HECHOS 21 - Quichua Imbabura Bible

Jerusalenmanmi Pabloca rishca

1Chai crijcunata cayacaman nishca jipami, barcopi tiarishpa, Cos shuti llactaman rircanchi. Chai cayandi punllami, Rodas shuti llactaman rircanchi. Chaimandaca, Pátara shuti pueblomanmi yalircanchi.

2Chaipica, Fenicia llactaman rijuj barcota japishpami, chai barcopi tiarishpa rircanchi.

3Chipre shuti llactaca, lluqui ladoman cajpimi, Siria llactaman rircanchi. Imalla tiashcata uriajuchingapaj, Tiro shuti pueblopi barco shayarijpimi, ñucanchipash chaipi uriajurcanchi.

4Chai pueblopi causanajuj, Jesusta catijcunahuan tuparishpami, canchis punllacaman chaipi quedarcanchi. Paicunaman Diospaj Espíritu yuyaita cujpimi, Pablotaca: “Jerusalenman ama vichai ripaichu” ninajurca.

5Canchis punlla tucujpimi, tucui crijcuna huarmicunandi, huahuacunandi chai pueblomanda llujshina ladocaman cumbamurca. Chaipimi, mama cucha manñapi cungurishpa, Diosta mañarcanchi.

6Chai jipaca, caishujhuan chaishujhuan ugllarishpa, cayacaman nishpami, cutin barcopi tiarircanchi. Paicunapash, huasiman tigrarcallami.

7Tiro shuti pueblomanda barcopi rishpaca, Tolemaida shuti pueblomanmi chayarcanchi. Chaipi causaj crijcunata ricungapaj rishpami, paicunahuan shuj punllata chisharcanchi.

8Chai cayandi punlla chaimanda rishpaca, Pablota cumbaj ñucanchindimi, Cesarea shuti puebloman chayarcanchi. Chaipica, ali villaita villaj Felipepaj huasipimi, mingarishpa quedarcanchi. Paica, crijcunata ayudachun canchis runacunata agllashca purami carca.

9Felipeca, Dios ima nishcata villaj, chuscu ushicunatami charirca. Chai cuitsacunaca, jarihuan nara tacarishca cuitsacunami carca.

10Ña tauca punllacunata ñucanchi chaipi cajpimi, Dios ima nishcata villaj Agabo shuti runaca, Judea llactamanda shamurca.

11Paica, ñucanchita uyaj shamushpami, Pablopaj chumbita japishpa chaquindi, maquindi huatarishpa, cashna nirca:

—Diospaj jucha illaj Espiritumi, cashna nihuan: ‘Cai chumbita charij runataca, Judea llactapi tiaj Jerusalenbi causajcunami, cashna huatashpa, na israelcunapaj maquipi cushpa saquinga’ nihuanmi— nircami.

12Chashna nijpica, ñucanchipash, chaipi causanajuj crijcunapashmi:

—Jerusalenman ama vichai ripaichu— nishpa, Pablotaca jarcarcanchi.

13Shina nijpimi Pabloca, cashna nishpa tigrachirca:

—¿Imashpata huacashpa, ñuca shungupi llaquichihuanguichi? Huatai tucunatapash, na manllanichu. Ashtahuangarin Jerusalenbi huañuchijpipash, Apunchi Jesusta crishcamandaca huañushallami— nircami.

14Shina nijpipash, na quedangapaj munajpica:

—Apunchi Jesús munashcata pactachijuchun— nishpami saquircanchi.

15Chai jipami, tucuiguta apashpa, Jerusalenman vichai rircanchi.

16Cesarea shuti pueblomandaca, Jesusta catinajuj huaquingunami ñucanchita cumbashpa shamunajurca. Paicunahuanga, Chipre shuti llactamanda Nasón shuti unaita crij runapashmi shamujurca. Paipaj huasipi ñucanchi mingarichunmi pushamujurca.

Jacobotami, Pabloca ricugrishca

17Jerusalenman ñucanchi chayajpica, crijcunaca cushijushpami mingachirca.

18Cayandi punllapaj Pablo ñucanchita pushajpimi, Jacobota ricungapaj rircanchi. Chaipica, crijcunata mandaj rucu puracunalla tandanajushcatami japigrircanchi.

19Pabloca, paicunata alillachu capanguichi nircami. Shina nishpallami, na israelcunaman Diospaj Shimita pai villajujpi, Taita Dios imata rurashcatapash, callarishpa parlajurca.

20Shina parlajpimi paicunaca, Taita Diostaca punchapambagumi cangui ninajurca. Pablotapash cashnami ninajurca:

—Canllata ña yachanguimi, huauquigu. Judea llactapica, huaranga huarangacunami Jesustaca crishca. Shina cashpapash paicunaca, tucuicunami Moisés mandashca shimitapash pactachinapachami ninajun.

21Ashtahuangarin na israelcunahuan causanajuj, Judea llactamanda gentecunaman, can imashna yachachijtaca, ñami paicunaman villashca: ‘Jari huahuacunataca, circuncisión nishcata na ruranachu. Ñucanchi yachaita ruranacunatapash, na catinachu. Moisés mandashcata ama cazuchunmi, villashpa yachachishca’ ninajushcami.

