LEVÍTICO 20 - Quichua Imbabura Bible

Jatun nalita rurajcunata imashna llaquichinatami villajun

1Mandaj Diosca, Moisestaca cashnami nijurca:

2“Israelcunamambash, cashna nishpa villangui: ‘Israel puramanda maijan runa cashpapash, shuj llactamanda shamushpa Israel llactapi causajuj maijan runa cashpapash, paipaj huahua puramanda shuj huahuata Moloc shuti diosman carashpaca, huañungapachami. Paicunataca llactapura gentecunallatami, rumicunahuan huañuchinajunga.

3Shinamandami, chai runataca ninanda fiñashpa ricushpa, Israel puramandaca anchuchisha. Moloc shuti diosman, paipaj huahuata carashpa, ñucapajlla huasita mapayachishcamanda, shinallata jucha illaj ñuca shutita yangapi churashcamandami, chashna anchuchisha.

4Moloc shuti diosman huahuata carashca runata ama huañuchingapajmi, cai llactapi causaj gentecunaca, ñavita vichanshna tucunga.

5Shina rurajpimi ñucaca, chai runatapash, paipaj familiatapash ninanda fiñashpa ricushpa, Israel puramanda anchuchisha. Shinallata chai runata catishpa nalita rurashpa, Moloc shuti dioshuan tucui huainayajcunatapashmi anchuchisha.

6Shinallata yumbucunata, na cashpaca yachajcunata uyashpa, paicunata catishpa, huainayajcunataca ninanda fiñashpa ricushpami, Israel puramanda anchuchisha.

7Ñucaca, cangunata Mandaj Taita Dios cashcamanda cangunaca, ñucapajlla tucushpa jucha illaj caichiyari.

8Pactachinajuchun ñuca cushca shimicunata yariashpa rurai callarichiyari. Mandaj Dios ñucami cangunataca, jucha illaj causachun shicanyachini.

9Maijan runa cashpapash paipaj taitata, na cashpaca paipaj mamata, ima llaquipash japishpaca alichari canman nishpaca, huañungapachami. Paipaj taitata, na cashpaca paipaj mamata, ima llaquipash japishpaca alichari canman nishcamandami, paipaj yahuarca, paipaj jahuallata canga.

10Maijan runa cashpapash, paipaj cumba runapaj huarmihuan nalita rurashpaca, chai nalita ruraj jaripash, chai huarmipash huañungapachami.

11Maijan cashpapash, paipaj taitapaj huarmihuan siririshpaca, paipaj taitapaj lluchullatami ricun. Chaimandami jaripash, huarmipash, ishcandi huañuchi tucunga. Paicunapaj yahuarca, paicunapaj jahuallatami canga.

12Maijan cashpapash paipaj jachunhuan puñushpaca, ishcandimi huañuchi tucunga. Paicuna ninan jatun nalitapacha rurashcamandami, paicunapaj yahuarca paicunapaj jahuallata canga.

13Maijan jari cashpapash, jarihuanllata huarmihuanshna chayarishpaca, millanayaita rurajcunami. Shinamandami paicunaca, ishcandi huañuchi tucunga. Paicunapaj yahuarca, paicunapaj jahuallatami canga.

14Maijan cashpapash huarmita charishpata, chai huarmipaj mamatapash, paipaj huarmi cachun japishpaca, yapa nalitami ruran. Chaimandami jaritapash, chai huarmicunatapash rupachinga. Canguna purapi yapa nalita rurajcuna ama tiachunmi, chashna rurana canguichi.

15Maijan cashpapash, shuj animalpi chayashpaca, huañuchi tucungami. Chai animaltapashmi, huañuchina canguichi.

16Maijan huarmi cashpapash, maijan animalhuambash chayaringapaj quimirijpica, chai huarmitapash, chai animaltapash huañuchinapachami canguichi. Paicunapaj yahuarca, paicunapaj jahuallatami canga.

17Maijan cashpapash taitamanda cashpa, na cashpaca mamamanda cashpapash, paipaj panihuanllatami cazaranga. Shina cazarashpaca, chai huarmipaj lluchullata, chai huarmipash chai jaripaj lluchullatami ricunga. Shina rurashpaca, jatun millanayaitapachami ruranga. Shinamandami paicunaca, paicunapaj llactapura gentecuna ricujta huañuchi tucunga. Paipaj panipaj lluchullata ricushcamandami, chai juchataca paillata apanga.

18Maijan cashpapash quilla nanaihuan ungushca huarmihuan puñushpaca, chai huarmipaj lluchullata ricushpami, quilla nanai llujshijujta ricun. Huarmipash, quilla nanai llujshijujtami ricuchishca. Chaimanda paicunaca, ishcandimi paicunapaj llacta puramanda anchuchi tucunga.

19Cambaj mamapaj ñañapaj lluchullata cashpa, cambaj taitapaj panipaj lluchullata cashpapash, na ricunachu cangui. Familia purallata lluchullata ricushcamandami, chai nalita rurashcataca paicunallata apanga.

20Maijan cashpapash taitapaj huauquipaj huarmihuan puñushpaca, taitapaj huauquipaj lluchullatami ricushca. Chai juchataca, paicunallatami apanga. Shinamandami, huahuacunata na charishpallata huañunga.

21Maijan cashpapash huauquipaj huarmita, paipaj huarmi cachun japishpaca, mapatami ruran. Shina rurashpaca, paipaj huauquipaj lluchullatami ricushca. Chaimandami paicunaca, huahuacunata na charishpallata huañunga.

22Pactachinajuchun ñuca cushca tucui shimicunata, tucui ñuca mandashcacunata ruranacunataca, yariashpa tucuita pactachinguichi. Canguna na chashna rurajpira, canguna causachun ñuca carashca llactaca, cangunataca shungu tigrachinshna llujchishpa shitanman.

23Cangunapaj ñaupajmanda ñuca llujchishpa cachana llactacunapi causajcuna ruranajunshnaca, na ruranachu canguichi. Paicunami, cai tucui jatun nalicunata ruranajurca. Chaimandami paicunataca, millanayachishpa ricurcani.

24Ashtahuangarin cangunataca, ñucami cashna nircani: Cangunami, paicunapaj llactata japinguichi. Lechepash, balun mishquipash ashtacapacha tiaj llactataca, ñucami canguna japishpa causanajuchun carasha.

Cangunata Mandaj Taita Dios ñucami cangunataca, shuj gente puracunamanda shicanyachircani.

25Chaimanda cangunaca, animalcunataca, maijanlla mapa cajta, maijanlla mapa illaj cajta shicanyachina canguichi. Alasyu animalcunatapash, maijanlla mapa illaj cajta, maijanlla mapa cajtami shicanyachina canguichi. Chashna mapa animalta cashpa, alasyu animalta cashpa, alpata llucashpa purij tucui animalta cashpapash, mapami nishpa ñuca shicanyachishcata micushpara mapayanguichiman.

26Cangunata Mandaj Dios ñucapash jucha illaj cajpimi, cangunapash jucha illaj causana canguichi. Cangunataca, ñucapajlla causachunmi shuj gente puracunamanda shicanyachircani.

27Jari cashpa, huarmi cashpapash, huañushcacunapaj almahuan rimangapaj cayashpa, na cashpaca maijambash yachaj tucushpaca, rumicunahuanmi huañuchi tucunga. Paicunapaj yahuarca, paicunapaj jahuallatami canga’ nishpa villai” nijurcami.