1Ñuca huahualla, ali yachaita ñuca
yachachishcataca, aligutapacha uyahuangui.
2Ali yuyaita ñuca cushcata alichingapaj,
cambaj shimihuambash, ali yachajushcatalla
rimangapajmi, chashna uyana cangui.
3Na rijsishca huarmipaj shimimandaca,
balun mishqui shutujunshnami.
Pai imata rimashcapash, aceiteta yali llambullami.
4Ashtahuangarin pai tucurinaca, ajenjoshna jayajmi.
Ishcandi ladoman ninan filo filo espadashnami.
5Paipaj chaquica, huañuimanmi urai rijun.
Pai purijushcapash, Seolmanmi pushajun.
6Paipaj ñangunaca, maimambash pushajlla ñangunami.
Chai ñangunataca, na rijsinguichu.
Causaiman rina ñanda aliguta yariashpa na
ricushcamandami, na rijsingui.
7Huahuacuna, cunanga ñucata uyahuaichi.
Ñuca shimihuan yachachishca yuyaicunataca,
na saquinachu canguichi.
8Chai huarmipajman rinamandaca caruyangui.
Paipaj huasi pungumanllapash, ama quimiringuichu.
9Can alicachi tucushcataca, na rijsishcacunaman
ama cungapajmi, na rina cangui.
Tauca huatata can trabajashcataca,
llaquitapash na llaquij runaman ama cunguichu.
10Cambaj ushaihuan trabajashcataca,
na rijsishcacunara na munangacaman micunman.
Can trabajashpa charishcacunaca,
na rijsishca runapaj huasipira jundanman.
11Na uyashpaca, jipaman cambaj cuerpo
rucuyajpirami, ninanda llaquirishpa aij nijungui.
12Chaipira cashna nijunguiman:
“Ali yuyaita cushcataca,
¿imashpata millanayachircaniyari?
Jarcashpa rimashcatapash ñuca
shungupica, yangapimari churarcani.
13Ñucata yachachijcuna yachachinajujpipash,
na uyanayachircanichu.
Ñucata yachachijcunataca, na
aligutapacha uyanayachircanichu.
14Ñuca llactapi causajcunapaj chaupipi,
tandanajushcacunapaj chaupipica,
ñamari jatun llaquita japigrijurcani” nijunguiman.
15Yacuta tandachingapaj rurashca jatun
utujumanda, cambaj yacutallata ufiangui.
Yacuta llujchingapaj allashca jatun utujumanda
llujshijuj cambaj yacutallata ufiangui.
16¿Cambaj pugyucunamanda yacuca,
ñangunapi jicharijungachu?
¿Ninanda rijuj cambaj yacucunapash,
plazacunapi jicharijungachu?
17Chai yacucunaca cambajlla cachun, na
rijsishca runacunahuanga ama ufianguichu.
18Cambaj pugyumanda llujshijuj yacupash,
bendiciai tucushca cachun.
Huambrara cashpa cazarashca cambaj
huarmihuanlla cushijungui.
19Paica juyashca tarugagushna, ninanda
cushijuj gacela nishca juyailla animalgushnami.
Pai juyachishcacunaca, cambaj tucui
causaipi cushichijuchun.
Paipaj juyaihuanga, tucui causaipimi
ninandapacha cushijungui.
20Ñuca huahualla, ¿imamandata shujpaj
huarmihuan ñausashna puringuiyari?
¿Imamandata na rijsishca huarmipaj
chuchupi ugllaringuiyari?
21Runapaj causaitaca, Mandaj Dios
ricujujpimi, chaitaca na rurana cangui.
Tucui imata rurashpa purijujtapash, paica ricuriajunmi.
22Diosta na manllaj runataca, nalita
pai rurashcallatami llaquipi urmachinga.
Juchata pai rurashcapillatami,
huascahuan huatai tucushcashna quedanga.
23Jarcashpa rimajujpipash, na cazushcamandami huañunga.
Yuyai illanshna imatapash rurashcamandami chinganga.
Who We AreWhat We EelieveWhat We Do
2025 by iamachristian.org,Inc All rights reserved.
