1 SAMUEL 23 - Quichua Imbabura Bible

1Davidman villashpami, cashna ninajurca: “Ricui, filisteocunaca, Keila shuti pueblopi causajcunata macashpami, trillana pambacunamanda granocunata shuhuashpa apanajun” ninajurcami.

2Chaimandami Davidca: —¿Chai filisteocunahuan macanajungapaca ripashachu?— nishpa, Mandaj Diosta tapurca. Shina tapujpimi Mandaj Diosca, Davidtaca cashna nirca: —Filisteocunahuan macanajushpa, Keila shuti pueblopi causajcunata quishpichigrilla— nircami.

3Ashtahuangarin Davidhuan purij runacunaca, cashnami ninajurca: —Ricui, cai Judá llactapi cashpallatami, ñucanchica ña manllanajunchi. Keila shuti puebloman rishpa, filisteo soldadocunahuan macanajungapacarin ashtahuanmi manllanayanga— ninajurcami.

4Shinamandami Davidca, Mandaj Diosta cutin tapurca. Shina tapujpimi Mandaj Diosca, cashna nirca: —Jatarishpa, Keila shuti puebloman urai rilla. Ñucami filisteocunataca, cambaj maquipi churasha— nircami.

5Shina nijpimi Davidca, paipaj runacunandi, Keila shuti puebloman rishpa, filisteocunahuan macanajushpaca, paicunapaj animalcunatapash quichurca. Shinallata ashtacacunatami, huañuchishpa misharca. Shinami Davidca, Keila shuti pueblopi causajcunataca quishpichirca.

6Ahimelec runapaj churi Abiatar runa pacajushpa, Davidta catishpa Keila shuti puebloman rijushca punllami, cashna tucurca: Paica, efod nishcata apashpami, urai rirca.

7Keila shuti puebloman David shamushcataca, ñami Saulman villashca carca. Chaimandami Saulca, cashna nijurca: “Taita Diosmi, ñuca maquipi churashca. Chaimandami, Davidllata puebloman yaicushpa, pungucunata vicharishpa, aldabacunahuan jarcarishca” nijurcami.

8Shinamandami Saulca, Keila shuti pueblopi macanajungapaj urai ringapaj, tucuilla runacunata tandachirca. Paica Davidtapash, paipaj runacunatapashmi, chaupipi churasha yajurcami.

9Ashtahuangarin chashna huañuchingapaj Saúl munajujta yachashpami Davidca, Abiatar curataca: —Efodta apamui— nirca.

10Chai jipami Davidca, cashna nirca: —Israelcunata Mandaj Taita Dioslla. Keila shuti pueblotaca ñucamandami, Saulca tucuchij shamungapaj munajujta, canda servij ñucaca yachapani.

11¿Keila shuti pueblo ladollapi causajcunaca, paipaj maquipi ñucata churangachu imashi? ¿Canda servij ñuca yachashcashnallata Saulca, urai shamungachu imashi? Israelcunata Mandaj Taita Dioslla, canda servij ñuca tapushcataca, uyashpa villahuayari— nijpimi, Mandaj Diosca: —Ari, cangunataca urai shamungami— nirca.

12Davidca, cutinllatami cashna nirca: —¿Keila shuti pueblo ladollapi causajcunaca ñucatapash, ñuca runacunatapash, Saulpaj maquipi churangachu imashi?— nijpimi, Mandaj Diosca: —Ari, paiman cungami— nirca.

13Shina nijpimi Davidca, jatarishpa paihuan purij sucta patsajshna runacunandi, Keila shuti pueblomanda llujshishpa, caiman chaiman purinajurca. Keila shuti pueblomanda pacajushpa David rishcata Saulman villajpimi, na rishpa quedarca.

14Davidca, jichushca pambapimi, pircashca huashacunapi pacajushpa causangapaj quedarca. Chaica, Zif shuti jichushca pambapi tiaj shuj lomapimi carca. Punllandi Saúl mascajujpipash Taita Diosca, Davidtaca na paipaj maquipi churarcachu.

