JEREMÍAS 11 - Quichua Imbabura Bible

Dioshuan ari ninajushcatami huaglichishca

1Mandaj Diosca, cai shimicunatami Jeremiasman cashna nishpa villarca:

2“Ñucahuan ari ninajushca shimicunata uyaichi. Cai shimicunataca, Judá llactapi tucui causajcunamambash, Jerusalenbi tucui causajcunamambash villaichi.

3Can Jeremiasca, cashna ni: Israelcunata Mandaj Taita Diosca, cashnami nin: ‘Ñucahuan ari ninajushca cai shimicunata na cazuj runaca, ninanda nalicachi tucushcami canga.

4Cangunapaj ñaupa taitacunata Egipto llactamanda llujchimujui punllami, cai shimicunataca mandarcani. Jirruta yacuyachina jornomandashna llujchimushpami, paicunataca cashna nircani: Ñuca rimashcacunata uyanguichi. Tucui imatalla ñuca mandashca shimicunataca, ñuca mandashcashnallata pactachishpa causanguichi. Shina causashpaca, ñuca agllashcacunami canguichi, ñucapash cangunapaj Taita Diosmi casha.

5Lechepash, balun mishquipash, ashtacapacha tiaj llactata carashami nishpa, cangunapaj ñaupa taitacunaman juramentushcataca pactachishapachami nircanimi. Cunan punllacunaca, chai llactapimi causanajunguichi’ nishpa villai” nihuarcami. Shina nijpica: “Mandaj Dioslla, chashna cachun” nircanimi.

6Shina nijpimi Mandaj Diosca, cashna nihuarca: “Cai tucui shimicunataca, Judá llactapi tiaj pueblocunapipash, Jerusalén ñangunapipash, cashna villagri: ‘Dioshuan ari ninajushca cai shimicunata uyashpa, chaita rurashpa causaichi.

7Cangunapaj ñaupa taitacunata, Egipto llactamanda vichai pushamushca punllamandapachami: Ñuca mandashcata uyaichi nishpa, shinlli tacurishpa yarichijurcanilla. Cai tucui huatacunata na upalla saquishpami, cunangaman chashnallata yarichijunilla.

8Shina yarichijujpipash, rinrita mañachishpallapash na uyarcachu. Ashtahuangarin paicunapaj shungupi nalita yarishcatallami tucuicuna catinajurca. Chaimandami, ñucahuan ari ninajushca shimicunapi tiajuj tucui llaquicunataca, paicunapaj jahuapi cachamurcani. Chai shimicunataca pactachinajuchun mandajpipash, na pactachircachu’ nishpa villai” nihuarcami.

9Mandaj Diosca, cashnatapashmi nihuarca: “Judá llactapi, Jerusalenbi causajcunaca ñucata llaquichingapaj, pacalla parlarinajujtami ricurcani.

10Ashtahuangarin paicunapaj ñaupa taitacuna nalita rurashcashnallatami, ñuca rimashcata na cazushpa, shuj dioscunatara catishpa servinajurca. Shinamandami israelcunapash, Judá llactapi causajcunapash, paicunapaj ñaupa taitacunahuan ari ninajushcata yangapi churanajurca” nihuarcami.

11Chaimandami Mandaj Diosca, cashnatapash nin: “Ricuichi, na llujshi ushanalla ninan llaquitami, paicunaman apamugrini. Chai llaquita apanajushpa ñucata caparishpa mañanajujpipash, napacha uyashachu.

12Chaipimi, Judá llacta pueblocunapi causajcunapash, Jerusalenbi causajcunapash, paicunapaj dioscunata caparishpa mañagrinajunga. Chai dioscunamanmi, inciensota carashpa cushnichinajun. Chai dioscunaca, paicuna llaquita apajui punllapica, na quishpichi ushangachu.

13Judá llactapi mashna pueblocuna tiashcashnallatami, cangunapaj dioscunatapash charinguichi. Jerusalenbi mashna ñanguna tiashcashnallami, Baal shuti dioscunaman inciensota carashpa cushnichingapaj, chai millanayai altarcunata shayachircanguichi.

14Canga, cai gentecunamandaca ama mañahuaichu. Paicunamandaca, ama caparishpa ñucata mañahuaichu. Ñucaca, paicuna llaquipi cashpa caparishpa, ñucata mañanajui punllapica, na uyashachu.

15Cai tucui millanayaicunata rurashca jahuapash, ñuca juyashca huarmica, ¿ñuca huasipica ima japinatata charingui? ¿Diosman animalcunata carashpa huañuchijpi, Diospajlla cachun animalcunapaj aichacunata shicanyachijpica, chai llaquimandaca quishpichingallami yanguichu? ¿Chaita carashpaca, cushijushami yajunguichu?

16Mandaj Dios ñucaca, candaca: ‘Juyailla fucuj, juyaillaguta ricurijuj olivos yuragumi cangui’ nijmi carcani. Shina cashpapash, shinllita culun nichishpa ninata japichishpa fangacunata rupachijpimi, yura malquicunaca faquirirca.

17Canda tarpuj tucuita Mandaj Diosmi, candaca llaquichishapacha nini. Israelcunapash, Judá llactapi causajcunapash, Baal shuti diosman inciensota carashpa cushnichishpa, nalita ruranajushpa ñucata fiñachishcamandami, chashna ruragrini” ninmi.

Jeremiastaca huañuchingapajmi munashca

18Ñucata huañuchingapaj yarinajushcataca, Mandaj Dios ricuchijpimi yacharcani. Canmi, paicuna imata rurangapaj munanajushcataca ricuchihuarcangui.

19Ñucaca, cungata muchungapaj apajpi, imatapash na yachaj llamagushnami carcani. Chaimandami, ñucata huañuchingapaj nalita yarinajujtaca, na yacharcani. Ñucataca, cashnami ninajushca carca: “Ali fucuj yurataca, cuchushpa tucuchishpa, cai pachapi causanajuj puramanda anchuchishunchi. Paipaj shutitaca, paitaca pipash ama ashtahuan yarinajuchun, chashna rurashunchi” ninajushcami carca.

20Shina cajpipash, tucuita Mandaj Dioslla. Canga, imatapash cashcatapacha rurashpa llaquichijmi cangui. Tucui gentecunapaj yuyaita, shungupi imatalla yarijujta callarishpa aligutapacha ricujujmi cangui. Ñucata cashna llaquichingapaj munanajushcamandami, cambaj maquipi mingarircani. Ñucamanda paicunata can llaquichishcatami ricungapaj munapani.

21Chaimandami, Mandaj Diosca cashna nin: “Canda huañuchingapaj munaj, Anatot shuti pueblopi causanajuj runacunamandami rimarcani. Paicunaca cashnami ninajurca: ‘Mandaj Diospaj shutipica ama ashtahuan villaichu, na cashpaca ñucanchi maquipimi huañungui’ ninajurcami” ninmi.

22Chaimandami tucuita Mandaj Diosca, cashnatapash nirca: “Ricui ñucami, paicunataca llaquichigrini. Chairalla viñaicunaca, espadapimi huañunga. Paicunapaj churicunapash, ushicunapash, yarjaimandami huañunajunga.

23Paicuna puramandaca, huaquinllapash na causaj puchungachu. Anatot shuti pueblopi causanajuj runacunamanmi, ninanda llaquichina huatata ñucallata apamugrini” nircami.