1 REYES 11 - Quichua Imbabura Bible

Diosta saquishcamandami, Salomonga llaquichi tucushca

1Jatun mandaj Salomonga, Faraonbaj ushihuan cazarashca jahuami, shuj llactamanda huarmicunatapash ashtacata charirca. Chai huarmicunaca: Moab, Amón, Edom, Sidón shuti llactacunamanda, heteo puramandapashmi carca.

2Mandaj Diosca, chai gentecunamandami israelcunataca, cashna nishca carca: “Cangunaca, na paicunahuan cazaranachu canguichi, paicunapash na cangunahuan cazarangachu. Paicunahuan cazarajpica, paicunapaj dioscunata catichun cangunapaj shunguta pandachingapachami” nishcami carca. Ashtahuangarin Salomonga, chai huarmicunata juyashpami, paicunahuan cazararca.

3Jatun mandaj huarmicunatallami, canchis patsaj huarmicunata charirca. Caishuj huarmicunataca, quimsa patsaj huarmicunatami charirca. Chai huarmicunami, Salomonbaj shungutaca pandachirca.

4Salomón ña rucu cajpimi, chai huarmicunaca, shujcunapaj dioscunata catichun paipaj shunguta pandachirca. Paipaj taita David, tucui shunguhuan paita Mandaj Taita Diosta cazushcashnaca, paica na tucui shunguhuan cazujurcachu.

5Salomonga, Sidón llactapi causajcunapaj Astoret shuti huarmi diosta, amonitacunapaj Milcom shuti millanayai, yanga diostami catijurca.

6Shinami Salomonga, Mandaj Diospaj ñaupajpica nalita rurajurca. Paica, Mandaj Diosta na paipaj taita Davidshna aliguta catijurcachu.

7Chaimandami Salomonga, Moab llactapi causajcunapaj Quemos shuti millanayai yanga diosman, Jerusalén chimbapura lomapi shuj altarta shayachirca. Shinallata Amón llactapi causajcunapaj Moloc shuti millanayai yanga diosmambashmi, chashna shayachirca.

8Chashnami, caru llactamanda tucuilla paipaj huarmicunaman altarcunata shayachirca. Chaipimi chai huarmicunaca, paicunapaj dioscunaman inciensota cushnichishpa, animalcunata cushpa huañuchin carca.

9Israelcunata Mandaj Taita Diosmanda, paipaj shungupash anchurishca cajpimi Mandaj Diosca, Salomondaca fiñarca. Diosca, ishcai viajeta paiman ricurishpami:

10“Shuj dioscunataca ama catinguichu” nishpa mandashca carca. Ashtahuangarin Salomonga, Mandaj Dios mandashcataca na pactachircachu.

11Chaimandami Mandaj Diosca, Salomondaca cashna nirca: “Canga, chashna rurashpami, ñucahuan ari ninajushcatapash, pactachinajuchun cushca shimicunatapash, na pactachishcangui. Shinamandami can mandajushcataca quichushpa, canda servijman cusha.

12Shina cashpapash cambaj taita Davidta juyaimandami, can causajui punllacunapica, na chaita rurasha. Cambaj churipaj maquimandami quichusha.

13Chashna rurashpapash mandanataca, na tucuilla quichushachu. Ñucata servij Davidtapash, ñuca agllashca Jerusalendapash juyaimandami, shuj aillu puracunataca cambaj churi mandachun cusha” nircami.

14Mandaj Diosca, Edom llactata jatun mandajpaj familiapura Hadad shuti runamanmi, Salomonda fiñashpa llaquichina yuyaita curca.

15Edom llactapi causajcunata David mishajpimi, Israel soldadocunata mandaj Joab runaca, huañushcacunata pambangapaj vichai rirca. Chaipimi, Edom llactapi causajcunataca, tucuilla jaricunata huañuchirca.

16(Joab runaca, sucta quillatami tucuilla israelcunandi chaipi causarca. Edom llactapi causanajuj, tucuilla jaricunata huañuchishpa tucuchingacamanmi, chaipi causarca).

