Psalms 104 - Quichua Imbabura Bible

Taita Diosmi, pai rurashcataca cuidajun

1Ñuca almalla, Mandaj Diosta alicachiyari.

Ñucata Mandaj Taita Dioslla, canga

ninanda jatunyachi tucushcamari capangui.

Canga punchapamba, juyaillagutapacha

churajushcami tiajungui.

2Paica michahuanmi, churajunahuanshna quilparishca.

Jahua pachataca, telatashnami mandashca.

3Pai causana ucucunataca, yacu chaupipimi churashca.

Paica fuyutami, paipaj carreta cachun ruran.

Paica, huairapaj alaspimi purijun.

4Paica, huairatami paimanda villajuchun churan.

Nina rupajujtami, paipajta rurachun churan.

5Paimi, cai pachataca callari

rumicunapaj jahuapi churarca.

Shinamandami, ima horapash na anchuringa.

6Cai pachataca, manllanayai ucu ucu

yacuhuanmi, churajunahuanshna quilparcangui.

Urcu jahuacunapimi, yacucunaca tiajurca.

7Can rimajpica anchurircallami.

Can culun nijta uyashpaca, uchami anchurinajurca.

8Lomacunata yalishpami, pugru

pambacunaman urai rijurca.

Can churashca pushtumanllatami rijurca.

9Maicamanlla tiachun can

churashcamandaca, na yalingachu.

Na cutinga, alpatapash quilpangachu.

10Canmi, pugyucunamanda yacutapash,

jatun larca yacucunaman cachajungui.

Chai yacucunaca, urcu chaupicunatami rijun.

11Chai yacucunatami, pambapi

tiaj tucui animalcuna ufianajun.

Sacha burrocuna yacunayachishpaca,

chai yacuta ufiashpami yacunayaita yalichinajun.

12Chai yacu manñacunapica, jahuata rij

alasyu animalcunami causanajun.

Yura malqui ucucunapimi candanajun.

13Paimi, urcucunapica pai causaj

ucucunamandapacha yacuta jichajun.

Cai pachapi causajcunaca, can

fucuchishcacunatami na munangacaman micunajun.

14Paimi, animalcunamambash jihuata viñachin.

Gentecunapaj ali cachun jihuatapashmi,

alpapica viñachin.

Chaicunamandami, cai alpapi micunataca llujchin.

15Gentecunapaj shungupi cushichij vinotapash,

ñavita punchayachij aceitetapash,

runa micushpa causana micunatapashmi llujchin.

16Líbano shuti urcupi tarpushca, Mandaj

Diospaj cedro quirucunaca,

yacusapa verde verde quirucunami.

17Chai quirucunapimi, alasyu animalcunaca

tazinda rurashpa causan.

Haya nishca quirucunapica, cig:ueña nishca animalmi,

tazinda rurashpa causan.

18Jatun urcucunaca, sacha chivocuna causanami.

Rumi jaca utujucunaca, conejocuna causanami.

19Lunataca, quillacunata ricuchijuchun rurashcami.

Inditaca, ima horas huashajunata

rijsinatami rurashca.

20Yana yana tutata can churajpimi, tutapash tucun.

Tutayashcapimi, tucuilla sacha

animalcunaca calparianajun.

21Maltun leongunaca, imatapash japishpa

micungapajmi, huacashpa catinajun.

Paicunaman Taita Dios micunata carachunmi mascagrin.

22Indi llujshijpica, tandanajushpami

paicuna causaj jatun utujucunapi siririgrin.

23Shinallata runacunaca, imatallapash rurangapaj,

chishangacaman alpapi trabajangapajmi llujshin.

24¡Mandaj Dioslla, can rurashcacunaca,

na cuentai ushanallamari!

Tucui chaicunataca, cambaj ali yachaihuanmi rurashcangui.

Cai pachaca, can carashca alicunahuan jundami.

25Ricui, cai jatun mama cuchapipash,

na cuentai ushanalla animalcunami causan.

Uchilla animalcunapash, jatun

animalcunapashmi chaipi causan.

26Chai yacupimi, jatun barcocunapash purinajun.

Chai yacupi pugllachun, can rurashca leviatán

nishca animalpash, chaipimi causan.

27Chai animalcunaca, micuna horaspi

micunata can carachunmi, tucuilla shuyanajun.

28Can paicunaman carajpimi tandachinajun.

Can maquita pascashpa carajpimi,

ima alicunatapash na ushangacaman micunajun.

29Cambaj ñavita pacajpica, musparishpa pandarinllami.

Can samaita anchuchijpica,

huañushpa alpallata tigranllami.

30Cambaj Espirituta cachamujpica, cutin miranllami.

Shina rurashpami, alpapi tiajtaca mushujyachingui.

31Mandaj Diospaj punchapambaguca,

causaita causaicaman cachun.

Mandaj Diosca, pai rurashcacunahuanga cushijupachun.

32Pai ricurijpica, alpaca chujchunmi.

Urcucunapi tacarijpica, cushninllami.

33Mandaj Diostami, ñuca causaipica candajusha.

Ñuca Taita Diosmanmi, Salmocunata

ñuca causajushcacaman candajusha.

34Paita ñuca alipacha yarijunaca, aligupachami.

Ñucaca, Mandaj Dioshuanmi ninandapacha cushijusha.

35Juchata rurajcunaca, cai pachamanda

chingachi tucushca cachun.

Jatun nalita rurajcunaca, tucurishca cachun.

Ñuca almalla, Mandaj Diosta alicachiyari.

Mandaj Diostami alicachina canguichi.