1Curacunata tucui mandajcunata runacunapaj chaupimanda Dios agllashpaca, gentecunapaj alipajllami agllashpa churan. Paicuna Taita Diosman carashcacunata Diosman cuchun, juchacunamanda animalcunata paiman cushpa huañuchinajuchunmi agllashpa churan.
2Imatapash na yachaj, chingashca causaj gentecunata na ñapash fiñajlla cajta ricuchingapajmi, chashna agllashpa churan. Chai curapash, nali munaicuna muyundi japi tucunallami causajun.
3Chashnamandami paipaj juchacunamandapash, chaishuj gentecunapaj juchacunamandapash, animalcunata Diosman cushpa rupachinata charin.
4Maijambash na paillata cashna ninanda alicachi tucunata japi ushanllu. Ashtahuangarin Aarón curatashna Taita Dios agllajpillami, chaitaca japi ushan.
5Shinallata Cristopash, paillata alicachirishpaca, na curacunata mandaj tucurcachu. Ashtahuangarin:
“Canga, ñuca Churimi cangui.
Ñucami, causaita cunan canman curcani”
nijushca Diosmi, curacunata mandaj cura tucuchun churarca.
6Escribishcapica, shuj pushtupipash cashnami nijun:
“Canga, causaita causaicamanmi Melquisedec
shuti curashna curapacha cangui” nijunmi.
7Cristo cai pachapi causajushpaca, ninanda mañashpa caparishpa huacashpami, huañunamanda quishpichi ushaj Diosta mañajurca. Manllaihuan cazujushcata chashna ricuchishpa mañashcamandami, paitaca uyarca.
8Cristoca, Diospaj Churi cashpapash, ninan llaquita apashpami, imashna cazunataca yachajurca.
9Shina aliguta pactachishpami, paita tucui cazujcunataca causaita causagrichun quishpichijun.
10Shinamandami, Melquisedec curatashna Taita Diosca, Jesustaca curacunata mandaj cachun churajpi, paica cura tucurca.
Crishcata ama saquichunmi, cutin cutin yachachishca11Cai yachajunataca, ashtacatapacha yachachinatami charinchi. Ashtahuangarin na yachachi ushanalla cajpimi, cangunapash na ashtahuan uyangapaj munanguichi.
12Cai tucui huatacunapica, ñami yachachijcuna tucuna carcanguichi. Ashtahuangarin Taita Diospaj Shimitaca, maijanda cashpapash, callarimanda cutin yachachichun minishtinguichirami. Shinlli micunataca, na micui ushashpa, huahuacuna lechetalla munanshnami causangapaj tigrashcanguichi.
13Huahuacunaca, lechetallami munan. Huahuacuna lechetalla munanshna causajcunaca, imatapash cashcatapacha rurashpa causachun yachachijuj Diospaj Shimitaca, tucuicunami na yachajui ushan.
14Ashtahuangarin shinlli micunataca, rucucunallami micui ushan. Paicunaca, ali yuyaicunata charishpa aliguta yachajushca cashpami alita, nalitapash yachai ushajcuna tucushca.
Who We AreWhat We EelieveWhat We Do
2025 by iamachristian.org,Inc All rights reserved.