17Chaimandami Hadad runaca, paipaj taitata servij huaquin Edomita runacunandi, Egiptopi pacajungapaj rirca. Hadad runaca, uchilla huambragurami carca.

18Paicunaca, Madián llactamanda llujshishpami, Parán shuti jichushca pambaman chayagrirca. Chai pambamandami tauca runacunata apashpa, Egiptoman chayarca. Chai Egipto llactata jatun mandaj Faraonbajman chayajpimi jatun mandajca, huasitapash, micunatapash, alpacunatapash paicunaman curca.

19Hadad shuti runaca, Faraonbaj ñaupajpica alipachami ricurirca. Chaimandami Hadad runapaj huarmi cachunga, paipaj huarmipaj ñañata curca. Tahpenes shuti jatun mandaj huarmipaj ñañami carca.

20Hadad runapaj huarmi, Tahpenes shuti huarmipaj ñañaca, Genubat shuti churitami ungurca. Chai huahuataca, Faraonbaj huasipillatami chuchumanda anchuchirca. Genubat shuti huambraguca, Faraonbaj huasipimi Faraonbaj churi puracunapi causajurca.

21Hadad runaca, Egiptopi cashpami David huañushpa, paipaj taitacunahuan tandanajugrishcata, Israel soldadocunata mandaj Joab runapash huañushcata yacharca. Chaimandami Hadad runaca, Faraondaca:

—Ñuca llactaman richun saquihuai— nirca.

22Shina nijpimi Faraonga, cashna nirca:

—¿Imashpata ringapaj munangui? Cambaj llactaman ringapaca, ¿ñucahuanga imata illan?— nijpimi, Hadad runaca:

—Imapash na illanllu. Shina cajpipash, ñuca llactaman richun saquihuai nipanimi— nircami.

23Taita Diosca, Eliada shuti runapaj churi Rezón shuti runamambashmi, Salomonda fiñana yuyaita curca. Rezón shuti runaca, Soba shuti llactata jatun mandaj paipaj amo Hadad-ezer shuti runapajmandami, pacajushpa rishca carca.

24Rezón shuti runaca, Salomonhuan macanajungapajmi tauca runacunata tandachishpa, paicunata mandaj tucushca carca. Soba shuti llactapi causajcunata David huañuchishpa tucuchijpimi, Rezón shuti runaca, paipaj runacunandi Damasco puebloman rishpa, chaipi causanajushca carca. Paitaca, Damasco pueblopi jatun mandaj cachunmi churashca carca.

25Paica, Salomonbaj tucui causaipimi, israelcunata fiñaj runa carca. Hadad runa fiñashcandicarin, paipaca ashtahuan llaquimi carca. Rezón shuti runaca, israelcunata na ricunayachij cashpami, Siria llactata jatun mandaj tucurca.

26Shinallata Sereda shuti pueblopi causajuj, efrateopura Nabat shuti runapaj churi Jeroboam shuti runapashmi, jatun mandaj Salomonda llaquichi callarirca. Jeroboam runaca, Salomonda servijmi carca. Paipaj mamaca, Zerúa shuti sapalla huarmimi carca.

27Jeroboam runaca, jatun mandaj Salomondaca, cashna rurashcamandami llaquichi callarirca. Milo nishca pushtuta aliguta rurajushpami Salomonga, paipaj taita Davidpaj pueblo pirca t'unirishcata jarcarca.

28Jeroboam runaca, imatapash na manllaj, shinlli runami carca. Chashna imatapash ruranlla cajta ricushpami Salomonga, chairalla viñai Jeroboam runataca ñaupa taita Josepaj miraicunata, tucuipi ricushpa mandachun churarca.

29Chai huatacunallatami, cashna tucurca: Jeroboam runaca, Jerusalenmanda llujshishpa ñanda rijushpami, Dios ima nishcata villaj, Ahías shuti runaguhuan tuparirca. Ahías runaca, Silo shuti pueblopimi causajurca. Chai runaguca, jahualla mushuj churajunahuan quilparishcami carca. Paicunaca, ishcaillami pambapi carca.

