1Mandaj Diosca, cutinmi cashna nihuarca: “Paipaj cumbahuanllata juyarishpa, cazarashca jahua shujcunahuan causaj huarmi cajpipash Mandaj Dios, israelcunata juyashcashnallata juyagrilla. Israelcunaca, shuj dioscunatami mañanajun. Uvasta chaquichishpa rurashca mishqui tandacunatami, ninanda munanajun” nihuarcami.
2Shina nijpimi chai huarmitaca, ñucapajlla cachun randircani. Paitaca, patsaj sucta chunga shuj gramota pezaj culquipaj, chuscu quintal chaupita pezaj cebadapajmi randircani.
3Chai jipaca, cashnami nircani: “Canga, ashtaca punllacunacamanmi ñucapajlla cangui. Ama huainayanguichu, shuj jarihuambash ama causanguichu, ñucapash canhuanga chashnallatami aliguta causasha” nircanimi.
4Israelcunaca, ashtaca punllacunatami jatun mandajpash illaj, cati mandajpash illaj, Diosman animalta cushpa huañuchinapash illaj, rumi diospash illaj, efod nishcapash illaj, terafín nishca dioscunapash illaj causanajunga.
5Chai jipami, israelcunaca cutin tigrarishpa, paicunata Mandaj Taita Diostapash, paicunata jatun mandaj Davidtapash mascanajunga. Tucurimui punllacunapi alicunata japinata yachashpami, Mandaj Diostaca manllashpa causanajunga.
Who We AreWhat We EelieveWhat We Do
2025 by iamachristian.org,Inc All rights reserved.
