1 PEDRO 4 - Quichua Imbabura Bible

Taita Dios juyashpa caramushcahuanga, aligutami servishpa causana

1Cristoca, ñucanchimandami paipaj cuerpopi llaquita aparca. Shinallatami cangunapash, llaquita apanata yariajlla causana canguichi. Maijambash paipaj cuerpopi llaquita apashpaca, juchata ruranatami saquishca.

2Cai pachapi causai tiashca punllacunallapash, ama gentecunapaj munaita rurashpa, ashtahuangarin Taita Diospaj munaita rurashpami causana canguichi.

3Cangunaca, tauca huatacunatami na israelcuna cushijushpa nalita rurashpa causashcashnallata rurashcanguichi. Canguna ima munashcata rurashpa, nalita ruranata munashpa, machashpalla purishpa, amingacaman fiestata rurashpa, ufiashpallami causarcanguichi. Shinallata millanayai, dioscunata mañashpami causarcanguichi.

4Shinamandami cunanga, paicunashna imapash cachun nalita ruranata saquishcata ricushpaca manllarishpa, cangunataca rimashpa llaquichinajun.

5Ashtahuangarin paicunapashmi causajcuna, huañushcacuna imatalla rurashcata ricuchingapaj shuyajuj Diosman villagrinata charin.

6Shinamandami huañushcacunamambash, ali villaitaca villagrishca. Paicunapash, runacuna cashcamandaca cuerpopi llaquichi tucuchun, ashtahuangarin paicunapaj almaca Taita Dios munashcashna causagrichunmi, chashna villagrirca.

7Ashtahuangarin ima tiashcapash, tucuilla tucurina punllami ña chayamujun. Shinamandami aliguta yariashpa rijcharianshna, Diosta mañanajunalla canguichi.

8Tucuimanda yalica, caishuj chaishuj ninanda juyarishpami causana canguichi. Chai juyaimi, ashtaca juchacunataca pacashpa anchuchinga.

9Caishuj chaishuj na huasha parlashpallami, mingachirina canguichi.

10Taita Dios cangunata ninanda juyashpa, shican shican imagutapash rurai ushachun cangunaman carashcashnallatami, shujcunamambash aliguta rurana canguichi. Shina rurashpami, Diospajta ali rurajcuna canguichi.

11Maijan villaj cashpapash, Taita Diospaj Shimi nishcatalla villachun. Maijambash imatapash alita rurajushpaca, Taita Dios caramujuj ushaihuan rurachun ninimi. Taita Diostaca, Jesucristomanda punchapambagumi cangui ninajuchunmi, imata cashpapash tucuita rurana canguichi. Causaita causaicaman punchapambagumi cangui ni tucunapash, tucuita imata mandajunapash paipajmi. Shina cachun.

Crijcuna cashpami, llaquita apanajunchi

12Juyashca crijcuna, cangunataca ali crij cajta ricungapajmi, ninan llaqui japijun. Chashna llaquitaca nara apashcanichu nishpaca, na manllarinachu canguichi.

13Ashtahuangarin ninanda cushijuichi. Canguna chashna llaquicunata apashpaca, Cristo llaquita apashcashnami apanajunguichi. Cangunapash, Cristo punchapambagu juyailla ricurimui punllapica ninanda cushijungapajmi, chashna causanajunguichi.

14Cristota catishcamanda nalicachishpa rimai tucujushpaca, ninandami cushijunguichi. Cangunapaj shungupica, punchapamba Diospaj Espiritumi causajun. Cangunata rimajcunaca, chai Espiritutapachami nali shimicunata rimanajun. Ashtahuangarin cangunaca, punchapambagumi cangui ninajunguichimi.

15Shinamandami, canguna puramandaca huañuchishpa, shuhuashpa, nalita rurashpa, shujcuna imatapash ninajujpi satirishpa, llaquichi tucujcunaca, na cana canguichi.

16Ashtahuangarin maijan cashpapash Cristota crishcamanda llaquita apajushpaca, na pingai tucunachu canguichi. Ashtahuangarin chai llaquita apajushcamandaca, Taita Diostami punchapambagumi cangui nina canguichi.

17Shinamandami Taita Dios llaquichina punllacunaca, paipaj huahuacunata llaquichishpa callarina punllacunara chayamushca. Cunanga, ñucanchitarami llaquichi callarijun. Tucurimui punllapicarin, Taita Diosmanda ali villaita na cazujcunaca, ¿imashi tucunga?

18“Imatapash cashcatapacha rurajcunapash, ashamandallami quishpirinajun.

Diosta na manllaj juchayu gentecunacarin, ¿imashi tucunga?” nijunmi.

19Shina cashcamanda maijan cashpapash, Taita Dios munashcashna llaquita apajushpaca, cangunata Ruraj, pactachij Diospaj maquipimi, cangunapaj almata mingashpa, aliguta rurashpa causana canguichi.