ISAÍAS 51 - Quichua Imbabura Bible

Sion shuti pueblopi causajcuna cushijuchun rimashca shimicunami

1“Imatapash cashcatapacha rurashpa causanata munashpa, Mandaj Dios ñucata mascajcuna, uyahuaichi: Jatun rumimanda faquishpa, cangunata anchuchishca rumita ricuichiyari. Cangunata llujchishca chai rumi utujuta ricuichiyari.

2Cangunapaj ñaupa taita Abrahamdapash, cangunata unguj mama Saratapash yarichiyari. Ashtahuangarin pailla cajpi, ñuca cayashpami bendiciashpa, ashtacata mirachircani.

3Mandaj Dios ñucaca, Sion shuti pueblopi causajcunataca cushichishapachami. Imapash illaj chulunlla sirijujtaca cushichishapachami. Jichushca sirij pambacunataca, paraíso nishca juyailla jardinmanmi tigrachisha. Chaquishca pambacunataca, Mandaj Diospaj huertatashnami rurasha. Chaipica, ninanda cushijushpami, ñucata alicachishpa candanajunga.

4Ñuca agllashcacunalla, ñucata uyahuaichi. Ñuca llactalla, ñucata uyahuaichi. Shuj llactacunapi causajcunapaca, ñucamandami mandashcapash, imatapash cashcatapacha ruranapash, gentecunata punchayachingapaj llujshinga.

5Imatapash cashcatapacha rurashpa quishpichinaca, ñami chayamugrin. Ñuca rigrahuanmi, aliguta ricushpa tucui llactacunata mandasha. Mama cucha manñapi tiaj llactacunapi causajcunapash, ñuca mandachunmi shuyanajun. Ñuca rigrahuan, paicunata mitsanatami yariajlla causanajun.

6Cangunapaj ñavihuan, jahua pachata vichai ricuichiyari. Cai pachatapash, urai ricuichiyari. Jahua pachaca, cushnishnami chinganga. Alpapash, churajuna maucayanshnami tucuringa. Cai pachapi causajcunapash, chashnallatami tucurinajunga. Ashtahuangarin ñucaca, causaita causachunmi quishpichisha. Imatapash cashcatapacha ñuca ruranaca, napacha tucuringachu.

7Imatapash cashcatapacha ruranata yachajcuna, ñucata uyaichiyari. Ñuca mandashcataca, cangunapaj shungupimi charinguichi. Shuj gentecuna rimashpa pingaichinataca, na manllanachu canguichi. Paicuna nalicachishpa rimajpipash, na huañunalla tucunachu canguichi.

8Paicunaca, churajunata polilla micujpishnami, tucurinajunga. Milmata juru micujpishnami, chinganajunga. Ashtahuangarin ñuca imatapash cashcatapacha ruranaca causajungallami. Shinallata quishpirinapash, causaita causaicamanmi canga” ninmi.

9Mandaj Dioslla, rijcharinshna jatarishpa cambaj rigrapi ushaita japiyari. Ñaupa huatacunashnallata, ushaita japishpa shayariyari. Ñaupa punllacunapica Rahab nishcataca, ¿nachu can huañuchircangui? ¿Nachu chai jatun dragondaca, can ñuturcangui?

10Yana yana jundu mama cuchataca, ¿nachu can chaquichircangui? Quishpirishcacuna yalichunga, ¿nachu can jundu jundu mama cuchata chaquichishpa, ñanda rurarcangui?

11Mandaj Dios quishpichishcacunaca, Sion shuti puebloman cutin tigramungapachami. Cushijuihuan candashpami, Sion shuti puebloman tigranajunga. Paicunapaj jahuapica, causaita causaicaman cushijuimi tianga. Paicunaca, ninan cushijuitami charinga. Nanaipash, aij nishpa huacanapash tucuringami.

12“Ñuca, ñucapachami, cangunata cushichij cani. ¿Cangunaca, ima cashpata jupashna chingajlla huañuna aichayu runatara manllanguichi?

13Cangunata Ruraj Mandaj Dios ñucami, jahua pachatapash telata chutanshna churashpa, cai pachatapash rurarcani. Shina tucuita ruraj Diostaca, ¿ñachari cungarcanguichi? Cangunata llaquichijcuna ninanda fiñarishpa tucuchingapaj shayarinajujpica, punllandimi ninanda manllanajurcanguichi. Ashtahuangarin cangunata ninanda fiñashpa llaquichijca, ¿maipitayari?

14Llaquihuan shaijushca prezu causajcunaca, uchami prezumanda llujchi tucunga. Prezu causanajuj alpa ucuman utuju ucupica na huañungachu. Paicunapaca, micunapash na illangachu.

15Mama cuchata ninanda cuyuchishpa jatarichij, shinallata manllanayaita huacaj, Mandaj Dios ñucami, cangunapaj Taita Dios cani. Ñuca shutica, tucuita Mandaj Dios shutimi.

16Cangunapaj shimipimi, ñuca rimashca shimicunata churarcani. Jahua pachataca, telata chutanshna churashpami, cangunataca ñuca maquihuan llandunshna cuidani. Cai pachatapash, alipacha shinllitami churarcani. Chaimandami, Sion shuti pueblopi causajcunataca: ‘Cangunaca, ñuca agllashcacunami canguichi’ nini” ninmi.

17Rijchari Jerusalenlla, rijcharishpa jatariyari. Canga, Mandaj Dios fiñarishpa paipaj maquihuan cushca copamanda tucurijta ufiashpami, muspayashca cangui.

18Canman ungushca tucuilla churicunamandaca, shujllapash canda pushangapaca, na tianllu. Can viñachishca, tucuilla churicunamandaca, shujllapash, maquimanda aisashpa pushangapaca, na tianllu.

19Cai ishcai jatun llaquicunami, candaca japirca: Jatun llaquita rurashpa, llaquinayaita tucuchina, yarjaimandapash, espadahuambash huañuchi tucunami japirca. ¿Pita candaca llaquingayari? ¿Pita candaca cushichingayari?

20Cambaj churicunaca, linllipi tsagnarishca tarugashnami, tucui ñan tigranacunapi shaijushca, huañunalla sirinajurca. Canda Mandaj Taita Dios ninanda fiñarishpa llaquichijpimi, chashna tucurca.

21Llaquilla causajuj huarmilla, cunanga caita uyai: Vinota na ufiashca cashpapash, machashcami cangui.

22Canda Mandaj Jatun Diosca, paipaj agllashcacunamanda randi shayarij, cambaj Taita Diosmi. Paica, cashnami nin: “Ricui, ñuca ninanda fiñarishca copamanda can ufiashpa machanataca, cambaj maquimanda ñami quichurcani. Ñuca ninanda fiñarishca chai copamandaca, na ashtahuan ufianguichu.

23Chaitaca, canda ninanda llaquichijcunapaj maquipimi churagrini. Paicunaca, candaca: ‘Ñucanchi sarushpa yalingapaj cumuri’ ninajurcami. Shina nijpimi, canga ñan alpashna tucushpa, cambaj jahuata yalichun saquircangui” ninmi.