15Shinallata Davidca, paita huañuchingapaj Saúl mascangapaj llujshishcata yachashpami, Zif shuti jichushca pambapi tiaj Hores shuti pambapillata quedarca.

16Chaita yachashpami Saulpaj churi Jonatanga, Hores shuti pambapi Davidpajman shamushpaca, Taita Diostalla yarichun ashtahuan shinllichijurca.

17Paica cashnami nirca: —Ama manllaichu, ñuca taita Saulca, candaca na taringachu. Canmi, israelcunata jatun mandaj tucungui. Shinallata ñucapash, cambaj cati mandajmi tucusha. Chaitaca, ñuca taita Saulpash alimi yachan— nircami.

18Cutinllatami Mandaj Diospaj ñaupajpica, ishcandillata ari ninajurca. Davidca, Hores shuti pambapillata quedajpimi Jonatanga, paipaj huasiman tigrarca.

19Chai jipami, Zif shuti pueblopi causajcunaca, Gabaa puebloman vichai rishpa, Saulman cashna ninajurca: —¿Nachu Davidca, ñucanchi llacta Hores shuti pambapi tiaj jaca rumi ladocunapi pacajushca? Chai jaca rumica, jichushca pamba ura ladoman tiaj Haquila shuti loma ladopimi.

20Shina cashcamandaca jatun mandajlla, can munashcashna cunanda ucha urai shamunguilla. Shinallata ñucanchica, can jatun mandajpaj maquipi churashunllami— ninajurcami.

21Shina nijpimi Saulca, cashna nijurca: —Ñucata llaquishcamandaca, Mandaj Diosllata cangunatapash bendiciapachun.

22Cunanga richilla. Maipi pacajushca pushtutapash, ali ricushpa rijsigrichi. Shinallata pi ricushcatapash, ali yachaichi. Paica, imapajpash ninan alipacha yachaj cajtami villahuashca.

23Ali ali ricushpa maipilla pacajujtapash tapushpa tucuita alipacha yachashpaca, ñucaman villaj shamunguichilla. Chashna villajpica, cangunahuan rishallami. Shinallata chai llactapillata cajpica, Judá llactapi tucui causanajuj huaranga huaranga puracunapipash mascashallami— nijurcami.

24Shina nijpimi paicunaca, Saulpaj ñaupajmanda jatarishpa, Zif shuti puebloman tigrarca. Ashtahuangarin Davidca, Arabá llacta jichushca pamba ura ladoman tiaj Maón shuti jichushca pambapimi, paipaj runacunandi carca.

25Saulca, paipaj soldadocunandimi, mascangapaj rijurca. Chaita Davidman villajpimi, Maón shuti jichushca pambapi tiaj jatun rumi ladoman urai rirca. Chaita Saúl yachashpami, Maón shuti jichushca pambacaman Davidta catishpa rirca.

26Saulca, shuj lado urcuta rijujpimi, Davidpash paipaj runacunandi, caishuj lado urcuta Saulta pacajungapaj, ninanda calpashpa rinajurca. Ashtahuangarin Saulca, paipaj soldadocunahuanmi Davidtaca, paipaj runacunandi japingapaj, chaupipi churashca carca.

27Shina cajpimi, Saulpajman shuj villaj chayamushpaca: —Ucha shamui. Filisteocunami, ñucanchi llactapi macanajungapaj yaicumushca— nirca.

28Shina villajpimi Saulca, Davidta huañuchingapaj catijushcata saquishpa, filisteocunahuan macanajungapaj tigrarca. Chaimandami chai pambataca, “Sela-hama-lecot” nishpa shutichinajurca.

29Shinamandami Davidca, chaimanda vichai rishpaca, En-gadi shuti jichushca pambapi, pacajungapaj pircashca pata huashacunapi causarca. Davidca, Saultami En-gadi shuti pambapica, na huañuchishpa saquishca