APOCALIPSIS 14 - Quichua Imbabura Bible

144,000 candanajushcami

1Chaita ricushca jipami, Sion shuti urcu jahuapi Llama shayajujta ñapash ricurcani. Paihuanga, patsaj chuscu chunga chuscu huaranga gentecunami chaipi carca. Paicunaca, maltun Llamapaj shutita, paipaj Taitapaj shutitapash, frentepi escribishcami carca.

2Chai jipallami, jahua pachamandaca ashtaca yacu huaj nijunshna, ninanda culun nijunshnapash rimaj uyarimurca. Chai rimaj uyarijujca, arpata tocajcuna tocanajunshnami uyarimurca.

3Paicunaca, mandangapaj tiarinapaj ñaupajpi, chuscu animalcunapaj ñaupajpi, rucucunapaj ñaupajpimi, shuj mushuj candanata candanajurca. Chai candotaca, pipash na yachajui ushashcachu carca. Cai pachamanda, patsaj chuscu chunga huaranga quishpichi tucushcacunallami, yachajui usharca.

4Paicunaca, huarmicunapi na tacarishca, na mapayashcacunami. Llama maita rijpipash, paita catishpami purin. Paicunaca, tucui gente puracunamanda quishpichishca cashpa, Taita Diosmambash, Llamamambash punda carai tucushcacunami.

5Paicunapaj shimipica, ima llullapash na tianllu. Ima nalitapash na rurashca cashpami, Taita Dios mandangapaj tiarina ñaupajpi tianajun.

Quimsa angelcunami villashca

6Chai jipallami, jahua pacha chaupita cutin shuj ángel rijujta ricurcani. Chai angelca, cai pachapi causajcuna, tucui llactacunapi causajcuna, aillucuna, shuj rimaita parlajcuna, shuj shuj gentecunapash, causaita causaicaman quishpirichun villajungapajmi shamushca carca.

7Chai angelmi, cashna nishpa ninanda caparijurca: “Taita Diosta manllashpami, punchapambagumi cangui nina canguichi. Pai llaquichina punllacunami ña pactamushca. Chaimandami, jahua pachata, cai pachata, mama cuchata, pugyu yacucunata ruraj Diostaca, ninanda alicachina canguichi” nircami.

8Chai angelta cutin shuj ángel catishpami, cashna nirca: “Babilonia shuti jatun puebloca, ñamari urmashca, ñamari urmashca. Paica, tucui llactacunapi causajcunahuan vinota ufiachinshna ninandapacha huainayashcamandami, chashna tucurishca” nircami.

9Chai ishcaipaj cati angelca, cashna nishpami ninanda caparijurca: “Chai manllanayai animalta, paiman rijchajta rurashcatapash ninanda alicachijcunaca, shuj ricuchinatami frentepi cashpa, na cashpaca maquipi cashpapash japinga.

10Paicunaca, Taita Dios ninanda fiñashpa cachamushca llaquitami, vinota ufianshna apanajunga. Diosllatami, pai ninanda fiñarishpa, imahuambash na chapushca vinota copapi talinshna, llaquita cachamushca. Paicunaca, Diospajlla angelcunapaj ñaupajpi, maltun Llamapaj ñaupajpimi, azufrehuan rupajuj ninahuan ninanda llaquichi tucunajunga.

11Chai llaquichi tucunajuj ucumanda cushnica, causaita causaicamanmi llujshijunga. Chai manllanayai animalta, shinallata paiman rijchaj animalta rurashcata ninanda alicachijcunapash, chai animalpaj shutita ricuchinata churai tucushcacunami canga. Shina churashcacunami tutapash, punllapash na samashpa, ninanda llaquichi tucunajunga.

12Shinamandami, paipajlla causajcunaca Taita Dios mandashca shimicunata cazushpa, na ñapash fiñarishpa, Jesusta aligutapacha crishpa causanajun” nijurcami.

13Chai jipallami ñucataca, jahua pachamanda cashna nijujta uyarcani: “Cashna nijujtaca escribingui: ‘Apunchi Jesusta crij huañujcunaca, cunanmandapacha ninanda cushijunguichi’. Ari, Diospaj Epiritupash cashnami nijun: ‘Paicuna imatalla rurashcamandapash samangami. Imatalla paicuna rurashcapash, paicunahuanllatami canga’ nijunmi” nihuarcami.

Cai pachapi causajcunataca, granotashnami tandachishca

14Ricujushpallatami, ñapash shuj yuraj fuyuta ricurcani. Chai fuyu jahuapimi, Runa Aichayu tucushcaman rijchaj tiajurca. Paica oro coronata umapi churajushca, maquipipash, filo filo hocesta chaririajmi carca.

15Shinallata Diospaj huasimanda shuj ángel llujshimushpaca, chai fuyu jahuapi tiajujtami, cashna nishpa ninanda caparirca: “Hoceshuan cuchushpa tandachilla. Cozechana punllapash ñami pactamushca. Cai pachapi tiaj granocunaca, ñami fucushca” nircami.

16Shina nijpimi, chai fuyu jahuapi tiajujca, cai pachapi fucushcataca, paipaj hoceshuan cuchujpi, cai pachaca cozechai tucurca.

17Shinallata jahua pachapi tiajuj Diospaj huasimandami, shuj angelpash llujshimurca. Chai angelca, filo filo hocestami charijurca.

18Shinallata ninata mandangapaj ushaita charij shuj angelpash, altar ucumanda llujshimushpami, chai filo filo hocesta charijuj angeltaca, cashna nishpa ninanda caparirca: “Cai pachapi fucushca uvastaca, cambaj filo filo hoceshuan cuchushpa tandachilla. Uvasca ñamari fucushca” nircami.

19Shina nijpimi chai angelca, paipaj hocestaca cai pachaman shitamurca. Chaihuanmi, cai pachapi fucushca uvastaca tandachirca. Chai uvastaca, uvasta cutana pushtupimi churarca. Chaitaca, Taita Dios ninanda fiñashpa llaquichijujtami ricuchijun.

20Chai uvastaca, pueblomanda shuj ladomanmi, uvasta cutana pushtupi sarunajurca. Chai cutana pushtumanda yahuar llujshishpaca, quimsa patsaj kilometrocaman yacu rijunshnami, caballocunapaj shimi altocaman jundajurca.