PROVERBIOS 31 - Quichua Imbabura Bible

Jatun mandajman aliguta yarichishcami

1Jatun mandaj Lemuel shuti runa rimashca shimicunami. Dios villashcata paipaj mama paiman yachachishca shimicunami.

2Ñuca huahualla, ñuca vijsamanda

llujshishca ñuca huahualla.

Ñuca ninanda munashca huahualla, ¿imatata rurajungui?

3Ama cambaj ushaita, huarmicunahuan tucuchinguichu.

Jatun mandajcunata tucuchij ñambica, ama causanguichu.

4Lemuel, machanaca na jatun mandajcunapajchu.

Vinoca, na jatun mandajcunapajchu.

Mandajcunaca, sidrataca na ufianllu.

5Chaicunata ufiashpara, mandashca

shimicunata cunganajunman.

Llaquichi tucushpa causajcunaman alita

ruranatara huaglichinajunman.

6Sidrataca, ña huañugrijunshna causaj runa

ufiachun cuichilla.

Vinotapash, llaquirishpalla causajcuna ufiachun cuichilla.

7Chaita ufiashpami imagupash illaj cashcatapash,

llaquita apanajushcatapash na ashtahuan yaringa.

8Na rimai ushajcunamandapash rimapairi.

Imatapash na rurai ushajcunata juchachishpa

llaquichigrinajujpipash mitsapairi.

9Cambaj shimihuanga, imatapash

cashcatapacha rimashpa mandapairi.

Imagutapash na charij, imagupash illaj

runacunamanda shayarishpa mitsapairi.

Tucuipi ali huarmiguta alicachij shimicunami

10Tucuipi ali huarmigutaca, ¿pita tari ushangayari?

Shina ali huarmiguca, punchapamba

juyailla rumicunatapash yalipachami.

11Paipaj cusapash, tucui shungumi paita yariashpa causan.

Paihuanga, imagupash na illaj causanllu.

12Chai huarmiguca, llaquichingapaj randica,

alitallami paipaj tucui causaipi rurashpa causan.

13Milmata, linota mascashpa randishpami, paipaj

maquihuanga tucui munaihuan imagutapash ruran.

14Jatun barco jatunahuan shamunshnami,

micunaguta apamushpa carumanda chayamun.

15Narapash pacarijpillata ucha jatarishpami,

paipaj tucuilla familiaman micunaguta caran.

Shinallata paita servij huarmicuna micuchumbashmi caran.

16Ali alpaguta ricushpa randishpami,

chai alpapica paipaj maquihuambacha

uvasta tarpushpa, ali chagraguta ruran.

17Paica, shinlli chumbilishcami purijun.

Paipaj rigrahuambash, shinllipachami imagutapash ruran.

18Randishcapash, jatunapash ali llujshichunmi ricuriajun.

Paipaj lamparapash, tutacaman rupajunllami.

19Shuj maquihuanga puchata, caishuj

maquihuanga tornota muyuchishpa puchajunllami.

20Imagutapash na charij, imagupash illajcunamambash,

maquita chutashpami, imagutapash caran.

21Rasujujpi, paipaj familiacuna chirichinatapash na manllanllu.

Paipaj tucui familiacunapash, racu churajunata

churajushca purinajujpimi na manllan.

22Jatanacunatapash, paillatami ahuan.

Paipaj churajunapash, ashtahuan ali linota

ahuashca, yana puca churajunami.

23Llactata mandaj rucucunahuan,

pueblo pungupi tandanajushpa paipaj

cusa tiarijpica, tucuicunami rijsin.

24Baitacunata ahuashpami jatujun.

Jatushpa randishpa purijcunamambash, chumbicunatami jatujun.

25Paipaca ushaita charinapash, alicachi tucunapash

juyailla churajunaguta churajushcashnami.

Jipa punlla ima tucunatapash, asinshna na manllanllu.

26Paica, alipacha yachajushca cashpami, imagutapash riman.

Llaquishpa causanatami yachachishpa mandan.

27Huasipica, imagupash ali cachunmi ricuriajun.

Paica, na yanga micushpalla causanllu.

28Paipaj huahuacuna jatarishpapash,

cushijushcami cangui ninajunmi.

Cusapash, cashna nishpami alicachijun:

29“Tauca huarmicunami, alita ruranajun.

Ashtahuangarin canmi, tucui paicunata yali cangui” nijunmi.

30Juyailla ñavi cashpapash umachinllami.

Juyaillagu cashpapash yangallami.

Ashtahuangarin Mandaj Diosta manllaj huarmimari, alicachi tucunga.

31Paipaj maquihuan imatalla rurashcamandaca,

paimambash ima aligutapash cunguichiyari.

Pai imatalla rurashcamandaca,

pueblo pungupipash alicachinguichiyari.