HABACUC 3 - Quichua Imbabura Bible

Habacuc shuti runaguca, Diosta mañashcami

1Profeta Habacuc shuti runagumi, Sigionot nishca tonopi candashpa, Diosta mañarca:

2Mandaj Dioslla, cambaj Shimita uyashpaca, manllarircanimi.

Mandaj Dioslla, imata can rurashcataca, cunan huatacunapash cutin mushujyachipairi.

Chaicunataca, cunan huatacunapash, cutin rurashpa ricuchipairi.

Can fiñarishca cashpaca, llaquinata yaripairi.

3Taita Diosca, Temán shuti llactamandami shamunga.

Jucha illaj Diosca, Parán shuti urcumandapachami shamunga. Selah

Jahua pachataca, paipaj punchapambami quilparca.

Cai pachapica, paita alicachishca shimicunami jundarca.

4Pai punchayachijujca, michashnami carca.

Paipaj maquimandaca, punchapamba rayocunami llujshijurca.

Chaipimi paipaj ushaica, pacalla tiajurca.

5Paipaj ñaupajpica, huañuchij ung:uimi rijurca.

Paipaj chaquimandaca, nina rupajuj carbongunami llujshijurca.

6Paica jatarishpami, cai pachataca medirca, ricushpallami gentecunatapash chujchuchirca.

Punda huatacunamanda tiaj urcucunapashmi ñuturirca.

Punda huatacunamanda tiaj lomacunapash, pingai tucushpami cumurinajurca.

Paipaj ñangunaca, causaita causaicamanmi.

7Cusán shuti llactapi tiaj carpacunaca, llaquilla cajtami ricurcani.

Madián shuti llactapi tiaj carpacunapashmi chujchunajurca.

8Mandaj Dioslla, ¿jatun yacucunahuanllu fiñarircangui?

¿Canga, jatun yacucunahuanllu fiñarircangui?

¿Cambaj caballocunapi, cambaj mishana carretacunapi tiarishpaca, mama cuchata fiñashpachu chashna tiarircangui?

9Cambaj arcopash, tucuillami ricurirca.

Aillucunaman juramentushcapash, pactanapacha shimicunami carca. Selah

Pambacunatapash, jatun yacucunahuanmi huaicuyachircangui.

10Canda ricushpaca, urcucunapashmi manllarirca, yacupash ninanda jundashpami yalirca.

Manllanayai ucu ucu yacucunapash caparishpami, jahuaman maquita alsanshna jatarirca.

11Indipash, lunapash, chai pushtupimi shayarirca.

Cambaj flechacuna punchayachijpi, cambaj ninan punchapamba lanza punchayachijpimi calpanajurca.

12Canga, ninanda fiñarishpami, cai pachataca sarurcangui.

Ninandapacha fiñarishpami, shuj llactacunapi causajcunataca, trillanshna tucuchircangui.

13Can agllashcacunatapash, aceitehuan javi tucushca cambaj jatun mandajtapash, ayudangapajmi llujshircangui.

Canda na manllaj runapaj huasica, tucuicunapaj umashna cajpipash, allashpa urmachircanguillami.

Callari rumicuna ricuringacamanmi urmachircangui. Selah

14Paicunapaj soldadocunataca, paicunapaj flechacunahuanllatami, umata utujurcangui.

Ninan huairahuan tamiashna, caiman chaiman cachangapajmi yaicumunajurca.

Paicunaca pacalla langashna, imagutapash na charij runata llaquichishun yashpami cushijunajurca.

15Caiman chaiman cuyurijuj mama cucha yacu jahuataca, cambaj caballocunapi tiarishpami purijurcangui.

16Chaita uyashpami, vijsa ucucaman manllarircani.

Rimajta uyashpaca, ñuca shimipashmi chujchurca.

Ñuca tullucunapash ismujunshna tucushpami, ñuca shungupica chujchujurcani.

Gentecunata llaquichingapaj, paicunapaj soldadocunahuan vichai shamujpipash, ñucaca chai ninan llaqui punllapica, casilla tiajushallami.

17Jigos yuracuna na sisajpipash, uvas yuracuna na granujpipash, olivoscuna na fucujpipash, chagracuna na fucujpipash,

llamacuna pambamanda tucurijpipash, huarmi huagracuna corralcunapi illajpipash,

18tucui chashna tucujpipash ñucaca, Mandaj Dioshuanmi cushijusha.

Ñucaca, ñucata quishpichij Taita Diospimi cushijuita charisha.

19Mandaj Jatun Diosca, ñucapaj shinlli torreshnami.

Paimi, ñuca chaquitapash, tarugatashna ucha calpajta ruran.

Jahua urcucunapipash, paimi cuidashpa pushahuan.

Cuerdayu ñuca tocanacunapi tocashpa,

candajcunata mandaj candachinami.