30Chaipimi Ahías runaguca, paipaj jahualla quilparishca mushuj churajunata llujchishpa, chunga ishcaicaman liquirca.

31Chashna liquishpami, Jeroboam runataca cashna nijurca: “Cai chungataca, can japi. Israelcunata Mandaj Taita Diosca, cashnami nirca: ‘Ricui, Salomón mandajushcataca, paipaj maquimanda quichushpami, chunga aillucunata mandachun canman cugrini.

32Paica, shuj aillutallami mandanga. Ñucata servij Davidtapash, Jerusalendapash juyaimandami, chaitalla mandachun saquisha. Chai pueblotaca, tucui Israel aillu puracunamandami agllarcani.

33Ñucata saquishpami, Sidón shuti llactapi causajcunapaj Astoret shuti huarmi diosta, Moab llactapi causajcunapaj Quemos shuti diosta, Amón llactapi causajcunapaj Moloc shuti diosta ninanda alicachishpa causanajun. Ñuca ñaupajpi aliguta rurashpa, ñuca yachachishcacunata catishpa causangapaca, na munashpami chashna causanajun. Salomonga, pactachinajuchun ñuca cushca shimicunata, imata rurachun ñuca mandashcacunataca, paipaj taita David cazushcashnaca, na cazujunllu.

34Shina cajpipash pai mandajushcataca, paipaj maquimandaca na quichushcachu. Ashtahuangarin paipaj tucui causaipi mandajuchunmi saquigrini: Ñuca agllashca, ñucata servij Davidta juyaimandami, chashna saquigrini. Paica, ñuca mandashcacunata, pactachinajuchun ñuca cushca shimicunata cazushpami causarca.

35Ashtahuangarin chai mandanataca, paipaj churipaj maquimanda quichushpami, chunga aillucunataca can mandachun cusha.

36Paipaj churi mandachunga, shuj aillutallami cusha. Ñucata servij Davidpash, lámpara rupajujtashna Jerusalenbi ñuca ñaupajpi tucui causaipi tiachunmi, chaitaca cugrini. Chai pueblotaca, ñuca shutipi mañanajuchunmi agllarcani.

37Ñucallatami candaca agllasha. Canmi, cambaj tucui almahuan munashcashnallata tucuita mandangui. Chashnami, Israel llactata jatun mandaj tucungui.

38Cambash, ñucata servij Davidshnallata, ñuca tucui mandashcacunata, ñuca escribichishca shimicunata uyashpa cazushpa, ñuca ñaupajpi aliguta rurashpa causangui. Shina causajpica, ñucaca canhuanmi casha. Can mandanataca, ñucata servij Davidman shinllita churashcashnallatami, cambaj miraicunatapash shinllita churasha. Israel llactata mandanataca, ñucami canman cusha.

39Chashna nalita rurashcamandami, Davidpaj miraicunataca llaquichigrini. Shina cashpapash, na tucui causaipi llaquichijushallachu’ ninmi” nijurcami.

40Chaita yachashpami Salomonga, Jeroboam runataca huañuchingapaj munajurca. Ashtahuangarin Jeroboam runaca pacajushpami, Egipto llactata jatun mandaj Sisac shuti mandajpajman rirca. Jeroboam runaca, Salomón huañungacamanmi Egiptopi causajurca.

Salomón huañushcatami villajun(2 Crón. 9:29-31)

41Salomón ashtahuan imatalla rurashcacunapash, tucui imatalla rurashcapash, paipaj ali yachaipash, ¿nachu Salomón imatalla rurashcacunata villajuj libropi escribishca tiajun?

42Salomonga, Israel llactataca chuscu chunga huatatami, Jerusalenbi mandajurca.

43Salomón huañushpa, paipaj ñaupa taitacunahuan tandanajujpica, paipaj taita Davidpaj pueblopimi pambarca. Paipaj randica, Roboam shuti paipaj churimi mandajurca.