MARCOS 7 - Quichua Imbabura Bible

Juchami, shungutaca mapayachin nishcami(Mat. 15:1-20)

1Fariseocunapash, mandashca shimita huaquin yachachijcunapashmi, Jesuspajman tandanajurca. Paicunaca, Jerusalenmandami shamushca carca.

2Paicunaca, Jesuspaj huaquin yachajujcuna maquita na maillashpa mapa maquihuan tandata micunajujtami ricunajurca. Maquita na maillashcamandaca, ninanda llaquichi tucunapachami ninajurcami.

3Fariseocunapash, Judea llactapi causajcunapash, ñaupa taitacuna yachachishpa saquishcata catishpami, imashpapash maquita na maillashca cashpaca, na micunajun.

4Plazamanda huasiman tigrashpapash, maquita na maillashpaca na micunllu. Paicunaca, ñaupa taitacuna yachachishcataca, ashtahuan shuj tauca yachajushcatami ruranajun. Shina cashpami, yacuta ufiana vasocunata, jarracunata, jirruta rurashca ima charishcacunatapash, mandashpa sirinacunatapash tajshanajun.

5Shina cashpami fariseocunapash, mandashca shimita yachachijcunapash, Jesuspajman shamushpaca cashna tapunajurca:

—¿Imashpata cambaj yachajujcunaca, ñaupa taitacuna yachachishpa saquishcata na cazunajun? Ashtahuangarin mapayashca maquihuanmi micunajun— ninajurcami.

6Shina tapujpimi Jesusca, cashna nishpa tigrachirca:

—Mishqui shimi, jayaj shungucuna. Canguna cashna tucuna cajpillatami, Profeta Isaiasca villajurca. Chai escribishcapica, cashnami nijun:

‘Cai llactapi causajcunaca, shimihuanllami ninanda alicachihuan.

Ashtahuangarin paicunapaj shunguca, ñucamanda carupimi.

7Ñucataca yangallami alicachinajun.

Ashtahuangarin gentecuna mandashcatallami,

ñuca yachachishcatashna yachachinajun’ nijurcami.

8Cangunaca, Taita Dios mandashcata saquishpami, runacuna yachachishcatara napacha saquishpa catinajunguichi. Chashna cashpami jarracunatapash, yacuta ufiana vasocunatapash maillanguichi. Chashnallata, imatapash ashtahuan rurashpa causajcunami canguichi— nijurcami.

9Jesusca, ashtahuan cashnatapashmi nijurca:

—Canguna yachachishpa saquishcatara catingapajmi, Taita Dios mandashcataca yangapi churanguichi.

10Moisesca, cashna nishpami mandarca: ‘Cambaj taitata, cambaj mamata alicachingui. Taitata, mamata imapash tucushpaca, alichari canman nijcunataca, llaquitapash na llaquishpami huañuchina’ nircami.

11Ashtahuangarin cangunaca, cashna nishpami yachachinguichi: ‘Taita mama imaguta mañajpipash: Cangunaman caraitaca, na ushanichu. Ñuca tucui imaguta charishcapipash, Corbán nishcami tiajun ninallami canguichi’ nishpami yachachinajunguichi. (Corbán nishpaca: “Taita Diosman carangapajmi tiajun” nijunmi).

12Chashna yachachishpami, taitaman mamaman carachunga napacha saquinguichi.

13Chashna rurashpami, Taita Diospaj Shimita yangapi churashpa, canguna yachachishcataca shujcunaman yachachishpa saquinguichi. Chashnallata, ashtahuan shuj imatapashmi rurashpa causanguichi— nijurcami.

14Shina nishpallami, tucuilla gentecunata cayashpa cashna nijurca:

—Ñuca villajujtaca, tucuicuna uyashpa aliguta yuyaita japinguichi.

15Imatapash micushpa langajpi runata mapayachijca, imapash na tianllu. Ashtahuangarin paipaj shungu ucumanda llujshijuj yuyaicunami, runataca mapayachin.

16Maijambash uyangapaj rinrita charishpaca, aliguta uyaichi— nijurcami.

17Tucuilla gentecunata saquishpa rishpami Jesusca, huasiman yaicurca. Chaipimi:

—Can chimbapurashpa parlajushcataca, ¿nachu aliguta yachachinguiman?— nishpa, paipaj yachajujcunaca tapunajurca.

