ÉXODO 19 - Quichua Imbabura Bible

Israelcunaca, Sinaí shuti jichushca pambamanmi chayashca

1Israelcunaca, huatapaj quimsa quilla yalishcapi Egipto llactamanda llujshishpaca, chashna punllapillatami Sinaí shuti jichushca pambaman chayanajurca.

2Refidim shuti pushtumanda llujshishca cashpami, Sinaí shuti jichushca pambaman chayashpa, carpacunata chaipi shayachishpa tianajurca. Israelcunaca, Sinaí urcu ñaupajpimi, carpacunata shayachishpa tianajurca.

3Taita Dioshuan parlangapaj, Moisés vichai rijpimi, Mandaj Diosca urcu jahuamandapacha cayashpa, cashna nijurca:

—Israel nishca Jacobopaj huasi ucu puramanda miraicunaman, cashna nishpa villangui:

4‘Cangunaca, Egiptopi causajcunata ñuca imatalla rurajta ricurcanguichimi. Jatun angapaj alas jahuapi churashpa llujchimunshna, ñucapajman imashna pushamushcatapash yachanguichimi.

5Cunanga, ñuca imata nijta uyashpa, ñucahuan ari ninajushcatapash cazushpaca, tucui gentecunata ashtahuan yali ñucapajlla cachun agllashca ninan valishca gentecunami canguichi. Tucui cai pachaca ñucapajmi.

6Cangunaca, ñuca mandana llactapi causana curacunapash, jucha illaj gentecunapashmi canguichi’ ningui. Ñuca imatalla nishca cai shimicunatami, israelcunaman villana cangui— nijurcami.

7Shina nijpi Moisés shamushpami, israelcunata mandaj rucucunata cayarca. Shina cayashpami, Mandaj Dios mandashca tucui shimicunata, paicunapaj ñaupajpi villajurca.

8Tucuilla israelcunami, shujllashnalla cashna nishpa tigrachinajurca:

—Mandaj Dios tucui imatalla nishcataca, tucuitami rurashun— ninajurcami.

Moisesca, israelcuna imatalla rimashca shimicunataca, Mandaj Diosmanmi villajurca.

9Shina villajpimi Mandaj Diosca, Moisestaca cashna nirca:

—Ricui, ñucami sangu sangu fuyupi cambajman shamuni. Canhuan ñuca rimajujta israelcuna uyashpaca, cambaj tucui causaipi canda crinajuchunmi shina shamuni— nircami.

Moisesca, israelcuna imatalla rimashca shimicunataca, Mandaj Diosmanmi cutin villajurca.

10Shina villajpimi Mandaj Diosca, Moisestaca cashna nirca:

—Israelcunapajman rishpa cunambash, cayapash paicunataca ñucapajlla cachun rurangui. Shinallata paicunapaj churajunacunatapash tajshachun mandangui.

11Quimsa punllapica, alichirishcacuna cachun mandangui. Quimsa punllapimi, Mandaj Dios ñucaca tucui israelcuna ricujta, Sinaí urcuta urai shamusha.

12Canga, urcu manñapi maicamanlla rishpa shayarinata israelcunaman ricuchishpa cashna ningui: ‘Caipilla shuyanguichi. Urcuman vichai ritaca, na ushanachu canguichi. Maicamanlla ñuca ricuchishcamandaca, na yalinachu canguichi. Pipash urcuman quimirishpaca, huañungapachami’ ningui.

13Maquihuambash na tacarinachu. Shina rurashpaca rumihuanmi huañuchi tucunga, na cashpaca flechahuanmi huañuchi tucunga. Animal cashpapash, runa cashpapash na causangachu. Cachuta unaicaman huacachijpimi, urcuman vichai rinajunga— nircami.

14Moisesca, israelcunapajman uriajumushpami, Diospajlla tucuchun rurarca. Paicunapaj churajunacunatapashmi tajshanajurca.

15Moisesca, israelcunataca cashnami nirca:

—Quimsa punllapaca, alichirishcalla caichi. Huarmipipash, na chayanachu canguichi— nircami.

16Ña quimsa punlla tucujpimi, cashna tucurca: Ña punllayajujpimi, culun nishcacunapash uyarirca, punchapamba shitamujpash ricurirca. Sangu sangu fuyupashmi, urcu jahuaman shamurca. Chaipica cachuta ninanda huacachishcapashmi uyarirca. Shinata uyashpami, carpacunapi tianajuj tucui gentecunaca manllashpa chujchunajurca.

17Shinamandami Moisesca, israelcunataca Taita Diosta tuparichun, carpacunamanda llujchirca. Paicunaca, urcu chaquipillami shayarinajurca.

18Tucuilla Sinaí urcumi cushnijurca. Mandaj Dios ninapi chai urcuman uriajumushcamandami, chashna cushnijurca. Cushnica, jornomanda cushnishnami llujshijurca. Tucuilla urcumi, ninanda chujchujurca.

19Cachuta huacachijpash, ashtahuan ashtahuanmi ninanda uyarijurca. Moisés rimajujpica, Taita Dios rimashpa tigrachijujpash, culunllami uyarijurca.

20Mandaj Diosca, Sinaí urcu jahua pundamanmi uriajumurca. Chai urcu jahuamanmi Mandaj Diosca, Moisesta cayarca. Shina cayajpimi Moisesca, chaiman vichai rirca.

21Mandaj Diosca, Moisestaca cashnami nirca:

—Mandaj Diosta ricungapaca, maicamanlla richun ricuchishcamandaca, na yalinachu nishpa, paicunapajman urai rishpa mandai. Na cazushpaca, paicuna puramandaca ashtacacunami huañunga.

22Shinallata Mandaj Diospajman quimirij curacunapash, Diospajlla tucuchun ningui. Mandaj Diosca, paicunatapash ama huañuchijuchun, chashna ruraichi ningui— nircami.

23Shina nijpimi Moisesca, Mandaj Diosta cashna nirca:

—Sinaí urcuman israelcuna vichai ritaca na ushangachu. Can Diosllatami, cashna nishpa mandarcangui: ‘Urcuman rinataca, maicamanlla rinata ricuchingui. Shinallata Diospajlla tucuchumbash rurangui’ nishpami mandarcangui— nircami.

24Shina nijpimi Mandaj Diosca, Moisestaca cashna nirca:

—Uriajushpa rilla. Chai jipaca, Aarondapash canhuan pushashpa vichai shamungui. Ashtahuangarin curacunahuan, israelcunahuanga, Mandaj Dios ñucapajman shamunata maicamanlla ricuchishcataca, ama yalimuchun. Paicuna na cazujpira, huañuchishpa tucuchiman— nircami.

25Shina nijpica Moisés urai rishpami, israelcunaman villajurca.