PROVERBIOS 10 - Quichua Imbabura Bible

Imatapash cashcatapacha rurajpash, nalita rurajpash shujpachami

1Salomón yarichishca shimicunami.

Alipacha yachajushca churica, taitata cushichinmi.

Ashtahuangarin shinlli shungu

churica, mamata llaquichinmi.

2Nalita rurashpa imatalla charishcacunaca,

ima alipajpash na cangachu.

Ashtahuangarin imatapash cashcatapacha

ruranaca, huañuimanda cacharichinmi.

3Mandaj Diosca, imatapash cashcatapacha rurajtaca,

yarjaimanda llaquita apachunga na saquingachu.

Ashtahuangarin Diosta na manllajcunataca,

nalita rurashcallatami llaquichinga.

4Imata ruranatapash na munajcunapaj maquica,

imagutapash na charijta ruranllami.

Ashtahuangarin imata cashpapash ucha

rurajcunapaj maquica, charijyachinmi.

5Rupai punllacunapi granota tandachij

runaca, alipacha yachajushcami.

Ashtahuangarin cozechana punllacunapash

puñujujlla churica, pingaichij churimi.

6Imatapash cashcatapacha ruraj runaca,

ninadami bendiciai tucunga.

Ashtahuangarin Diosta na manllajcunataca,

paicuna ninanda llaquichishcallatami, shimita quilpanga.

7Imatapash cashcatapacha rurajtaca,

ali cashcamandami, yariashpa alicachinajunga.

Ashtahuangarin Diosta na manllajcunapaj

shutica, ismunshnami chinganga.

8Alipacha yachajushcapaj shungupillami,

mandashcacunataca chasquin.

Ashtahuangarin nali shimicunata rimaj,

shinlli shungu runaca urmangallami.

9Ima nalitapash na ruraj runaca,

imatapash na manllanllu.

Ashtahuangarin nalita rurashpa purij runaca,

ninandami llaquichi tucunga.

10Nalita rurangapaj ñavita

capitsij runaca, llaquitami apamun.

Nali shimicunata rimaj, shinlli

shungu runaca llaquichi tucungami.

11Imatapash cashcatapacha ruraj runapaj

shimica, causaita cuj yacu llujshijunshnami.

Ashtahuangarin Diosta na manllajcunataca,

paicuna ninanda llaquichishcashnallatami shimita quilpanga.

12Na ricunayachishpalla purinaca,

fiñanajuitami jatarichin.

Ashtahuangarin juyaica tucui nalitapash,

quilpanshnami cungachin.

13Aligutapacha yarishpa purij runapaj

shimipica, ali yachaimi tian.

Ashtahuangarin vara caspica, na aliguta

yarishpa causajcunapaj huashapi astingapajmi.

14Alipacha yachajushcacunaca, ali yachaita alichinmi.

Ashtahuangarin shinlli shungu runapaj

shimica, ñapash llaquipi churanllami.

15Charij runapaca, ashtacata charishcapash

jatun pircahuan muyundi jarcashca puebloshnami.

Imagutapash na charijcunaca, imagupash

illashcamandami, shaijushcashna causanajun.

16Imatapash cashcatapacha ruraj runaca,

causaipajmi imatapash ruran.

Ashtahuangarin Diosta na manllaj runaca,

imata rurashpapash juchatallami mirachin.

17Yachachishcata cazunaca, causaiman pushaj ñanmi.

Ashtahuangarin jarcashpa rimashcata

yangapi churaj runaca, pandarinllami.

18Shungu ucupilla fiñaj runaca,

llullashpallami parlajun.

Pitapash yanga juchachishpa parlashpa

purij runaca, shinlli shungu runami.

19Imatapash ninandapacha parlanajujpica,

juchapash na illanllu.

Ashtahuangarin ima parlotapash jarcarij runaca,

aligutapacha yarishpami purinajun.

20Imatapash cashcatapacha ruraj runapaj

shimica, ali culquita agllashcashnami.

Ashtahuangarin Diosta na manllajcunapaj

shunguca, imapash illanshnallatami.

21Imatapash cashcatapacha rurajcunapaj

shimihuanga, ashtacunata michinshnami yachachijun.

Ashtahuangarin shinlli shungu runacunaca,

yuyaita na japimandami huañunajun.

22Mandaj Dios bendiciamushcami charijyachin.

Chaihuanga, ima llaquitapash na mirachinllu.

23Juizu illaj runapaca nalita ruranaca,

pugllashpa cushijunashnami.

Ashtahuangarin yuyaita charij runataca,

ali yachaimi cushichijun.

24Diosta na manllaj runa imata

manllashcapash, chaillatami shamunga.

Ashtahuangarin imatapash cashcatapacha rurajcunamanmi,

paicuna munashcata caramunga.

25Nalita ruraj runaca, jatun acapana

yalinshna ñapash chinganllami.

Ashtahuangarin imatapash cashcatapacha

ruraj runaca, causaita causajunllami.

26Imata rurangapajpash na munaj runata imata rurachun

cachajcunapaca, quirupi vinagre chayanshna,

ñavipi cushni yaicunshnami.

27Mandaj Diosta manllanami,

causana punllacunata mirachimunga.

Ashtahuangarin paita na manllajcuna causana

huatacunaca, ñapashmi tucurimunga.

28Imatapash cashcatapacha ruraj runacuna shuyanaca, cushijunami.

Ashtahuangarin Diosta na manllajcuna shuyanaca, chingangallami.

29Mandaj Diospaj ñanga, ima pandatapash

na rurajcunataca, shinlli torreshnami jarcan.

Ashtahuangarin nalita rurajcunapaca, chingaiman apana ñanmi.

30Imatapash cashcatapacha ruraj runaca,

ima horapash na cuyuchi tucungachu.

Ashtahuangarin Diosta na manllajcunaca,

cai pachapica na causanajungallachu.

31Imatapash cashcatapacha ruraj runapaj

shimica, ali yachaitami mirachinga.

Ashtahuangarin jatun nalita rimaj runataca, jallutami fitinga.

32Imatapash cashcatapacha ruraj runaca,

cushijunatami parlanata yachan.

Ashtahuangarin Diosta na manllajcunapaj

shimica, jatun nalitallami riman.