1Yarichij cai shimicunataca, Davidpaj churi,
israelcunata jatun mandaj Salomón escribishcami.
2Cai shimicunaca ali yachaitapash, yachachishcatapash yachangapajmi.
Aligutapacha yarishpa purina ali yuyaicunata rijsingapajmi.
3Aligutapacha yarishpa puringapaj,
ali yuyaita cushcata chasquingapajmi.
Imatapash cashcatapacha ruranata, ali yuyaita charinata, tucuipaj
ali cachun ruranata yachachingapajmi.
4Nara yachajushcacunaman ali yachaita cungapajmi.
Shinallata chairalla viñaicunamambash,
ali yuyaita, aliguta yarishpa causanata yachachingapajmi.
5Alipacha yachajushca runa uyashpaca, ashtahuanmi yachajunga.
Shinallata ali yuyaita charij runapash,
ali yuyaita cushcataca chasquingami.
6Yarichij shimicunata yachachishca shimicunata yachangapajmi.
Alipacha yachajushcacuna yachachishca shimicunata,
na yachai ushanalla shimicunata yachangapajmi.
7Alipacha yachajushpa callarinaca, Mandaj Diostami manllashpa causana.
Ashtahuangarin juizu illajcunaca,
ali yachaita yachachishcatapash yangapimi churan.
Ali yachajushca cachun yachachishca shimicunami8Ñuca huahualla, ali causachun cambaj
taita yachachishcataca, aliguta uyangui.
Ali causachun cambaj mama yachachishcatapash, ama yangapi churanguichu.
9Cai yachachishcacunaca, juyailla coronata
cambaj umapi churachishcashnami canga.
Juyaillaguta cungapi huatachishcashnami canga.
10Ñuca huahualla, juchata rurajcuna
umachingapaj munajpica, ama uyanguichu.
11Candaca cashna ninajungapashchari:
“Jacu ñucanchihuan.
Huañuchishpa yahuarta jichangapaj, pacalla chapagrishun.
Ima nalitapash na ruraj runata pacalla
japishpaca, yangamanda huañuchishunllami.
12Seolshnami causajta langashun.
Manllanayai ucu ucu yacucunapi
huashajuchinshnami, tucuillata langashun.
13Tucui ima tiashcacunatami tarishun.
Ima charishcacunata quichushpami,
ñucanchi huasicunapipash jundachishun.
14Cambash ñucanchipura tucushpa ricuilla.
Ñucanchica, shuj muchilapillami tucuillata
tandachishun” ninajungapashchari.
15Ñuca huahualla, paicunahuanga
na purinachu cangui.
Paicuna purina ñanmandaca, anchurinami cangui.
16Nalita rurangapaca, calpashpami rinajun.
Huañuchishpa yahuarta jichangapajpash, uchami rinajun.
17Alasyu tucui animalcuna ricujtaca,
yangallatami linllita churanga.
18Ashtahuangarin chai runacunaca,
paicunapaj llaquipajllatami, pacalla chapariashpa llaquichinajun.
Paicunapaj llaquipajllatami lazuta churanajun.
19Ñapash charijyangapaj ninandapacha
munajcunapaj causaica, chashnami tucujun.
Chai charishcallatami, chai charijcunataca causaita quichun.
20Ali yachaica, ñangunapi caparishpami cayajun.
Plazacunapimi ninanda caparijun.
21Jatun tandanajuicunapimi, caparishpa villajun.
Puebloman yaicuna pungucunapimi, paipaj
yuyaicunataca cashna nishpa villajun:
22“Nara yachajushcacuna, ¿ima horascamanda na
yachajushpa causangapaj munanguichi?
Asishpa ricujcuna, ¿ima horascamanda
asishpa ricunajungapajlla munanguichi?
Juizu illajcuna, ¿ima horascamanda
ali yachaitaca fiñajunalla canguichi?
23Ñuca jarcashpa rimashcata uyashpa tigrarimuichiyari.
Ricuichi, cangunapaj jahuapica, ñuca Espiritutami talinshna cachamusha.
Ñuca shimicunatapash yachachunmi villajusha.
24Cangunaca mashnata cayajpipash,
na uyangapaj munashpami causarcanguichi.
Maquita chutashpa cayajpipash, pipash na uyangapaj munarcachu.
25Ashtahuangarin ali yuyaita ñuca
cujpipash, yangapimi churarcanguichi.
Jarcashpa ñuca rimashcatapash na
uyangapaj munashpami causarcanguichi.
26Cangunata jatun llaqui japijpica, ñucapash asishami.
Canguna manllashca llaquicuna japijpipash, asishpami ricusha.
27Canguna manllashca llaquicunaca, tucuchinashnami shamunga.
Jatun llaquicunaca, jatun acapanashnami chayamunga.
Ninanda llaquichi tucuna, ninan llaquicunami
cangunataca japinga.
28Chai llaquicuna japijpimi, ñucata cayanajunga.
Shina cayanajujpica, ñucapash na tigrachishachu.
Ñucataca, tutamandatami mascanajunga.
Shina mascashpapash, ñucataca na tarihuangachu.
29Ali yachaita millanayachishpami,
Mandaj Diosta manllanataca na munanajurca.
30Ali yuyaita ñuca cushcata uyangapajpash, na munanajurcachu.
Jarcashpa rimajpipash, yangapimi churanajurca.
31Paicunapaj causaipi ima nalita rurashpa,
tarpushcatallatami micunshna causanajunga.
Paicuna yarishcata ruranajushpallatami millanayachinajunga.
32Imatapash na yachajcunataca, paicunapaj
panda causaillatami huañuchinga.
Shinlli shungucuna cushijushpa
causashcapash, chingaimanmi apanga.
33Ashtahuangarin ñucata uyashpaca,
imatallapash na manllashpami causanga.
Ima llaqui japinatapash na manllashpa,
aligutami causanga” nishpami villajun.
Who We AreWhat We EelieveWhat We Do
2025 by iamachristian.org,Inc All rights reserved.
