JOSUÉ 8 - Quichua Imbabura Bible

Hai shuti pueblotaca, mishashpami tucuchishca

1Mandaj Diosca, Josuetaca cashnami nirca: “Na manllashpa shaijunachu cangui. Macanajunata ali yachajcunata pushashpa, Hai shuti puebloman vichai rilla. Ricui, Hai shuti pueblota jatun mandajtaca, chai pueblondi, pai mandajuj gentecunandi, paipaj alpacunandimi, cambaj maquipi churarcani.

2Imashnami Jericó pueblopi causajcunatapash, paicunata jatun mandajtapash tucuchircangui, Hai shuti pueblopi causajcunatapash, paicunata mandajtapash chashnallata tucuchingui. Ashtahuangarin paicuna imata charishcatalla, animalcunandi cangunapaj cachun japinguichi. Pueblo huashapica, pacalla chapaj runacunata churangui” nircami.

3Shina nijpimi Josueca, soldadocunandi Hai shuti puebloman vichai ringapaj jatarijurca. Josueca, quimsa chunga huaranga ninan shinlli runacunatami agllarca. Paicunataca, tutami Hai shuti puebloman cacharca.

4Paicunataca, cashnami mandashpa cacharca: “Ali uyahuaichi, chai pueblo huashapi pacalla chapanguichi. Chai pueblomandaca, na yapa caruyanachu canguichi. Paicuna llujshijpica, ña macanajunalla shuyanajunguichi.

5Shinallata ñucapash, ñucahuan purinajuj tucuilla gentecunapash, chai pueblomanmi ashtahuan quimirishun. Chai pueblopi causajcuna ñucanchihuan macanajungapaj pundashnallata llujshimujpica, paicunapaj ñaupajmandaca calpashunllami.

6Paicunaca, ñucanchi calpajpimi pueblomanda carucaman catishpa rinajunga. Chaipica: ‘Paicunaca, pundashnallata ñucanchita manllashpami calpanajun’ ninajungami. Ñucanchica, paicunapaj ñaupajmandaca calpanajushunllami.

7Paicuna chai pueblomanda ña caruyajpica, canguna pacajushca pushtumanda llujshishpa, chai pueblota japingapaj ringuichilla. Cangunata Mandaj Taita Diosca, chai pueblotaca cangunapaj maquipimi churanga.

8Chai pueblota ña japishpaca, Mandaj Dios mandashcashnallata rupachinguichilla. Uyaichi, cangunataca chashna rurachumbachami mandani” nircami.

9Josué chashna mandashpa cachajpi rishpaca, Bet-el shuti pueblohuan, Hai shuti pueblohuan chaupipi pacajushpa chapangapajmi rinajurca. Hai shuti pueblomandaca, indi huashajuj ladomanmi pacajugrirca. Josueca, chai tutaca chai gentecunapaj chaupipimi pacarirca.

10Josueca, cayandi tutamandata jatarishpami, gentecuna alichirishcata ricushpa yalijurca. Chai jipami Josueca, israelcunata mandaj rucucunahuan gentecunata ñaupashpa, Hai shuti pueblopi causajcunahuan macanajungapaj vichai rirca.

11Josuehuan rinajuj macanajunata ali yachaj tucui runacunaca, vichai rishpami ña chayanajurca. Paicunaca, chai pueblo ladoman chayashpami, Hai shuti pueblo jahua ladopi carpacunata shayachishpa tianajurca. Paicuna tianajuj pushtuhuan, Hai shuti pueblohuan chaupipica, pugru pambami tiarca.

12Chaipimi Josueca, Hai shuti pueblohuan, Bet-el shuti pueblohuan chaupipica, indi huashajuj ladoman pacalla chapachun, picha huaranga soldadocunata churarca.

13Cashnami soldadocunataca, macanajunalla shuyanajuchun churarca: Tucuilla soldadocunataca, jahua ladomanmi churarca. Pacalla chapaj soldadocunataca, Hai shuti pueblomanda indi huashajuj ladomanmi churarca. Josueca, chai tutaca, pugru pamba chaupicamanmi chayagrirca.

14Chaipica cashnami tucurca: Hai shuti pueblota jatun mandajca, chaita ricushpami paipash, chai pueblopi causajcunapash, tutamandata ucha alichirinajurca. Pai mandashca horaspimi, chai pueblopi causajcunaca, israelcunahuan macanajungapaj Arabá shuti jatun pamba ladoman llujshinajurca. Paicunaca, Israel soldadocuna Hai shuti pueblo huasha ladoman pacalla chapanajujtaca, na yacharcachu.

15Shinamandami Josueca, tucui israelcunandi mishai tucushpa manllanshnalla, paicunapaj ñaupajmandaca, jichushca pambaman rina ñanda calpanajurca.

16Shina calpajpimi Hai shuti pueblopi causajcunaca, paicunata catingapaj tucuilla tandanajurca. Shina tandanajushpa Josueta catinajushpami, chai pueblomandaca caruyanajurca.

17Hai shuti pueblopi, Bet-el shuti pueblopi causajcunaca shujllapash na quedashpami, israelcunata japingapaj catinajurca. Israelcunata catinajushcamandami, pueblo pungucunatapash pascashcata saquishpa rinajurca.