18Shina tapujpimi Jesusca, paicunata cashna nirca:

—¿Cangunapashchu ñuca villajushcataca, nara ali yachai ushanguichi? Imata micunata langajpipash, genteta na mapayachijtaca, ¿narachu yachanguichi?

19Imata micujpipash na shunguman rijunllu, chunllulimanllami rijun. Shina cashpami, urai llujshinlla— nircami.

Cashna nishpaca, ima micunagutapash micunallami nishpami, Jesusca chashna yachachirca.

20Ashtahuangarin cashnatapashmi nijurca:

—Shungu ucumanda yuyaimi, runataca mapayachin.

21Gentecunapaj shungu ucumandami, nalicunata rurana yuyaicunaca llujshin. Chaimandami, cazarashca jahua shujcunahuan causanajun, huainayanajun, huañuchinajun.

22Shuhuashpa, charijyanatalla munashpa, imatapash nalitalla rurashpamicausanajun. Shinallata pitapash umashpa, na pinganayachishpa, shujcuna imata charijtapash ñucapaj cashcanman yashpa ricushpa, imapash tucushpami ali canman nishpa, ninanda jariyashpa, juizu illajmi causanajun.

23Tucui chai yuyaicuna shungu ucumanda llujshishpami, runataca mapayachin— nijurcami.

Sirofenicia shuti llactapi causaj huarmimi alipacha crishca(Mat. 15:21-28)

24Chai llactamanda llujshishpa rishpaca, Tiro shuti, Sidón shuti llactacunaman chayashpami, Jesusca chayarca. Chai llactaman chayashpami, pipash ama yachachun nishpa, shuj huasiman yaicurca. Ashtahuangarin Jesús chaipi cajtaca, tucuicuna ñapash yacharcallami.

25Shinallata shuj huarmipash, Jesús chaipi cajta yachashpami ñapash shamushpa, paipaj ñaupajpi cungurirca. Chai huarmica, nali aya jundashca ushitami charirca.

26Chai huarmica, griego shimita rimaj, Sirofenicia shuti llactamandami carca. Paica:

—Ñuca ushigumanda, nali ayata llujchipai— nishpami, Jesustaca ninanda mañajurca.

27Ashtahuangarin Jesusca, cashnami nirca:

—Huahuacunara punda micuchun shuyapai. Huahuacuna micunajujta quichushpa, alcugucunaman caranaca nalichu— nircami.

28Shina nijpimi chai huarmica, cashna nirca:

—Chashnapachamari capan, Apunchi Jesús. Ashtahuangarin alcugucunapash, huahuacuna jichashcataca micupanllamari— nircami.

29Shina nijpimi Jesusca, cashna nirca:

—Canga aligutami ningui. Cambaj ushigumandaca, ñami ayaca llujshirca. Cunanga huasita rilla— nircami.

30Shina nijpi huasita rishpaca, paipaj ushiguca ali tucushca camapi sirijujtami japigrirca. Ayaca, chai cuitsamanda ñami llujshishca carca.

Na uyaj upa runagutami, Jesusca jambishca

31Tiro shuti pueblomanda tigramushpaca, Sidón shuti pueblota, Decápolis shuti llactatapash yalishpami Jesusca, Galilea cuchaman chayagrirca.

32Chaimanmi, rinri na uyaj, shimipash na rimai ushaj runagutaca, Jesuspajman pushashpa shamunajurca. Chaipimi, chai runagupaj uma jahuapi, maquita churachun nishpa ninanda mañanajurca.

33Shina mañanajujpimi, gentecunapaj ladomanda Jesusca, shuj ladoman pushashpa, chai runapaj ishcandi rinripi maqui dedota satirca. Shinallata t'ucashpami, jallupi tacarirca.

34Shina rurashpallami Jesusca, jahua pachata vichai ricushpa, aij nishpa:

—Efata— nirca.

Efata nishpaca: “Pascarichun ninimi” nijunmi.

35Shina nijhuanmi, chai runapaj rinrica pascarirca. Shinallata huatarishca jallupash ali tucujpimi, aliguta rimajurca.

36Chai jipami Jesusca, chashna tucushcataca pimambash ama villachun nijurca. Ashtahuangarin cutin cutin chashna nijpipash, ashtahuanmi maipipash parlashpa purinajurca.

37Shina parlajpica tucuicunami, ninanda manllarishpa cashna ninajurca:

—Chai runaca, imatapash juyailla aliguta rurashpami purin. Na uyajcunapaj rinritapash pascanmi. Rimaita na ushajtapash rimachinmi— ninajurcami.