ROMANOS 11 - Quichua Imbabura Bible

Israelcunaca, huaquinllami puchushca

1Cutinmi tapuni: ¿Taita Diosca, pai agllashcacunata jichushcachu? Napacha shinachu. Ñucapash, Israel runallatami cani. Abrahambaj mirai, Benjamín aillu purami cani.

2Taita Diosca, ñaupamandapacha pai rijsishpa agllashcacunataca, napacha jichushcachu. Eliasmanda Dios escribichishca Shimipi parlashcataca, ¿nachu yachanguichi? Paica, israelcunata fiñashpami, Taita Diosta mañashpa cashna nijushca:

3“Jatun Dioslla, can ima nishcata villajcunataca huañuchishcami. Cambajlla tiajuj altarcunatapash urmachishpami tucuchishca. Ñucalla puchushca cajpimi, ñucatapash huañuchingapaj mascanajuhuan” nijushcami.

4Ashtahuangarin Dios tigrachishpaca, cashnami nin: “Baal shuti diospaj ñaupajpi na cungurishca, canchis huaranga runacunatami, ñucapajlla cachun puchuchircani” nijunmi.

5Shinallatami cunambipash, Israel puracunataca huaquingunatalla puchuchishpa, Diosca ninanda juyashpa agllashca.

6Aliguta rurashcamandaca, na agllajunllu. Dios ninanda juyashpallami agllajun. Chashna cashpaca, Diospaj ninan juyaica, na ninan juyaichu canman. Aliguta rurajpilla agllajushpaca, na Diospaj ninan juyaichu canman. Shina cashpaca, aliguta rurashcapash na rurashcashna yangami ricurinman.

7Israelcunaca, ¿imata tucushca? Paicuna mascanajushcataca, na japi ushashcachu. Ashtahuangarin Dios agllashcacunaca, japi ushashcami. Chaishujcunaca, shinlli shungucunami tucushca.

8Escribishcapica cashnami nijun: “Taita Diosmi, paicunata muspayachij yuyaita curca. Ñavita charishpapash ama ricunajuchun, rinrita charishpapash ama uyanajuchunmi, cunan punllacaman chashna curca” nijunmi.

9Davidpash cashnami nijun:

“Paicuna fiestata rurajushcapash,

tugllapi huashajunshna, huascapi

huatarinshna tucushpaca alichari canman.

Chaipi nitijashpa, ninanda llaquichi tucushcanman.

10Paicunapaj ñavipash ama ricuchun, ñausayashca cachun.

Paicunapaj huashatapash, causaita causaicaman

llaquichishpa saquipai” nijunmi.

Na israelcunapash quishpirinajunmi

11Cutinmi tapuni: Israelcuna urmangapaca, ¿nitijanshna pandashcachu? Napacha shinachu. Ashtahuangarin na cazujpimi, na israelcunatara Diosca quishpichijun. Chaita ricushpaca, israelcunapash cutin yarishpa tigrarichunmi, shinaca rurajun.

12Israelcuna na cazushpa, paicuna urmajpipash, cai pachapi causanajuj na israelcunapaca, charijyanshnami cashca. Shina cashpaca israelcunatacarin, ¿maitata na cutin aliguta quishpichingayari?

13Na israelcuna, cangunamanmi villajuni. Na israelcunaman villachun cachashca cashpami, Diospajta ñuca rurajushcataca ninanda alicachijuni.

14Ñuca llacta puracuna cangunata ricushpa, imashnallapash cutin yarishpa, huaquinllapash quishpirichunmi, cashna villajuni.

15Israelcunata Dios jichujpimi, cai pachapi causaj na israelcunara paihuan ali tucunajun. Israelcunata cutin chasquijpica, ¿imashi tucunga? Huañushcacunapaj chaupimanda causarinshnami canga.

16Punda llujshijuj tandapash Diospajlla cajpica, chai masanapash Diospajllami. Shinallata sapipash Diospajlla cajpica, malquicunapash paipajllatami.