18Chaimandami Mandaj Diosca, Josuetaca cashna nirca: “Cambaj maquipi charijuj lanzata, Hai shuti pueblo ladoman ricuchi. Chai pueblotaca, ñucami cambaj maquipi churasha” nircami. Shina nijpimi Josueca, paipaj maquipi charijuj lanzataca, chai pueblo ladoman ricuchirca.

19Shinallata pacalla chapanajuj runacunaca, Josuepaj maquita alsajhuan paicuna chapanajushca pushtumanda ucha jatarishpami, Hai shuti puebloman calpashpa shamushpa japinajurca. Chai pueblotaca, uchami rupachinajurca.

20Hai shuti pueblopi causajcunaca, paicunapaj pueblota tigrarishpa ricushpami, chai pueblomandaca jahua pachaman chayajta cushnijujta ricunajurca. Paicuna catijpi, jichushca pambata calpanajuj israelcuna paicunahuan macanajungapaj tigrarijpimi, maiman calpaitapash na ushanajurca.

21Josueca tucui israelcunandimi, pacalla chapanajuj runacuna, Hai shuti pueblota ña japinajushcata ricurca. Shinallata chai pueblomandaca, cushnipash jahuaman rijujta ricushpami, Hai shuti pueblomanda gentecunahuan macanajungapaj tigrarirca.

22Shinallata caishujcunaca, Hai shuti pueblomanda llujshishpami tuparinajurca. Shinami israelcunapaj chaupipi churai tucunajurca. Caishuj ladomanda chaishuj ladomanda llujshishpami, shujllatapash pacajushpa richunga na saquishpa, chugrichishpa tucuillata huañuchinajurca.

23Ashtahuangarin Hai shuti pueblota jatun mandajtaca causajta japishpami, Josuepajman apamunajurca.

24Shinallata Hai shuti pueblopi tucui causajcunataca, chagracunapi, jichushca pambacunapi paicunata maimanlla catishcamanmi, israelcunaca espadahuan huañuchishpa tucuchirca. Chai jipami tucui israelcunaca, Hai shuti puebloman tigrashpa, chaipi puchushcacunataca, espadahuan chugrichishpa huañuchinajurca.

25Chai punllapica, Hai shuti pueblopi causajcunaca jaricunandi, huarmicunandimi, chunga ishcai huaranga gentecuna huañurca.

26Josueca, Hai shuti pueblopi causajcunata huañuchishpa tucuillata tucuchingacamanmi, chai pueblo ladoman paipaj maquihuan lanzata ricuchijushcataca, na anchuchirca.

27Ashtahuangarin Mandaj Dios, Josueta mandashcashnallatami israelcunaca, Hai shuti pueblopi causajcunapaj animalcunatapash, tucui imalla tiashcacunatapash japinajurca.

28Josueca, Hai shuti pueblotaca tucuillata rupachishpami, rumi mundundalla saquirca. Chaitaca, causaita causaipajmi llaquinayaita tucuchirca. Chaica, cunangaman chashnallatami.

29Hai shuti pueblota jatun mandajtaca, jatun caspipimi tutayangacaman, huarcushpa saquirca. Ña tutayajpimi Josueca, chai huañushcata caspimanda uriajuchishpa, Hai shuti puebloman yaicuna pungupi shitagrichun mandarca. Chai jahuapica, ashtaca rumicunatami mundunanajurca. Cunangamanmi rumicunaca, chaipillata tianajun.

Moisés mandashcataca, Ebal shuti urcupimi leyishca

30Chai jipami Josueca, israelcunata Mandaj Taita Diosman shuj altarta, Ebal shuti urcupi rurarca.

31Mandaj Diosta servij Moisés, imashna israelcunata mandashcashnallatami ruranajurca. Moisés mandashpa escribishca libropi nijunshnallatami, jatun rumicunahuan shuj altarta ruranajurca. Chai rumicunataca, pipash na jirruhuan tacarcachu. Chai altarpimi, Mandaj Diosman animalcunata cushpa tucuillata rupachinajurca. Shinallata Dioshuan ali cangapajpashmi, animalcunata cunajurca.

32Shinallata tucuilla israelcunapaj ñaupajpi Moisés mandashpa escribishcatapashmi, Josueca chai rumicunapi shujman yalichishpa escribirca.

33Chaipillatami tucui israelcunapash, paicunata mandaj rucucunapash, shuj mandajcunapash, juezcunapash, Mandaj Dioshuan ari ninajushpa escribishcata alichishca arcapaj, ishcandi ladopi shayanajurca. Diospaj arcata apaj levita curacunapaj ñaupajpimi, shuj llactamanda runacunapash, israelcunapash shayanajurca. Paicunaca, shuj chaupica, Gerizim shuti urcu ladoman, caishuj chaupica, Ebal shuti urcu ladomanmi shayanajurca. Pundaca, Israel gentecunatara bendiciachun nishpa, Mandaj Diosta servij Moisés mandashcashnallata rurangapajmi, chashna shayanajurca.

34Chai jipami Josueca, Moisés mandashca shimicunata tucuillata leyijurca. Alita rurajpica, alita cuna cajta, nalita rurajpica llaquichina cajta, chai mandashca libropi escribishca tiajujtami leyijurca.

35Josueca, Moisés mandashcataca, shuj shimitallapash na saquishpami, tandanajushca tucui israelcunapaj ñaupajpi tucuillata leyijurca. Huarmicunamambash, uchilla huahuacunamambash, Israel purapi shuj llactamanda shamushpa causajcunamambashmi leyishpa uyachijurca.