1Chai jipaca, cashnatapashmi ricurcani. Shuj ninan shinlli angelmi, jahua pachamanda fuyupi pillurishca uriajumurca. Paipaj uma jahuapica, shuj cuichijmi ricurirca. Ñavipash, indishna punchapambami carca. Chaquipash, rupajuj ninashnami carca.
2Chai angelmi, uchilla libroguta pascashca charijurca. Ali lado chaquihuanga, mama cucha jahuapi, lluqui lado chaquihuanga, alpa jahuapimi shayajurca.
3Shina shayajushpami, león huacanshna ninanda caparijurca. Shina caparijujpimi, culun ninshna rimashcacuna canchiscaman uyarirca.
4Shina culun ninshna chai rimashcacuna canchiscaman uyarijpimi, escribingapaj munarcani. Ashtahuangarin jahua pachamandaca: “Chai canchiscaman culun ninshna rimashca uyarishcataca pacashpa, na escribinachu cangui” nijtami uyarcani.
5Shuj chaquihuanga, mama cucha jahuapi, shuj chaquihuanga, alpa jahuapi shayajujtami, angeltaca ricurcani. Chai angelmi, paipaj ali lado maquitaca, jahua pachaman ñapash vichai alsarca.
6Jahua pachata, cai pachata, mama cuchatapash, chaicunapi ima tiachumbash ruraj, causaita causaicaman causajuj Diospaj shutipimi, chai angelca juramentushpa, cashna nirca: “Cunanga, ña na ashtahuan shuyangachu.
7Ashtahuangarin suctapaj cati ángel trompetata huacachi callarijpimi, Taita Diosca chai pipash na yachanataca pactachinga. Chaitaca, paita servij, pai ima nishcata villajcunaman villashcashnallatami pactachinga” nircami.
8Jahua pachamanda rimajta ñuca uyashcallatami, cutin ñucata cashna nihuarca: “Ricui, chai mama cucha jahuapi, alpa jahuapi shayajuj ángel pascashca charijuj uchilla libroguta japingapaj ri” nihuarcami.
9Shina nijpi, angelpajman rishpaca: “Chai uchilla libroguta carahuai” nishpami mañarcani. Chashna nijpimi chai angelca, cashna nihuarca: “Jaica, micuilla. Cambaj shimipica, balun mishquishna mishqui mishquimi canga. Ashtahuangarin vijsapica, jayaj jayajmi tucunga” nihuarcami.
10Shina nijpimi chai angelpaj maquimandaca, uchilla libroguta japishpa micurcani. Ñuca shimipica balun mishquishna, mishqui mishquimi carca. Micushca jipa ñuca vijsapica, jayaj jayajmi tucurca.
11Chai jipami chai angelca, cashna nihuarca: “Ashtaca gentecuna, ashtaca llactacuna, shuj shuj shimita parlajcuna, jatun mandajcuna ima tucunatapash Dios villashcataca, cutin villagrinapachami cangui” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
