ÉXODO 5 - Quichua Imbabura Bible

Moisespash, Aaronbashmi, Faraonbaj ñaupajman rishca

1Chai jipami Moisespash, Aaronbash, Faraonbaj ñaupajman yaicushpa cashna ninajurca:

—Israelcunata Mandaj Taita Diosmi, cashna nin: ‘Ñuca agllashcacunataca, jichushca pambapi jatun fiestata rurangapaj richun saqui’ ninmi— ninajurcami.

2Shina nijpimi Faraonga, cashna nishpa tigrachirca:

—Pai nishcata uyashpa, israelcunata richun ñuca saquingapaca, ¿pita Mandaj Diosyari? Ñucaca, Mandaj Diostaca na rijsinichu. Israelcuna richumbash, na saquishachu— nircami.

3Shina nijpimi, cashna ninajurca:

—Hebreocunapaj Taita Diosmi, ñucanchihuan tuparirca. Chaimandami cunanga, jichushca pambata quimsa punllata rishpa, ñucanchita Mandaj Taita Diosman animalcunata cushpa huañuchina canchi. Ima ung:uipash, na cashpaca espadahuan huañuchinapash ñucanchi jahuapi ama shamuchunmi, chashna rurana canchi— ninajurcami.

4Shina nijpimi Egipto llactata jatun mandajca, cashna nirca:

—Moisespash, Aaronbash, ¿imashpata cangunaca cai gentecuna trabajanajujta saquichinguichi? Canguna imata ruranajushcata rurangapaj tigraichi— nircami.

5Faraonga cashnatapash nircarami:

—Ricuichi, cai llactapi causaj gentecunaca, cunanga ashtacacunami. Cangunami, paicuna imatalla ruranajujtaca saquichishcanguichi— nircami.

6Faraonga, chai punllallatami israelcunata shinllita trabajachijcunata, imatalla rurashcata ricushpa mandajcunataca, cashna nishpa mandarca:

7—Israelcuna ladrillota rurachunga, cunangaman jupata cushcashnallataca, cunanmandapacha na ashtahuan cunachu canguichi. Cunanga, paicunallata rishpami jupata tandachimunga.

8Paicunataca, ladrillota mashnata punda llujchin cashca cajpipash, chashnatallata llujchinajuchun churanguichi. Paicunaca quillacuna cashpami: ‘Ñucanchi Taita Diosman animalcunata cushpa huañuchingapaj jacuchi’ nishpa caparinajun.

9Gañanguna cashpa imatalla ruranajushcataca, ashtahuan llashayachinguichi. Chashna causanajushpa chai llulla shimicunata ama uyanajuchunmi, chashna rurana canguichi— nijurcami.

10Shina nijpimi, israelcunata shinllita trabajachijcunapash, imatalla rurashcata ricushpa mandajcunapash chaimanda llujshishpaca, israelcunata cashna ninajurca:

—Faraonga cashnami nin: ‘Ñucaca, na jupata cushachu.

11Cunanga, cangunallata rishpa, maipi tarishpapash, jupata tandachimunguichilla. Shina cashpapash, mashna ladrillota punda llujchin cashcashnallata, chashnatapachami llujchina canguichi’ ninmi— ninajurcami.

12Shina nijpimi israelcunaca, jupapaj randica, jupa sapicunata tandachimungapaj tucui Egipto llactataca, caita chaita rinajurca.

13Shinllita trabachijcunaca, paicunataca cashna nishpami llaquichinajurca: “Cangunapaj ruranacunataca, imashnami jupata punda cujpi rurashpa tucuchin carcanguichi, chashnallatami punllandi rurashpa tucuchina canguichi” ninajurcami.

14Shinllita trabajachinajuchun, Faraón churashca runacunaca, israelcuna imatalla rurashcata ricushpa mandachun paicuna churashca runacunataca, ninandami astinajurca. Paicunaca: “¿Imashpata cainapash, cunambash na pundashnallata ladrillota rurashpa pactachinguichi?” nishpami, chashna astinajurca.

15Shinamandami, Israel puracunallata imatalla rurashcata ricushpa mandajcunaca, ninanda llaquirishpa Faraonbajman shamushpa, cashna ninajurca:

—¿Imashpata canda servijcunataca, cashna llaquichijungui?

16Canda servijcunaman jupata na cushpapash: ‘Ladrillota ruraichi’ ninajunmi. Ricui, canda servijcunami asti tucunajun. Cambaj gentecunami, chashna nalita ruranajun— ninajurcami.

17Shina ninajujpimi Faraonga, cashna nishpa tigrachirca:

—Cangunaca, imata ruranatapash na munaj quillacunapachami canguichi. Chaimandami: ‘Mandaj Diosman animalcunata cushpa huañuchingapaj jacuchi’ ninajunguichi.

18Cunanga ladrillota rurangapaj richi. Jupata na cujpipash, mashna ladrillota llujchin cashpapash, chashnatallatami llujchina canguichi— nircami.

19“Shuj punllapi mashna ladrillota llujchina cashpapash, chashnatallatami llujchina canguichi” nijpimi, Israel puracunallata imatalla rurashcata ricushpa mandajcunaca, ninan llaquipi cashcata ricunajurca.

20Faraonbaj ñaupajmanda paicuna llujshinajushpami Moisestapash, Aarondapash paicuna ricunallapi shuyanajujta ricushpa tuparishpaca,

21cashna ninajurca:

—Mandaj Taita Diosllata, cangunata ricushpa imata cashpapash rurapachun. Faraonbaj ñaupajpipash, paipaj servijcunapaj ñaupajpipash ñucanchitaca, millanayachi tucuchunmi rurashcanguichi. Ñucanchita huañuchinajuchun, paicunapaj maquipi espadata cunshnami, llaquipi churashcanguichi— ninajurcami.

Mandaj Diosca Moisestapash, Aarondapashmi cachashca

22Shina ninajujpimi Moisesca, Mandaj Diospajman tigrarishpa cashna nirca:

—Jatun Dioslla, ¿imashpata cai gentecunataca ninanda llaquichijungui? ¿Imapajta ñucataca cachamuhuarcangui?

23Cambaj shutipi Faraonman villangapaj, ñuca shamushca punllamandapachami, cai gentecunataca ninanda llaquichijushca. Ashtahuangarin canga, can agllashcacunataca na cacharichishcanguichu— nircami.