Psalms 144 - Quichua Imbabura Bible

Ayudachumbash, ali causaita carachumbashmi, Diosta mañashcaDavid rurashca Salmomi.

1Ñuca pacajuna jatun Rumishna Mandaj

Diosca, alicachi tucushca cachun.

Paimi, ñuca rigratapash, ñuca maquitapash,

jatun macanajuipaj yachachin.

2Ñucata llaquij, ñucapaj shinlli jatun huasishnami.

Ñuca pacajuna, shinlli torreshna ñucata quishpichijmi.

Ñuca jarcarina escudoshna cajpimi,

paitalla yariajuni.

Paimi, ñuca mandajuj gentecunataca,

ñucata cazuchun churan.

3Mandaj Dioslla, ¿runaca ima cajpita

paitaca yarijupanguiyari?

Na cashpaca, ¿imamandata huañuna aichayu

runataca, ninan valishcatashna charinguiyari?

4Runaca imapash yangashnami.

Paipaj causajui punllacunaca,

llandushpa yalijunshnami.

5Mandaj Dioslla, cambaj jahua pachata

pascashpa uriajumupairi.

Urcucunapi tacarishpa cushnichipairi.

6Punchapamba shitamushpa calpachipairi.

Cambaj flechacunata cachashpa manllachipairi.

7Jahua pachamanda cambaj maquita chutashpa,

jatun yacumanda llujchishpa quishpichihuayari.

Na rijsishca runacunapaj maquimanda quishpichihuayari.

8Paicunapaj shimica, yangacunatallami riman.

Ali lado maquipash llullangapajllami.

9Taita Dioslla, canmanmi mushuj candanata candasha.

Chunga cuerdayu tocanata,

salteriota tocashpami candasha.

10Canmi, jatun mandajcunamambash,

macanajuita mishachij cangui.

Canmi, canda servij Davidtaca,

llaquichij espadamanda quishpichircangui.

11Na rijsishca runacunapaj maquimanda

cacharichishpa quishpichihuayari.

Paicunapaj shimica, yangacunatallami riman.

Ali lado maquipash llullangapajllami.

12Ñucanchi churicunaca, chairalla

viñanajuj yuracunashna cachun.

Ñucanchi ushicunapash, mandashpa tiajuna huasipi

juyailla labrashca huasi tigranacunashna cachun.

13Ñucanchi granocunata alichishcacunapash,

shuj shuj granocunahuan junda cachun.

Ñucanchi animalcunapash michina pambacunapica,

huaranga huarangacunapi, chunga huarangacunapi mirachun.

14Yapungapajpash ñucanchi huagracunaca,

shinllicuna cachun.

Ñucanchita macashpa quichungapajpash ama shamuchun.

Macanajuiman llujshinapash ama tiachun.

Ñucanchi plazacunaman llujshishpa

caparishpa huacanapash, ama tiachun.

15Shina ali causaita charij gentecunaca,

ninandami cushijun.

Gentecunaca, paicunapaj Taita Diosca

Mandaj Dios cajpimi, ninanda cushijun.