ECLESIASTÉS 10 - Quichua Imbabura Bible

Ali yachaica, tucuitapash yali alimi

1Chuspi huañushcacunaca, mishquillagu ashnajuj jambita ruraj runa rurashca jambitaca, millanayaitami ashnayachin. Alipacha yachajushca, ninanda alicachi tucushca runa, juizu illanshna imapi ashata pandashcapash, shinallatami yapa nali ricurin.

2Alipacha yachajushca runapaj shunguca, ali ladotami yarin. Ashtahuangarin shinlli shungu runapaj shunguca, lluqui ladotami yarin.

3Shinlli shungu runaca, ñanda purijushpapash, aliguta yarishpa causaj runashnaca na purinllu. Shinami shinlli shungu cashcataca, tucuicunaman ricuchijun.

4Mandajpaj yuyaipi ninanda fiñashpa canda llaquichijpipash, can imata rurashpa causajushcataca, ama saquishpa llujshinguichu. Ali shunguhuan causajcunaca, ninanda llaquichinatapash cungachingami.

5Ñucaca, indi punllayachijuj cai pachapica, shuj panda tiajtami ricurcani: Chai pandataca, mandajllata rurashpa callarichinshnami.

6Shinlli shungucunarami, ashtahuan alipi tianajun. Ashtahuangarin charijcunarami, yangallacunapi tianajun.

7Servijcunaca, caballopi tiarishpa purinajujta mandajcunaca, servijcunashna chaquilla purinajujtami ricurcani.

8Utujuta ruraj runaca, chai utujupillatami urmanga. Jarcashca pircata urmachijuj runataca, culebra llujshishpami caninga.

9Rumicunata faquishpa alichijuj runaca, chaicunahuanllata chugrinllami. Yamdata chijtajuj runapash, chaihuanllata imapash tucunallami.

10Jirru filo tucurijpi na cutin afilashca cajpica, imata cashpapash ashtahuan shinlli tucushpami rurana tucun. Ashtahuangarin ali yachaica, aliguta pushangapajmi ali.

11Nara muspayachijpillata culebra canijpica, muspayachij yumbupash yangami.

12Alipacha yachajushca runa rimashca shimicunaca, ali shimicunami. Ashtahuangarin shinlli shungu runa rimashca shimicunaca, paitallatami llaquipi churan.

13Paipaj shimihuan rimai callarishcallatami, shinlli shungu cajtaca ricuchin. Tucuchingapacarin musparishpa, ninan nalicunata rimashpami tucuchin.

14Jipa punllacuna ima tucunataca, pipash na yachajpitami, shinlli shungu runaca ninanda rimajunlla. Pai huañushca jipa ima tucunatacarin, ¿pita paiman villangayari?

15Shinlli shungu runacuna imatalla rurashcacunaca, shaijuchinllami. Puebloman maita rinatapash na yachaimandami, chashna tucun.

16Huambrara jatun mandaj mandajuj llactalla, ¡aij imachari tucungui! Can churashca mandajcunaca, tutamandallatami jatun micuihuan callarinajun.

17¡Alicachi tucushcacunapaj churi, jatun mandaj tucushpa mandajuj llactalla, ninanda cushijuyari! Can churashca mandajcunapash machangapaj randica, yarjai purinajushpa shinlli tucungapajllami micunajun.

18Imata rurangapajpash na munashpami, huasi tejacuna urmachumbash saquinlla. Chashna imata rurangapajpash na munaj cajpimi, tamiapash huasi ucuman yalin.

19Cushijuimandami, jatun micuitapash ruranajun. Causaj runacunataca, vinomi cushichin. Culquica tucuipajmi ali.

20Jatun mandajtaca yuyaipillapash, ama ima nalita rimanguichu. Charij runatapash, can puñuna ucupi canlla tiajushpapash, ama nalicachinguichu. Jahuata rij, alasyu animalcunami chai rimashca shimicunataca villagringa.