ÉXODO 18 - Quichua Imbabura Bible

Taita Jetromi, Moisesta ricungapaj rishca

1Moisespaj suedro taita Jetroca, Madián llactapaj curami carca. Paica, tucui imatalla Moisesman Taita Dios rurashcatapash, pai agllashca israelcunaman imatalla rurajushcatapashmi uyarca. Shinallata Mandaj Diosca, israelcunata Egiptomanda imashna llujchishcatapashmi uyarca.

2Moisespaj suedro taita Jetroca, Moisespaj huarmi Seforata, paipaj taita Jetropajman Moisés cachashca cajpimi, aliguta chasquirca.

3Moisespaj ishcai churicunatapashmi chasquirca. Shujtaca: “Na rijsishca llactamanda shamushcami causajuni” nishpami, Gersón shutita shutichishca carca.

4Caishujtaca: “Ñuca taitapaj Taita Diosmi ayudahuarca. Faraón espadahuan huañuchinamandapashmi quishpichihuarca” nishpami, Eliezer shutita shutichishca carca.

5Moisespaj suedro taita Jetroca, Moisespaj churicunandi, huarmindi, Moisespajman shamurca. Moisesca, jichushca pambapimi, Mandaj Diospaj urcu ladollapi carpata shayachishpa tiajurca.

6Chaipimi Moisestaca, cashna nirca:

—Ñucaca, cambaj suedro Jetromi cani. Cambaj huarmindi, cambaj ishcandi churicunandimi, cambajman shamuni— nircami.

7Moisesca, paipaj suedrota chasquingapaj llujshishpami, urai cumurishca jipaca mucharca. Caishujmanda, chaishujmanda alillachu cangui ninajushca jipami, carpaman shamunajurca.

8Moisesca, Mandaj Dios israelcunata juyaimanda Faraondapash, Egiptopi causajcunatapash, tucui imatalla rurashcatami, paipaj suedroman parlajurca. Ñanda shamunajushpa tucui llaquicunata charishcatapash, Mandaj Dios imashna paicunata quishpichishcatapashmi parlajurca.

9Taita Jetroca, Mandaj Dios israelcunaman tucui alicunata rurashpa, Egiptopi causajcunapaj maquimanda cacharichishcata yachashpami, cushijurca.

10Shinamandami taita Jetroca, cashna nijurca:

—Mandaj Diosca, aligumari cangui ni tucushca cachun. Paimi cangunataca, Egiptopi causajcunapaj maquimandapash, Faraonbaj maquimandapash cacharichishca. Israelcunataca, Egiptopi causajcunapaj maquimandami cacharichishca.

11Cunanga Mandaj Diosca, tucui dioscunatapash ashtahuan yali ninan ushaita charijtami yachani. Jariyashpa jatun tucujcunahuan macanajushpa mishashcamandami, chashna yachani— nijurcami.

12Shina nishpami, Moisespaj suedro taita Jetroca, tucuillata rupachina animalcunatapash, Diosman cushpa huañuchina animalcunatapash japishpa, Taita Diosman cushpa rupachirca. Chaimanmi Aaronbash, israelcunata mandaj tucui rucucunapash, Moisespaj suedrohuan, Taita Diospaj ñaupajpi micungapaj shamunajurca.

Juezcunata churashcatami villajun(Deut. 1:9-18)

13Cayandi punllami, cashna tucurca: Moisesca, israelcuna llaquicunata rurashcata alichingapajmi tiarirca. Israelcunaca, Moisespaj ñaupajpimi tutamandata callarishpa, chishicaman shuyanajurca.

14Moisespaj suedroca, israelcunahuan tucui imatalla Moisés rurajujta ricushpami, cashna nirca:

—Cai gentecunahuanga, ¿canga imatata rurangui? ¿Imashpata canlla tiaringui? ¿Imashpata tucuilla gentecunaca, tutamandata callarishpa, chishicaman cambaj ñaupajpi shuyanajun— nircami.

15Shina nijpimi Moisesca, paipaj suedroman cashna nishpa tigrachijurca:

—Gentecunaca, ñucapajmanmi Taita Dios ima nishcata tapungapaj shamun.

16Paicuna ima llaquita charishpapash, ñucapajmanmi shamun. Shina shamujpimi caishujtapash, chaishujtapash imata rurashcata ricushpa alichijuni. Chaipimi, Taita Dios mandashcacunata, mandashca shimicunatapash villajuni— nircami.

17Shina nijpimi Moisespaj suedroca, cashna nijurca:

—Can chashna rurajushcacunaca, na alichu.

18Cambash, canhuan shayanajuj cai gentecunapash, ninandami shaijunguichi. Canlla ruranaca, ninan shinllimi. Canlla chashna ruraitaca, na ushanguichu.

19Cunanga, ñuca imata nishcata uyahuai. Ñucami, canman ali yuyaita cugrini. Taita Diospash canhuanmi canga. Cambash, gentecunamandaca Taita Diospaj ñaupajpimi cangui. Canga, chai tucui ruranacunataca, Taita Diosman villai.

20Mandashcacunatapash, mandashca shimicunatapash paicunaman yachachi. Maita purina ñandapash paicunaman ricuchi. Shinallata paicuna imata rurana cajtapash yachachi.

21Chai jahuapash canga, tucuilla gente puracunamandaca, alitalla ruraj jaricunata, Taita Diosta manllajcunata, na llullajcunata, charijyanatalla munanatapash millanayachij runacunata agllai. Paicunataca, huaranga runacunata, patsaj runacunata, picha chunga runacunata, chunga runacunata mandachun churai.

22Paicunami gentecunataca, imata rurashcatapash punllandi ricushpa alichinajunga. Na alichi ushanalla tucui llaquicunatallami, cambajman apamunajunga. Alichi ushanalla llaquicunataca, paicunallata ricushpami alichinajunga. Chashna paicunapash alichishpa ayudanajujpimi, canga samangui.

23Can chashna rurashpaca, Taita Dios mandashcatapash rurangapaj canga shinlli tucui ushanguimi. Shinallata cai tucuilla gentecunapash, casilla aligutami paicunapaj huasicunaman rinajunga— nijurcami.

24Moisesca, paipaj suedro imatalla nijta uyashpami, tucui ima nishcata rurarca.

25Moisesca, alitalla ruraj jaricunata, tucuilla Israel puracunamanda agllashpami, israelcunata mandachun churarca. Huaranga runacunata, patsaj runacunata, picha chunga runacunata, chunga runacunata mandachunmi churarca.

26Paicunami, israelcuna ima llaquita charijpipash, punllandi ricushpa alichinajurca. Na alichi ushanalla llaquicunataca, Moisesmanmi apamunajurca. Alichi ushanalla tucui llaquicunataca, paicunami ricushpa alichinajurca.

27Moisesca, paipaj suedrota cayacaman nishpa cachajpimi, paipaj llactaman rirca.