Psalms 68 - Quichua Imbabura Bible

Taita Diosca, Sinaí shuti urcupipash, paipaj huasipipashmi ricurishcaCandajcunata mandaj candachijuchun, David rurashca candana Salmomi.

1Taita Dioslla, jataripairi.

Can jatarishpaca, canda fiñajcunataca,

caiman chaiman cachapailla.

Paita millanayachijcunaca, paipaj

ñaupajmandaca pacajushpa calpachun.

2Paicunataca, cushnitashnami maitapash cachangui.

Diosta na manllajcunaca, ninapi vira yacuyanshnami,

Taita Diospaj ñaupajpica chinganga.

3Ashtahuangarin imatapash cashcatapacha rurajcunaca,

Taita Diospaj ñaupajpica ninandami cushijunga.

Cushijuimandami fahuanajunga.

4Taita Diosta candaichiyari.

Paipaj shutita, Salmocunahuan candaichiyari.

Caballopi tiarinshna, jahua pachapi

tiajujtaca, ninanda alicachinguichiyari.

Paipaj shutica, Mandaj Diosmi.

Paipaj ñaupajpi cushijuichi.

5Paica, taita mama illajcunapaj Taitami.

Sapalla mamagucunatapash cuidashpa jarcajmi.

Pai causana paipajlla huasipipash Taita Diosmi.

6Jichushpa saquishcacunataca, Taita

Diosmi familiapi causachun churan.

Prezu causajcunataca llujchishpami,

aliguta causachun churashpa cushichin.

Ashtahuangarin paita na cazujcunaca,

chaquishca alpacunapimi causan.

7Taita Dioslla, can agllashcacunapaj ñaupajpi

llujshishpa, jichushca pambata can purijujpica, Selah

8alpapashmi chujchurca.

Taita Diospaj ñaupajmandami, jahua

pachamanda tamiapash urmamurca.

Chai Sinaí shuti urcumi, Taita

Diospaj ñaupajpi chujchurca.

Israelcunapaj Taita Diospaj

ñaupajpimi chujchurca.

9Taita Dioslla, ashtaca tamiatami tsirapachimurcangui.

Can carashca chaquishca alpataca,

cutinmi mushujyachircangui.

10Cambaj corralmanda llamacunami, chaipica causashca.

Taita Dioslla, juyaimandami imagutapash

na charijcunaman carashcangui.

11Imata cashpapash, Jatun Diosllatami villachijurca.

Ali villaitaca, ashtaca huarmicunami cashna villanajurca:

12“Jatun mandajcunami, paicunapaj soldadocunahuan

pacajushpa calpanajun” nishpami villanajurca.

Huasipi quedajcunaca, macanajuipi

quichumushcacunatami chaupirinajurca.

13Alitapashchari callana faquicunahuan,

shitai tucurcanguichi.

Palomapaj alasta culquihuan quilpashcashnami tucunguichi.

Plumacunapash, quillu orohuan quilpashcashnami tucunguichi.

14Tucuita Rurai Ushaj Dios,

caita chaita cachajpica jatun mandajcunaca,

Salmón shuti urcupi rasushcashnami chaipi carca.

15Basán shuti urcuca, Taita Diospaj urcumi.

Chai Basán urcuca, jatumbacha urcumi.

16Jatun urcucunalla, ¿imashpata Dios causangapaj

munashca urcutaca ricunajunguichi?

Chaipica, Mandaj Diospachami causaita causajunga.

17Taita Diospaj carretacunaca,

ashtaca huaranga huarangacunami.

Jatun Diosca, Sinaí urcumandami,

paipajlla huasiman shamujun.

18Prezu tiajcunata apashpami, jahuaman rircangui.

Gentecunaman carangapajmi, alicunata japircangui.

Na cazujcunamambash, paicunahuan

causangapajmi, Mandaj Taita Diosca japircangui.

19Jatun Diosca, alicachi tucushca cachun.

Paica, punllandimi ashtaca alicunata caramujun.

Paica, ñucanchita quishpichij Taita Diosmi. Selah

20Taita Diosca, ñucanchi Taita Diosmi.

Paimi, ñucanchitaca quishpichinga.

Mandaj Jatun Diosmi, huañunamandapash cacharichinga.

21Taita Diosca, paita fiñajcunataca,

umapi chugrichingapachami.

Juchapi purijcunataca, frente

ajcha ladopipashmi chugrichinga.

22Mandaj Diosca, cashnami nirca:

“Basán shuti llactamandami, candaca tigrachimusha.

Candaca, mama cucha yacu

ucucunamandami tigrachimusha.

23Cambaj chaquica, canda

fiñajcunapaj yahuarpimi pucapamba tucunga.

Chai yahuartaca, cambaj alcucunami lambinajunga” nircami.

24Taita Dioslla, cambaj ñangunatami ricunajurca.

Ñuca Taita Diospaj ñangunataca, ñucata

Jatun Mandajpaj ñangunatami,

cambajlla huasipica ricunajurca.

25Candajcunaca ñaupashpa,

tocajcunaca catishpami rinajurca.

Chaupipica, jarihuan nara tacarishca

cuitsacunami, panderocunahuan rinajurca.

26Jatun tandanajuicunapica,

Taita Diostaca alimari cangui nichiyari.

Callarimandapacha causaj israelcuna,

Jatun Diosta chashna nichiyari.

27Paicunata mandaj, chairalla

viñai Benjaminga chaipimi carca.

Judá ailluta mandajcunaca, paicunapaj

jatun tandanajuipimi carca.

Zabulón ailluta, Neftalí ailluta

mandajcunapash chaipimi carca.

28Cambaj Taita Diosca mandashpami,

canman ushaita cushca.

Taita Dioslla, ñucanchiman imata can

rurashcatapash, shinllitapacha cutin villapailla.

29Jerusalenbi cambajlla huasita

yarishpami, jatun mandajcunaca,

caranacunata canman caranajunga.

30Macanajungapaj tandanajuj gentecunata llaquichipairi.

Huagracunashna ashtaca gentecunata,

shicucunashna gentecunatapash llaquichipairi.

Paicunapaj culquicunandi, cambajman

tucuilla yaicumungacaman llaquichipailla.

Macanajushpa cushijuj gentecunataca,

caita chaita cachapailla.

31Egipto llactata mandajcunami shamunajunga.

Etiopía llactapi causajcunaca,

ñapashmi paicunapaj maquita

Taita Diospajman chutanajunga.

32Cai pachapi tiaj llactacunata mandajcunaca,

Taita Diosman candaichiyari.

Jatun Diosman candaichiyari. Selah

33Jahua pachamanda ashtahuan jahua

pachapica, caballopi tiarinshna punda

huatamandapacha tiajujman candaichiyari.

Ricuichi, paimi rimamunga.

Ninan ushaihuanmi rimamunga.

34Taita Dios ninan ushaita charijtaca yarichiyari.

Pai juyaillapacha cajtaca, israelcunapimi ricuchijun.

Paipaj jatun ushaica, jahua pachapimi.

35Cambajlla huasipi tiajushpaca,

canga manllarina Taita Diosmi cangui.

Israelcunapaj Taita Diosca, paimi pai

agllashcacuna ninan shinlli cachunga,

ushaita cujun.

Taita Diosca, alimari cangui ni tucushca cachun.