Psalms 66 - Quichua Imbabura Bible

Ninan ushaihuan imatalla rurashcamanda, Taita Diosta alicachishcamiCandajcunata mandaj candachijuchun rurashca candana Salmomi.

1Taita Diostaca, tucui cai pachapi

causajcuna, cushijuihuan caparishpa candaichiyari.

2Paipaj punchapamba shutiguta candaichiyari.

Juyailla candanacunahuanmi, alicachina canguichi.

3Taita Diostaca, cashna nichi:

“¡Can rurashcacunaca, jatun manllarinacunamari!

Cambaj jatun ushaimandami, canda

fiñajcunaca manllaihuan cazunajunga.

4Tucui cai pachapi causajcunami, candaca ninanda

alicachinajunga, canmanmi candanajunga.

Cambaj shutitami candanajunga” nichiyari. Selah

5Taita Dios rurashcacunataca, shamushpa ricuichiyari.

Huañuna aichayu runacunapaj chaupipica,

ninan manllarinacunatami rurashca.

6Mama cuchatapash, chaquishcamanmi tigrachirca.

Jatun yacutaca, chaquihuanllami yalinajurca.

Chaipimi, ñucanchica paihuan cushijurcanchi.

7Paica, causaita causaicamanmi

paipaj ushaihuan mandajun.

Paipaj ñavica, chapariashpa cuidaj

runashnami, tucui llactacunata ricujun.

Na cazujcunaca, napacha jatunyachi tucungachu. Selah

8Gentecuna, ñucanchi Taita Diostaca,

aligumari cangui nichiyari.

Paita alicachishpa candashca shimicunataca,

uyachinami canguichi.

9Paimi, ñucanchi almataca causaihuan charijun.

Ñucanchi chaqui lluchachumbash, napacha saquircachu.

10Taita Dioslla, ñucanchi imashna

causanajujta ricushpami, chashna charircangui.

Culquita mapa illajta ruranshnami,

ñucanchitaca rurarcangui.

11Linllipimi ñucanchitaca huashajuchircangui.

Ñucanchi huashapica, llasha quipitami apachircangui.

12Runacuna ñucanchi umapi tiarinajuchunmi saquircangui.

Ñucanchica ninatapash, yacutapashmi yalircanchi.

Ashtahuangarin canmi ñucanchitaca,

ashtaca alicuna tiaj pushtuman pusharcangui.

13Canman cushpa tucuillata rupachina

animalcunahuanmi, cambaj huasiman yaicusha.

Canman carasha nishcataca carashapachami.

14Ninan llaquihuan cashpami, ñuca shimihuanga

canman carashapacha nircani.

15Virayashca animalcunatami, canman

cushpa tucuillata rupachisha.

Jari llamacunataca, sahumerioshna mishquillagu

ashnajuchunmi rupachisha.

Huagracunata, jari chivocunatami,

canman huañuchishpa carasha. Selah

16Taita Diosta manllajcunaca,

tucuicuna shamushpa uyaichiyari.

Ñuca almaman imatalla rurashcatami villasha.

17Paitami, ñuca shimihuan caparishpa mañarcani.

Ñuca jalluhuanmi jatunyachircani.

18Ñuca shungupi ima nalita yarishca cajpica,

Jatun Diosca na uyahuanmanllu carca.

19Ashtahuangarin Taita Diosca uyahuarcapachami.

Ñuca ninanda mañajujtaca uyahuarcamari.

20Taita Diosca, alimari ni tucushca cachun.

Ñuca mañashcataca, na yangapi saquircachu.

Ñucata llaquinatapash, na saquircachu.