Psalms 71 - Quichua Imbabura Bible

Rucu runagumi, Diosta mañashca

1Mandaj Dioslla, cambimi ñucaca pacajushcani.

Ñuca pingai tucuchunga, ima horapash ama saquihuaichu.

2Imatapash cashcatapacha rurashpa,

llaquimanda ayudashpa cacharichihuayari.

Aliguta uyashpa quishpichihuayari.

3Ñuca pacajuna, jatun Rumishna capairi.

Chaimanmi, ñucaca rijushalla.

Canmi, mandashcataca ñucata quishpichingapaj cushcangui.

Canmi, ñucapaca jatun Rumishna,

ñucapaj shinlli torreshna capangui.

4Ñuca Taita Dioslla, canda na manllaj runapaj

maquimanda, jatun nalita rurajpaj maquimanda,

na llaquishpa huañuchijpaj maquimanda cacharichihuayari.

5Mandaj Jatun Dioslla, canmi ñuca shuyana capangui.

Ñucataca, chairalla viñai cashcamandapachami,

aliguta cuidajuhuangui.

6Ñucataca, mamapaj vijsapi cajpillatami,

cambaj maquipi charihuashcangui.

Ñuca mamapaj vijsamandaca, canmi llujchihuarcangui.

Chaimandami, candalla tucui causaipi alicachijusha.

7Ñucaca taucacunapajmi, jatun manllarina carcani.

Canga, ñucapaca shinllipacha pacajmi capangui.

8Ñuca shimica, canda alicachinahuan,

canda cushichinahuan, punllandi junda cachun.

9Ña rucuyajpipash, ama shitahuanguichu.

Ñuca ushai illaj tucujpipash,

ama jichushpa saquihuanguichu.

10Ñucata fiñajcunaca, ñucatami nalicachinajun.

Ñucata huañuchingapaj pacalla chapajcunaca,

paicunapura tandanajushpami parlanajun.

11Paicunaca cashnami ninajun:

“Taita Diosca jichushpami saquishca.

Paitaca, pipash na cacharichingachu.

Catishpa japichilla” ninajunmi.

12Taita Dioslla, ñucamandaca ama caruyapaichu.

Ñuca Taita Dioslla, ñucata ayudangapaj ucha shamupairi.

13Ñuca causaita tucuchingapaj munajcunaca,

pingaichi tucushca, chingachi tucushca cachun.

Ñucata llaquichingapaj muyujujcunaca,

pingai tucunahuambash, musparinahuambash,

quilpai tucushcashna cachun.

14Ashtahuangarin ñucaca, tucui causaipimi

candalla shuyajusha.

Ashtahuan ashtahuanmi, candaca alicachijusha.

15Ñuca shimica, imatapash cashcatapacha

can rurashcatami villajunga.

Alicunata rurashpa can quishpichishcataca,

na cuentai ushanalla cajpipash,

punllandi parlajushallami.

16Mandaj Jatun Dios ninan ushaihuan

rurashcacunata ricungapajmi shamusha.

Imatapash cashcatapacha can rurashcatami

yarijusha, alita can rurashcatallami yarijusha.

17Taita Dioslla, ñucataca chairalla

viñai cashcamandapachami yachachihuarcangui.

Cunangamanmi, juyaillacunata can rurashcataca villajuni.

18Taita Dioslla, rucuyashpa yuraj

ajcha tucujpipash, ama jichuhuanguichu.

Cambaj ninan ushaita, jipa punllacunapi

villangacaman, cambaj tucui ushaita, tucui

jipa miraicunaman villangacaman, ama jichuhuanguichu.

19Taita Dioslla, jahua pachaman chayajtami,

imatapash cashcatapacha rurajungui.

Canmi, jatun ruranacunata rurashcangui.

Taita Dioslla, canshnaca pipash na tianllu.

20Canga, ninan ashtaca llaquicunata,

nalicunatami ricuchihuarcangui.

Shina cashpapash, cutin causaita carahuanguilla.

Cutin cai pacha manllanayai ucu ucu

yacucunamanda jatarichihuanguilla.

21Ñucataca ashtahuan jatunyachi tucunapi

churashpami, cutinllata cushichihuangui.

22Ñuca Taita Dioslla.

Chashnallatami ñucapash, candaca

salterio tocanacunahuan alicachisha.

Israelcunapaj Jucha Illaj Dioslla.

Can na llullaj cajtaca, arpata tocashpami candasha.

23Ñuca shimica, canman candashpami cushijunga.

Can quishpichishca ñuca almapashmi cushijunga.

24Ñuca jalluca, can imatapash cashcatapacha

rurashcatami, punllandi villajunga.

Ñucata nalita rurangapaj munajcuna pingai

tucushpa, musparinajushcamandami, chashna villajusha.