

47Paicunataca, chai pandachij runacunami rumicunahuan peganajunga, espadacunahuambashmi huashaman yalijta tujsinajunga. Paicunapaj churicunatapash, ushicunatapashmi huañuchinajunga. Paicunapaj huasicunatapash, ninahuan rupachishpami tucuchinajunga.

48Chai llactapi nalita rurana munaihuanlla purijcunataca tucuchishami. Chaita ricushpami, tucui huarmicunapash yuyaita japinajunga. Chaimandami, jatun nalicunata canguna rurashcatashnaca na ruranajunga.

49Cangunallata, chashna jatun nalicunata ruranajushcamanda, cangunapaj yanga dioscunahuan huainayashpa juchacunata rurashcamandapashmi, japina cashcataca japinguichi. Chashna rurajpimi ñucataca, Mandaj Jatun Dios cajta yachanguichi” nihuarcami.