PROVERBIOS 3 - Quichua Imbabura Bible

Diosta cazuchunmi, aliguta yarichishca

1Ñuca huahualla, ñuca mandashca

shimicunataca ama cunganguichu.

Ñuca mandashcacunataca, cambaj shungupi alichingui.

2Shina rurashpami, unai punllacunata,

unai huatacunata causangui.

Shinallata casilla ali causaitapashmi,

ashtahuan charingui.

3Pitapash llaquinata, na llullashpa causanataca,

ima horallapash ama saquinguichu.

Chaitaca, cungapi huatarishcashna,

shungupi escribishcashna charingui.

4Shina rurashpami Taita Diospaj ñaupajpipash,

runacunapaj ñaupajpipash, ali

ricurishpa alicachi tucungui.

5Mandaj Diostaca, cambaj tucui shunguhuan yariangui.

Aligutapacha yarishpami purini yashpaca,

ama jariyanguichu.

6Imata rurangapajpash, Diostara yaringui.

Paimi, can purina ñangunapipash aliguta pushanga.

7Ama canllata alipacha yachajushcami

cani yanguichu.

Ashtahuangarin Mandaj Diosta manllashpa,

tucui nalimandapash anchuringui.

8Shina rurajpica, cambaj cuerpopajpash jambimi canga.

Cambaj tullucunatapash samachingami.

9Can charishca imalla alicunata carashpa,

Mandaj Diosta alicachingui.

Punda fucushca tucui granocunatapash

cushpa alicachingui.

10Shina rurajpimi, granocunata alichina

ucucunapipash ninanda jundachinga.

Uvasta cutana pushtucunapipashmi,

llullu vino jundashpami talirijunga.

11Ñuca huahualla, Mandaj Dios llaquichijpica,

ama yangapi churanguichu.

Ali tucuchun llaquichijpipash, ama fiñaringuichu.

12Churita juyashpa taita llaquichinshnallatami,

Mandaj Diospash pai juyashcacunata llaquichin.

13Cai ali yachaita tarishpa, ali yuyaita

charij runaca ninandami cushijun.

14Cai ali yachaica, culquita tarishcatapash yali alimi.

Cai ali yachaimanda japinaca, ashtahuan

ali orotapash yali alimi.

15Juyailla ninan valishca rumicunatapash

ashtahuan yali ninan valishcami.

Cai ali yachaihuanga, tucui ima munashcahuambash

na chimbapuranallami.

16Ali lado maquipica, unai causaitami charin.

Lluqui lado maquipica, charij tucunata,

alicachi tucunatami charin.

17Paipaj ñangunaca, cushijushpa purina ñangunami.

Pai purina tucui ñangunaca, casilla

ali causaiman pushaj ñangunami.

18Cai yachajunapi maquihuan charirijcunapaca,

causaita cuj yurashnami.

Cai ali yachaita chaririajcunaca, ninandami cushijun.

19Mandaj Diosca, ali yachaihuanmi,

cai pachataca rurarca.

Ali yuyaihuanmi, jahua pachatapash

shinllitapacha churarca.

20Tucuita yachaj cashpami, manllanayai

ucu ucu yacucunatapash shicanyachirca.

Jamzi paramupash, jahua pachamandami urmamun.

21Ñuca huahualla, caicunataca ricuriajunallami cangui.

Mandashcatapash, ali yuyaita

cushcatapashmi alichina cangui.

22Chaicunami, cambaj almaman causaita cunga.

Cambaj cungapi juyaillaguta huatarishcashnami canga.

23Shina cajpimi ñanda rijushpapash,

imatapash na manllashpa ringui.

Cambaj chaquipash, na nitijangachu.

24Samangapaj siririshpapash, na manllanguichu.

Ashtahuangarin siririshcandimi, aliguta puñungui.

25Cungashcapi ima llaqui japinatapash,

na manllanguichu.

Diosta na manllajcunata llaqui

japijpipash, canga na manllanguichu.

26Mandaj Diostalla yariashpa

causashpami, chashna cangui.

Cambaj chaqui, ima llaquipi japi

tucushpa quedanamandapash, paimi huacaichinga.

27Maijanman cashpapash ayudanapacha cajpi,

ayudai ushashpaca, ama na ninguichu.

28Shuj runagu imata mañajpipash,

maquipi charijushpataca ama:

“Caya cushallami, tigramugri”

nishpa cachanguichu.

29Imatapash na manllashpa cambaj ladollapi

causajuj cumba runagutaca, ama paita fiñashpa

llaquichinata yaringuichu.

30Ama pihuambash, yangamanda fiñanajushpa rimaringuichu.

Imatapash na llaquichijpitaca, na fiñanajunachu cangui.

31Imatapash cashcatapacha na ruraj runata

ricushpapash, ama chashna cashcaiman yanguichu.

Pai imata rurashpa causajujtapash, ama catinguichu.

32Mandaj Diosca, jatun nalita rurajtaca millanayachinmi.

Ashtahuangarin imatapash cashcatapacha

rurajcunapaca, ali cumbagumi.

33Mandaj Dios cachamushca imapash llaquicunaca,

paita na manllajpaj huasipimi.

Ashtahuangarin imatapash cashcatapacha

rurajcuna causana huasipica bendiciangami.

34Na cazushpa asijcunataca, Mandaj

Diospash asingapachami.

Ashtahuangarin na jariyashpa

causajcunatami alicachinga.

35Alipacha yachajushcacunami,

alicachi tucunata japinga.

Ashtahuangarin shinlli shungucunaca,

ninanda pingai tucunatami japinga.