Psalms 75 - Quichua Imbabura Bible

Taita Diosca, nali runataca llaquichishpami, imatapash cashcatapacha rurajtaca jatumbi churanAma tucuchihuaichu nishpa candana tonopi, candajcunata mandaj candachijuchun, Asaf shuti runa rurashca candana Salmomi.

1Taita Dioslla, candami pashi ninchi,

candaca pashi nipanchimi.

Cambaj shutica ladollapimi.

Runacunaca, juyaillata can

rurashcacunatami villanajun.

2Ima huatapi rurangapaj ñuca agllashpaca,

aligutapacha rurashpami mandasha.

3Cai pachaca, paipi causajcunandimi huaglirca.

Shina cajpipash ñucami, pilarcunataca charijuni. Selah

4Juizu illajcunataca: “Na yanga

alicachirinachu canguichi” nircanimi.

Diosta na manllajcunatapash:

“Na jariyanachu canguichi” nircanimi.

5Canguna ushaita charishcataca,

na jariyashpa ricuchinachu canguichi.

Na jariyashcata shayarishpa rimanachu canguichi.

6Jatun tucunaca, indi llujshimuj ladomanda,

indi huashajuj ladomanda,

jichushca pambamandaca na shamunllu.

7Ashtahuangarin Taita Diosmi juez.

Paimi shujtaca pingaichin, shujtaca jatunyachin.

8Mandaj Diosca, fucushca jayaj vinotaca,

paipaj copa jundatami charijun.

Chai vinoca, tucuihuan chapushca jayajyashcami.

Chai vinota pai talijpimi, cai pachapi

Diosta na manllashpa causajcunaca,

tucuringacaman ninanda ufianajunga.

9Ashtahuangarin ñucaca, Jacobopaj Taita

Diosmandami tucui causaipi villajushalla.

Paitaca, alicachishpa candajushallami.

10Juchatalla rurajcuna mandanataca,

faquinshna tucuchishami.

Ashtahuangarin imatapash cashcatapacha rurajpaj

mandanaca, jatunyachi tucushcami canga.