JOB 15 - Quichua Imbabura Bible

Elifaz shuti runami, Job runaguta jarcashpa rimashca

1Temanita nishca Elifaz shuti runaca, cashna nishpami tigrachirca:

2“¿Alipacha yachajushca runaca, imatapash yangata rimanllachu? ¿Paipaj vijsapipash, rupajlla huairatachu jundachin?

3¿Maijanhuambash rimarishpaca, yangalla shimicunatachu rimanman? ¿Napash imata yarichij shimicunatachu riman?

4Cambash, Diosta manllanata cunganguillami. Taita Diospaj ñaupajpi mañanatapash, yangapi churanguillami.

5Cambaj shimillatami, can nalita rurashcataca villarca. Canga, umachinata alipacha yachaj runacunapaj rimaitami agllashcangui.

6Cambaj shimillatami candaca, llaquipi churanga. Ñucaca, na llaquipi churashachu. Cambaj shimillatami, canda llaquichinata villanga.

7¿Canga, Adán runapaj pundachu huacharircangui? Na cashpaca, ¿urcucunata nara rurashpallatachu, candara rurarca?

8¿Canga, Taita Dios yarijushpa rimajta uyarcanguichu? ¿Canmanllachu ali yachaita cararca?

9Canga, ñucanchi na yachashcataca, ¿imatata yachangui? Canga, ñucanchi na yachashcataca ¿imatata entendingui?

10Ñucanchi purapica yuraj umacuna, alipacha rucu runacunami tian. Paicunaca, cambaj taita causashca punllacunata yalimi causan.

11Canman, Taita Dios cushijuita carashcatapash, ¿mishquilla shimicunahuan rimashcatapash, yangapipachachu churangui?

12¿Imashpata cambaj shunguca, paimanda caruyan? ¿Imashpata cambaj ñavitaca capitsijungui?

13¿Imapajta cambaj yuyaipica, Taita Dioshuan fiñarigui? ¿Imashpata shimi llujshishcata, chashna shimicunahuan rimangui?

14Runaca, mapa illaj cangapaca, ¿imatayari? Huarmimanda huacharishca runa, imatapash cashcatapacha rurashca ricuringapaca ¿imatayari?

15Ricui, paipajlla causajcunatapash napacha yariajlla causanllu. Jahua pachapash paipaj ricuipica, napacha mapa illajchu.

16Yacuta ufianshna nalitalla ruraj, millanayaita ruraj runacarin, ¿maitata ali ricuringayari?

17Ñuca villajujta uyahuayari. Ñuca ñavihuan ricushcatami, canman villasha.

18Alipacha yachajushcacuna, paicunapaj ñaupa taitacunamanda, na pacashpa ñucanchiman parlashcatami villagrini.

19Cai llactataca, chai taitacunamanllami cararca. Paicunapaj llacta chaupitaca, na rijsishca runacunaca, na yali usharcachu.

20Diosta na manllaj runaca, tucui paipaj causai punllacunami, paipaj nanaihuan llaquilla causajun. Llaquichij runa mashna huatata causanapash, pacashcami tiajun.

21Paipaj rinripica, manllanayaita culun nishcami uyarin. Pai tucuipi ali causajujpimi, tucuchij runa shamushpa tucuchinga.

22Paica, yana yana tutapi cashpa cutin tigramunataca, na crinllu. Paica, espadahuan huañui tucunallami causajun.

23Paica, micunata mascashpa, muyundita yanga purishpami: ‘¿Micunaca maipitayari?’ nishpa tapujun. Paiman alichishca yana yana tutaman rina punlla chayanatapash yachanmi.

24Llaquicunapash, huacaicunapashmi, paitaca muspachinga. Paita llaquichingapaca, jatun mandaj macanajungapaj alichirishcashnami shinllitapacha shamunga.

25Paillatami, Taita Diosta fiñashpa, maquita alsarca. Paillatami, Tucui Ushaita Charij Diosta jariyashpa jatun tucushpa causarca.

26Paica cungata chutashcami, Diosta llaquichingapaj calpajurca. Jarcarina ninan shinlli escudocunahuanmi calpajurca.

27Ñavi chingajtami virayarca. Paipaj vijsapash, huarcurimi carca.

28Paica, llaquinayaita tucuchi tucushca pueblocunapi, pipash na causajuj urmashca huasicunapimi causajurca.

29Paica, imapipash nali llujshingachu. Pai imatalla charishcacunapash, na unaicaman tiangachu. Pai juyailla cashcapash cai pachapica, maipipash na uyaringachu.

30Manllanayai yana yana tutapi cashpaca, na quishpiringachu. Ninami, paipaj malquicunatapash chaquichinga. Diospaj shimihuan fucujpimi, tucuringa.

31Umai tucushpa causajuj runaca, yangacunataca ama yariajlla causachun. Pai japina cashcataca, chaitallatami japinga.

32Paica, huañuna punlla nara pactajpillatami, huañunga. Paipaj retoñocunapash, na verdeyangachu.

33Pai jayaj cashcapash, uvas yurashnami chinganga. Paipaj sisacunapash, olivos sisashnami taliringa.

34Diosta na manllajcunapaj tandanajuipash, llaquinayaitami tucuchi tucunga. Imatapash pacalla cujpi charishca carpacunataca, ninami tucuchinga.

35Llaquicunatalla vijsayu tucushpami, nalita ruranatalla ungunajurca. Paicunaca, umachinata yariajllami causanajun” nijurcami.