1Cashnami nihuarca: “Huañuna aichayu runa, jatarishpa shayari. Canhuanmi parlangapaj munani” nihuarcami.
2Shina nishca jipami, Diospaj Espirituca ñuca shunguman shamushpa, shinllitapacha shayachihuarca. Chaipimi, ñucaman parlajta uyarcani.
3Cashnatapashmi nihuarca: “Huañuna aichayu runa. Ñucami candaca, israelcunapajman cachani. Paicunaca, ñucata na cazushpami jariyanajurca. Paicunapash, paicunapaj taitacunapash, cunan punllacunacamanmi na cazushpa causanajun.
4Ñucami, candaca fiña ñavi, shinlli shungu runacunapajman cachajuni. ‘Mandaj Jatun Diosca, cashnami nin’ nishpa, paicunaman villangui.
5Paicunaca napash uyangapaj munangachu. Na cazuj miraicuna cashcamanda na uyanayachishpaca, paicuna purapi ñucamanda shuj villaj tiashcataca, tucui causaipimi yachanga.
6Huañuna aichayu runa, paicunataca ama manllanguichu. Paicuna rimajpipash, ama manllanguichu. Zarza casha yura chaupicunapi cashpapash, shuj casha chaupicunapi cashpapash, alacrangunapaj chaupipi causajushpapash, ama manllanguichu. Paicuna rimajpipash, paicunapaj ñaupajpi cashpapash na manllanachu cangui. Paicunaca na cazujcunami.
7Paicuna uyachun, ama uyachumbash ñuca shimicunataca villajunguilla. Paicunaca, yapa na cazujcunami.
8Huañuna aichayu runa, ashtahuangarin canga ñuca ima nishcata uyahuai. Cambash, chai na cazujcunashnaca ama caichu. Ñuca imata carashcatapash, shimita pascashpa micuilla” nihuarcami.
9Shina nishpaca, ñuca ñaupajman maquita ñapash chutamujtami ricurcani. Chai maquipica, carapi escribishpa pillushcatami charijurca.
10Chai carataca, ñuca ñaupajpimi pascarca. Chaipica ñaupajmambash, huashamambash escribishcami carca. Chaipica, yarishpa yarishpa huacana shimicunata, llaquihuan cashpa candanacunata, aij nishca shimicunatami escribishca carca.
Who We AreWhat We EelieveWhat We Do
2025 by iamachristian.org,Inc All rights reserved.
