1 CORINTIOS 6 - Quichua Imbabura Bible

Fiñanajushcataca, na crijcuna alichinajuchunga na villagrinachu

1Canguna puramanda maijan cashpapash, pihuambash fiñanajushca cashpaca, ¿cashna ruranatachu yachanguichi? Diospajlla causajcunapaj ñaupajpi alichingapaj randica, ¿imatapash cashcatapacha na rurajcunapaj ñaupajpi alichingapajchu ringuichi?

2Cai pachapi causajcunataca, Diospajlla causajcunami imata rurashcata ricushpa mandanajunga. Chaitaca, ¿nachu yachanguichi? Cai pachapi causajcunata canguna ricushpa mandana cashpaca, ¿imashpata asha fiñanajushcata alichitaca na ushanguichi?

3Angelcuna imata rurashcatapash, ricushpa ñucanchi mandana cashcataca, ¿nachu yachanguichi? Shina cashpaca, cai causaipi ima fiñanajui tiajtaca, ¿maitata na alichishunyari?

4Cai causaipi fiñanajuicuna tiajpica, ¿crij puracunapi na yapa alicachi tucushcacunamanrachu alichipai nishpa villagringuichi?

5Canguna pingai tucuchunmi, cashna nini: Crij puracuna fiñanajushcata alichingapaca, ¿nachu canguna purapillata ali yachaita charijcuna shujllapash tianguichi?

6Ashtahuangarin crij purallata fiñanajushcataca, ¿na crijcunaman villangapaj purijcunachu canguichi?

7Canguna purallata chashna fiñanajushpaca, nalitapachami ruranajunguichi. Chashna fiñanajunapaj randica, ¿imashpata na llaquita apanajunguichilla? Shinallata umachishpa quichushpa apajpipash, ¿imashpata na saquinguichilla?

8Ashtahuangarin cangunaca, crij purallata llaquichirishpa, umachishpa shuhuarishpami puringuichi.

9Imatapash cashcatapacha na rurashpa causajcunaca, Taita Dios mandajuj llactapica, imatapash na japigringachu. ¿Chaitaca nachu yachanguichi? Na pandanachu canguichi. Huainayajcuna, yanga dioscunata mañajcuna, cazarashca jahua shujhuan causajcuna, huarmicunashna causaj runacuna, jari purallata huarmihuanshna puñujcuna,

10shuhuacuna, charishpapash ashtahuan charijyangapaj munajcuna, machajcuna, ima llaquipash japishpami ali canman nijcuna, ñavi ñavi shuhuajcunapash, Taita Dios mandajuj llactapica, napacha imatapash japigringachu.

11Cangunapash pundaca, chashnallatami huaquingunaca causarcanguichi. Ashtahuangarin Apunchi Jesuspaj shutipi, ñucanchi Taita Diospaj Espiritumandapashmi, ña armashcacuna canguichi. Shinallata Diospajllami causanajunguichi, imatapash cashcatapacha rurashcatashna chasqui tucushcacunapashmi canguichi.

Cangunapaj cuerpohuan, Taita Diostaca alicachinami canguichi

12Tucui imatapash rurai ushanimi, ashtahuangarin napacha tucuilla alichu. Tucui imatapash rurai ushanimi, ashtahuangarin chaicunara ñucata mandashpa charichunga, napacha saquishachu.

13Micunaca vijsapajmi, vijsaca micunapajmi. Ashtahuangarin Taita Diosca, ishcanditami tucuchinga. Shina cajpipash ñucanchi cuerpotaca, huainayachunga na rurashcachu. Ashtahuangarin Apunchi Jesuspajlla causachunmi rurashca. Apunchi Jesusmi, ñucanchi cuerpotapash mandajun.

14Apunchi Jesusta causachij Taita Diosllatami, ñucanchitapash paipaj ushaihuan causachinga.

15Cangunapaj cuerpopash Cristopajllata cajtaca, ¿nachu yachanguichi? ¿Cristopaj cuerpomanda anchuchishpa apashpachu, culquimanda huainayaj huarmipaj cuerpohuan shujllata rurana cani? Napacha chashnachu.

16Maijan cashpapash, culquimanda huainayaj huarmihuan shujlla tucushpaca, paihuanmi shujlla cuerpo tucun. Chaitaca, ¿nachu yachanguichi? Escribishcapica: “Ishcandimi, shujlla aicha tucunga” nijunmi.

17Ashtahuangarin Apunchi Jesushuan maijambash shujlla tucushpaca, shujlla espiritumi paihuanga causajun.

18Huainayamandaca anchurichi. Maijan cashpapash ima shuj juchata rurajpica, paipaj cuerpopica na tacarinllu. Ashtahuangarin pipash huainayashpaca, paipaj cuerpotallata fiñashpami, chashna ruran.

19Cangunapaj cuerpoca, jucha illaj Taita Diospaj Espíritu causajuj huasishna cajtaca, ¿nachu yachanguichi? Chai Espirituca, cangunapaj shungupimi causajun. Chai Espiritutaca, Taita Dios carajpimi charinguichi. Shinamandami, na cangunapajllata causanguichi.

20Cangunaca, ninan valishcapaj randi tucushcami canguichi. Shina cajpimi cangunapaj cuerpohuan, espirituhuambash, Taita Diosta alicachina canguichi. Cuerpopash, espiritupash, Taita Diospajmi.