EZEQUIEL 27 - Quichua Imbabura Bible

1Mandaj Diosca cai shimicunatami, cashna nishpa villahuarca:

2“Huañuna aichayu runa. Tiro shuti pueblomandaca jatarishpa, yarishpa yarishpa huacayari.

3Mama cucha manñacunapi tiaj ashtaca pueblocunahuan jatushpa, randishpa causanajuj, mama cucha manñapillata tiajuj Tiro shuti pueblotaca, cashna ningui: Mandaj Jatun Diosmi, cashna nin: ‘Tiro shuti pueblolla, canga tucuimanda yali juyaillagumi cani’ nijurcanguimi.

4Cambaj linderocunaca, mama cucha chaupipimi tiajun. Canda shayachijcuna rurashpa tucuchijpimi, juyaillagupacha tucurcangui.

5Caspicunahuan ruranataca, Senir shuti urcumanda hayas nishca caspicunahuanmi, candaca ruranajurca. Jatun barco chaupipi caspita shayachingapajpash, Líbano shuti urcumandami cedro quirucunata apamunajurca.

6Barcota purichina caspicunataca, Basán shuti llactamanda encina nishca caspicunatami ruranajurca. Can tiarinacunataca, Quitim shuti llacta ladomanda pino caspicunapi marfilta churashpami ruranajurca.

7Barcota purichingapaj huairata japina telacunaca, Egiptopi bordashca ali juyailla telacunami carca. Carpatapash, mama cucha manñacunapi tiaj Elisa shuti llactamanda azul, yanalla puca telahuanmi ruranajurca.

8Cambaj barcota, caspihuan purichijcunaca, Sidón shuti, Arvad shuti pueblocunapi causajcunami carca. Tiro shuti pueblolla, alipacha yachajushca runacunaca, cambimi causanajurca. Paicunami, cambaj jatun barcocunataca purichinajurca.

9Gebal shuti pueblomanda rucucunapash, barcota ruranata ashtahuan ali yachaj runacunapashmi, barco chijtarishcacunata alichinajurca. Tucui barcocunapash, chai barcocunata caspihuan purichijcunapashmi jatungapaj, randingapaj cambajman shamunajurca.

10Cambaj soldadocunahuanga, Persia, Lud, Fut shuti llactacunamanda macanajunata ali yachaj soldadocunami carca. Cambica, jarcarina escudocunata, umapi churajuna jirrucunatami huarcunajurca. Chaicunami candaca punchayachinajurca.

11Shinallata Arvad shuti pueblomanda runacunaca, cambaj soldadocunandimi, muyundi cambaj pirca jahuacunapi shayanajurca. Gamadeo nishca gentecunaca, cambaj torrecunapimi shayanajurca. Paicunapaj jarcarina escudocunataca, cambaj muyundi pirca jahuacunapimi huarcunajurca. Chaicunahuanmi, ashtahuan juyaillagupacha tucurcangui.

12Canga, imatapash ashtacatapacha charijpimi, Tarsis shuti pueblopi causajcunaca, culquita, jirruta, estañota, plomota apashpa, cambaj plazacunapi randishpa jatungapaj shamunajurca.

13Javán, Tubal, Mesec shuti llactacunamandapashmi, randishpa jatungapaj cambajman shamunajurca. Paicunaca runacunata, broncemanda rurashcacunata apashpami, cambaj plazacunapi randishpa jatungapaj shamunajurca.

14Togarma shuti llactapi causajcunapash caballocunata, macanajuicunapi ali calpaj caballocunata, mulocunata apashpami, cambaj plazacunapi randishpa jatungapaj shamunajurca.

15Dedán shuti llactamandapash, cambajmanmi purishpa jatungapaj shamunajurca. Mama cucha manñacunapi ashtaca causajcunaca, jatunacunatami cambajmanda japishpa apanajurca. Paicunaca, marfil quirucunata, ébano caspicunatami canman cunajurca.

16Edom shuti llactapi causajcunapashmi, can ashtaca charishcacunata randishpa jatunajurca. Paicunaca: perlascunata, yana puca telacunata, bordashca churajunacunata, tucuimanda yali ali lino telacunata, coralcunata, rubíes rumicunata apashpami, cambaj plazacunaman shamunajurca.

17Judá llactapi causajcunapash, israelcunapashmi, randishpa jatungapaj cambajman shamunajurca. Paicunaca: Minit shuti, Panag shuti pueblocunamanda trigota, balun mishquita, aceiteta, resinata apashpami, cambaj plazacunapi randishpa jatungapaj shamunajurca.

18Damasco shuti pueblopi causajcunaca, can imatalla rurashpa ashtaca charishcamanda, ashtahuan ima juyaillacunata charishcamandami, Helbón shuti pueblomanda vinota, yuraj milmata apashpa, randishpa jatungapaj shamunajurca.