22Shina cajpica, ¿imatata rurashun? Can shamushcata yachashpaca, chai ashtaca gentecunaca shamungapachami.

23Cunanga, cashnata rurai ninchimi: Ñucanchi purapica chuscu runacunami, Diosman rurashapachami nishcata pactachinata charin.

24Diospaj ñaupajpi mapa illaj cangapaca, paicunahuan rishpami, paicuna ajchata rutuchishpapash, culquita can cuna cangui. Shina rurajpica, can imatalla yachachishcata uyajcunapash, tucuicunami llullami yanajunga. Paipash Moisés mandashcataca, aliguta pactachijmari cashca ninajungami.

25Ashtahuangarin na israelpura crijcunamanga, cashna nishpami ña escribircanchi: ‘Yanga dioscunaman carashcata na micunachu. Animalpaj yahuartapash, sipishpa huañuchishca aichatapash na micunachu, napacha huainayanachu’ nircanchimi— nishpami villarca.

Pablotaca, Diospaj huasipimi prezu japishpa apashca

26Pabloca, chai chuscundi runacunata pushashpami, chai cayandi punllapaj mapa illaj tucushca jipaca, Diospaj huasiman yaicurca. Diosman imagutapash cungapaca, mapa illaj cana punllacuna pactamushcatami villangapaj yaicurca.

27Ashtahuangarin chai canchis punllacuna ña tucurinalla cajpimi, Judea llactamanda Asia llactapi causaj tauca runacuna, Diospaj huasiman shamurca. Paicunaca, Pablo chai ucupi cajta ricushpami, chaipi ashtaca gentecuna fiñachun caparishpa, ñapash japinajurca.

28Paicunaca, cashna nishpami caparinajurca: “¡Israel runacuna, ayudaichi! Cai runami, cai llactapi causaj gentecunatapash, Moisés mandashcatapash, Diospaj cai huasitapash nalicachishpa, tucuicunaman maipipash yachachishpa purijun. Ashtahuambash griego nishca runacunataca, Diospajlla cai ucumanmi, yanga huasimanshna pushamushca” ninajurcami.

29Efeso pueblomanda Trófimo shuti runatami, Jerusalenbi Pablohuan purijujta ricushca carca. Chaimandami chai runatapash, Diospaj huasi ucuman pushashcangami yanajurca.

30Chai pueblopi causajcunaca, tucuilla jatarishpa caparishpami, Diospaj huasiman calpamurca. Paicuna Pablota japishpaca, canllaman aisashpa llujchishpami, pungucunatapash ucha vicharca.

31Pablota huañuchingapaj munashpami, Jerusalenbi causajcunaca tucuilla jatarishpa caparinajurca. Chaitami, huaranga soldadocunata mandajman villarca.

32Chai mandajmi, soldadocunata, patsaj soldadocunata mandajcunata pushashpa, chai gentecunapajman calpamurca. Ashtaca ashtaca soldadocunata, chai mandaj runa pushashpa shamujujta ricushpami, Pablota macanajushpapash saquirca.

33Chai mandaj chayashpa, Pablota japichun mandashpaca, ishcai cadenahuan huatachunmi mandarca. Shina mandashpami: “¿Pita chashna rurarca?” nishpa tapurca.

34Chaipi ashtaca gentecunaca, shujta shujta maitapash villashpami, ninanda caparinajurca. Chashna ninanda caparinajujpimi, chai mandaj runaca, imamanda chashna caparinajujtapash na yacharca. Chaimandami: “Canguna tiaj shinlli torreman apaichi” nishpa, Pablotaca cacharca.

35Gradascaman ña chayanajujpi, ninandapacha llaquichingapaj gentecunaca catinajujpimi Pablotaca, soldadocunaca huandushpa rinajurca.

36Chai tucuilla gentecunaca: “¡Huañuchishun!” nishpa caparishpa catimunajujpimi, chashna huandushpa rinajurca.

Cacharihuachun yashpami, gentecunapaj ñaupajpi Pabloca villajushca

37Shinlli torre ucuman Pablota apajujpimi, chai mandaj runataca:

—¿Canman imagutapash ni ushapanichu?— nishpa tapurca.

Shina tapujpimi, chai mandaj runaca cashna nirca:

—Cambash griego rimaita yachashcanguimi.

38¿Nachu can ñucanchita fiñashpa huañuchingapaj munaj, Egiptomanda runa cangui? ¿Nachu cainani punllacunaca, chuscu huaranga na cazuj runacunata, jichushca pambaman llujchircangui?— nircami.

39Shina nijpimi Pabloca, cashna nirca:

—Cilicia shuti llactapi tiaj Tarso shuti jatun pueblomanda, Judea llactamanda yangalla runami cani. Cai tucui gentecunaman ñuca ashaguta rimachun, ¿nacha saquihuanguiman?— nircami.

40Chai mandaj runaca rimailla nijpimi, gradaspi shayarishpa chaipi gentecunataca, Pabloca maquihuan ricuchishpa upallaichi nirca. Paicuna ña upalla quedajpimi, hebreo shimipi rimashpa cashna nirca: