Psalms 85 - Quichua Imbabura Bible

Israelcunata llaquipai nishpami, Taita Diosta mañashcaCandajcunata mandaj candachijuchun, Coré shuti runapaj miraicunaman rurashca Salmomi.

1Mandaj Dioslla, cambaj llactapi

causajcunahuanga alimi carcangui.

Jacobopaj miraicuna prezu apai

tucushcataca tigrachimurcanguimi.

2Can agllashcacuna nalita

rurashcataca cungaparcanguimi.

Paicunapaj tucui juchacunataca,

quilpanshnami anchuchircangui. Selah

3Tucui can fiñarishcatami saquircangui.

Nina japirinshna can ninanda fiñarishcataca,

anchuchircanguimi.

4Ñucanchita quishpichij Taita Dioslla,

ñucanchitaca punda ali causashcashnalla tigrachihuayari.

Can fiñashpa ñucanchita llaquichijushcataca,

chaillapi jarcapairi.

5¿Causaita causaicaman ñucanchitaca,

fiñashcallachu cagringui?

¿Mirai miraicamanllu, canga fiñashpa catigringui?

6¿Nachu can agllashcacuna canhuan

cushijuchunga, causaita cutin caragripangui?

7Mandaj Dioslla, can llaquij

cajtaca ñucanchiman ricuchihuayari.

Quishpirinatapash, ñucanchiman carahuayari.

8Mandaj Taita Dios rimanataca uyapashami.

Casilla ali causaita, paipajlla cachun

agllashca gentecunaman caranatami villanga.

Lococunashna ama maitapash ruranajuchunmi,

chashna villanga.

9Paita manllajcunapaca, quishpirinaca ladollapachami.

Paipaj punchapambaguca, ñucanchi llactapi

causachunmi, chashna shuyajun.

10Llaquij canahuan, na llullaj

canahuanga tuparircami.

Imatapash cashcatapacha ruranahuan,

casilla ali causanahuanga ugllarircami.

11Na llullaj shimica, alpamandami llujshijunga.

Imatapash cashcatapacha ruranaca,

jahua pachamandapachami ricujunga.

12Mandaj Diosllatami, ima alicunatapash caranga.

Ñucanchi alpacunapash, ali granotami fucunga.

13Imatapash cashcatapacha ruranami,

paitaca ñaupashpa rijunga.

Pai sarushpa rishcami, ñucanchipaj ñan canga.