19Shinallata Dan shuti pueblopi causajcunapash, Javán shuti llactapi causanajuj caita chaita purij gentecunapashmi, cambaj plazacunaman shamunajurca. Paicunaca, labrashca jirruta, mirra yacuta, mishquilla ashnajuj viruta apashpami, cambaj plazacunapi jatushpa randingapaj shamunajurca.

20Dedán shuti llactamanda runacunaca, carretacunapi churana ninan valishca pañocunatami canman jatunajurca.

21Arabia llactapi causajcunapash, Cedar shuti ailluta tucui mandajcunapash, maltun llamacunata, jari llamacunata, jari chivocunata apamushpami, purishpa jatungapaj cambajman shamunajurca. Caicunata randishcatami, canman jatunajurca.

22Sabá shuti llactamanda, Raama shuti aillumanda jatujcunaca, canmanmi jatushpa randinajurca. Paicunaca, tucuimanda yali mishquilla ashnajujcunata, juyailla tucuilla rumicunata, orota apamushpami, cambaj plazacunaman shamunajurca.

23Harán, Cane, Edén shuti pueblocunapi causajcunapash, Sabá, Asiria, Quilmad shuti llactacunapi causajcunapashmi, imatapash randishpa jatungapaj, canhuan ari ninajurca.

24Canman jatujcunaca, tauca imalla charishcacunatami canman randishpa jatunajurca. Bordashca azul churajunacunata, cajonbi churashca juyailla churajunacunata, racuta caupushca puchacunahuan huatashca churajunacunata, cedro caspicunatapashmi jatunajurca.

25Tarsis shuti pueblomanda barcocunami, can imatalla randishcacunataca, ashtaca gentecunashna apamunajurca. Chaimandami canga, ninan charij tucurcangui. Mama cucha chaupipica, imata cashpapash ninandapachami mirachijurcangui.

26Cambaj barcocunata caspihuan purichijcunami candaca, ashtaca yacu chaupiman pusharca. Indi llujshimuj ladomanda cunujlla huaira shamushpami candaca, mama cucha chaupipi pambarca.

27Ashtacata can charishcacuna, imatalla can randishcacuna, randishpa can apamushcacuna, barcocunata caspihuan purichijcuna, jatun barcota purichijcuna, barco chijtarishcacunata alichijcuna, cambaj jatunacunata ricujcuna, macanajunata ali yachaj, cambi causanajuj tucui soldadocuna, cambi causanajuj tucui ashtaca gentecunapashmi cambica causanajun. Can llaquichi tucujui punllacunapica, paicunapashmi mama cucha chaupipi huashajunga.

28Shinallata yacupi purinata yachajcuna ninanda caparijta uyashpami, mama cucha manñapi causajcunaca chujchunajunga.

29Barcocunata caspihuan tucui purichijcunapashmi, jatun barcocunamanda uriajunajunga. Barcota caspihuan purichijcunapash, mama cuchapi jatun barcocunata purichijcunapash alpapimi quedanajunga.

30Cambica, jatun llaquinayaita caparishcami uyaringa. Umapipash, alpatami churarinajunga. Uchufapipashmi, caiman chaiman urmanajunga.

31Canmandaca, ajchatami ruturinajunga. Cañamutami cinturaspi huatarinajunga. Canmandaca, shungu ucupi nanarishpami, yarishpa yarishpa ninanda llaquirishpa huacanajunga.

32Paicunaca, ninanda llaquirishpami yarishpa yarishpa huacanajunga. Paicunaca: ‘Mama cucha chaupipi tucuchi tucushca Tiro shuti puebloshnaca, ¿pita tiarcayari?’ nishpami, yarishpa yarishpa huacanajunga.

33Cambaj jatun barcocunapi imalla jatunacunata apashpaca, ashtaca gentecunatami cushichijurcangui. Llactacunata jatun mandajcunatapash, ashtaca cambaj charishcacunahuan, cambaj jatunacunahuanmi ninanda charijyachircangui.

34Mama cucha manllanayai yacu ucucunapi llaquichi tucuna punllapica, cambaj jatunacunapash, cambi causaj ashtaca gentecunapashmi, cambaj chaupipillata huashajunga.

35Mama cucha manñacunapi tucui causajcunaca canda ricushpami manllarinajunga. Paicunata jatun mandajcunapash, manllarishpami chujchunajunga. Paicunapaj ñavicunapash, shujpachami tucunajunga.

36Shuj pueblocunapi randishpa jatujcunapashmi, candaca silbachinajunga. Canga, jatun manllarinami tucungui. Causaita causaicamanmi illangui” nijurcami.