17Huaquin israelcunaca, ali olivos quirumanda malquicunata cuchushcashnami tucurca. Na israelcunaca, sachapi viñashca olivos quirupaj malquishnami canguichi. Chai malquita apashpa, ali olivos malquicunata cuchushcapi viñachun, llutashcashnami canguichi. Shina cashpami, ali olivos quirupaj yacu viñachijpi, chai ali quirupaj sapimandalla causanguichi.

18Shina cashpami, chai malquita anchuchishcashna israelcunataca, napacha jariyana cangui. Can jariyajushpaca, caitami yarina cangui: Canga malquishnallami cangui. Shinamandami chai sapitaca, na chari ushangui. Ashtahuangarin chai sapimi, candaca charijun.

19“Chai malquicunataca, ñucatara churangapajmi cuchushca” ninguichari.

20Ari, chashnapachami. Israelcunaca na crishpami, cuchushcashna tucushca. Ashtahuangarin canga crishpallami, chai cuchushcapi viñachun churai tucushca cangui. Shina cashpami na jariyashpa, aliguta yarishpa causana cangui.

21Taita Diosca, chai quirupipacha viñashca malquishna israelcunapaj juchatapash na cungashpaca, cambaj juchatapash na cungangachu.

22Ricui, Taita Diosca ninanda juyajmi, paillata shinllita llaquichijpashmi. Pai shinllita llaquichinaca, pandashpa urmajcunapajmi. Ashtahuangarin canda juyajushcata yarishpa causajujpica, candaca juyajungallami. Na shina causashpaca, cambash anchuchi tucunguimi.

23Israelcunapash, cutin tigrashpa crishpaca, chai quirupillata churai tucungami. Taita Diosca, paicunata cutin churangapaj ushaita charinmi.

24Canga, maipipash viñashca sacha olivos quirupaj malquishnami cangui. Shina cajpipash candarami, chai ali olivos quirupi churarca. Israelcunacarin, chai ali quirumandapacha malquicunashnamari paicunatacarin, ¿maitata Diosca na churai ushangayari?

Taita Diosca, israelcunataca quishpichingami

25Huauquicuna, panicuna, ñucanchillami yachanchi nishpa ama jariyachunmi, pipash imata na yachai ushashcataca yachachun munani. Israelcunaca, huaquingunallami shinlli shungu tucushca. Paicunaca, na israelcunata Dios agllajpi crishpa yaicungacamanmi, chashna causanajun.

26Chai jipami, tucuilla israelcunaca quishpiringa. Escribishcapica cashnami nijun:

“Quishpichijca, Sion pueblomandami shamunga.

Paica, Jacobopaj miraicuna Diosta na cazushpa causanajushcatami anchuchinga.

27Paicunapaj juchacunata anchuchishpami,

ñuca paicunahuan ari nishcataca pactachishca” nijunmi.

28Ali villaimanda ricushpaca, ali villaita canguna crishcamandami, fiñashpa purinajun. Shina cajpipash, paicunapaj ñaupa taitacunata agllashcamandaca, Dios juyashcacunami.

29Taita Diosca, pai carashca alicunata, pai cayashcataca napacha shujman tigrachi ushanllu.

30Cangunapash pundaca, Taita Diostaca na cazushpami causarcanguichi. Shina cashpapash cunanga, israelcuna na cazujpimi Dios llaquinataca, cangunapash tarishcanguichi.

31Shinami paicunapash, cunanga na cazunajun. Dios cangunata llaquishcamandaca, paicunapash Dios llaquinataca cutin tarichunmi, chashna tucushca.

32Taita Diosllatami, tucuicunatallata llaquijushcata ricuchingapaca, tucuicuna na cazuchun saquirca.

33¡Taita Diosca, tucui imatapash charij, ali yuyaita charij, aligutapacha yachajmi! ¡Pai llaquichijujtaca, pipash na yachai ushanllu! ¡Imashpa pai chashna rurajujtapash, na yachanllu!

34“Pai imata yarijujtaca, ¿pita yachai usharca? Na cashpaca, ¿pita paiman ali yuyaita cuj runa tiarca?

35¿Pita cutin tigrachishpa carahuachun nishpa, paimanra punda cararca?”

36Ima tiashcapash paipajmi, paimandami tian, paipajllatami. Shina cashcamandaca paitaca, causaita causaicaman ninanda alicachishunchi. Shina cachun.