NEHEMÍAS 4 - Quichua Imbabura Bible

Fiñajcuna ama llaquichinajuchunmi cuidanajushca

1Jerusalén muyundi jatun pircata ñucanchi alichinajujta Sanbalat shuti runa yachashpami, ninandapacha fiñarishpa, Judá llactapi causajcunataca na cazushpa asijurca.

2Paica, paipaj cumbacunapaj ñaupajpipash, Samaria llacta soldadocunapaj ñaupajpipashmi, cashna nirca: “Judá llactapi causanajuj, cai na valij runacunaca, ¿imatata ruranajun? ¿Diosman animalcunata cushpa cutin rupachinajuchunga saquishunllu? ¿Chai jatun pircata alichinataca, shuj punllapillachu tucuchinga? ¿Rupashpa ñuturishca chai mundun rumicunataca, cutinllu alichinga?” nircami.

3Shinallata amonitapura Tobías shuti runapash, Sanbalat shuti runapaj ladopi cashpami, cashna nirca: “Paicuna shayachishca rumi pircashcataca, shuj atuj vitsiashpallatami urmachinga” nircami.

4“Ñucanchi Taita Dioslla, ñucanchita fiñaj runacuna ninanda nalicachishpa rimajtaca uyapairi. Chai rimashcacunaca, paicunapaj jahuapillata urmachun. Paicunataca, fiñajcunapash shuj llactaman prezu apashpa llaquichinajuchun saquipanguilla.

5Paicuna nalita rurashcataca, ama cungapanguichu. Paicunapaj juchatapash ama anchuchipanguichu. Paicunaca, pircata shayachijcunatami fiñarca” nishpami mañarcani.

6Muyundi jatun pircata shayachishpaca, tucuilla pircatami, chaupicaman vichai shayachishpa tucuchircanchi. Tucui gentecuna chaita rurana munaita charijpimi, chashna rurarcanchi.

7Shina cajpipash, cashnami tucurca: Jerusalén muyundi jatun pircacunataca tucuillata alichijujta, pata utujucunatapash quilpajujtami Sanbalat shuti, Tobías shuti runacuna, arabecuna, amonitacuna, Asdod shuti pueblopi causajcuna yacharca. Shinamandami paicunaca, ñucanchitaca ninandapacha fiñarca.

8Shina fiñashpami, tucuicuna shujllashnalla parlarishpa, Jerusalenda llaquichishpa huaglichingapaj shamunata yarinajurca.

9Chaita yachashpami, ñucanchi Taita Diosta mañarcanchi. Paicuna ama yaicumuchunmi, tutandi punllandi cuidajcunata churarcanchi.

10Judá llactapi causajcunaca, cashnami ninajurca: “Cai pircacunata alichingapaj imatalla yalichijcunami, ushai illaj tucunajun. Ashtaca pircacuna urmashca cajpimi, jatun pircata alichitaca na ushanchi” ninajurcami.

11Ñucanchita fiñajcunaca, cashnami ninajurca: “Paicunapaj chaupiman yaicushpa, paicunata huañuchishpa, paicuna imata ruranajujtapash saquichingacaman ama yachachun, pipash ama ricuchun” ninajurcami.

12Ashtahuangarin paicuna purapillata causanajuj Judá llactamanda runacuna shamushpami, chungacaman cashna villanajurca: “Chai llaquichijcunaca, tucui ladocunamanda llujshimushpami, cangunataca llaquichingapaj shamunga” ninajurcami.

13Shina villajpimi ñucaca, tucui paicunapaj familiacuna imashna cashcashnallata pushashpa, jatun pircata nara jahuacaman pircashca huashapi, maipilla utujucuna tiashcapi espadacunahuan, lanzacunahuan, arcocunahuan cuidanajuchun churarcani.

14Chai jipaca, jatarishpa tucuita ricushpami, alicachi tucushcacunatapash, mandajcunatapash, tucui caishuj gentecunatapash cashna nircani: “Paicunapaj ñaupajpica, na manllanachu canguichi. Ashtahuangarin tucuita rurai ushaj, manllana jatun Diostami yarina canguichi. Cangunapaj huauquicunamanda, cangunapaj huahuacunamanda, cangunapaj ushicunamanda, cangunapaj huarmicunamanda, cangunapaj huasicunamandami, macanajuna canguichi” nircanimi.

15Ñucanchita fiñajcunaca, paicuna llaquichigrijujta ñucanchi yachashcatami yacharca. Shinallata Taita Diospash paicuna yarinajushcata yangapi churashcatapashmi yacharca. Chaimandami ñucanchica, jatun pircata alichingapaca, imata rurana cashcamanllata tucuicuna tigrarcanchi.

16Chai punllamandapachami, ñucata servijcunamanda shuj chaupica, jatun pircata alichinajurca. Shuj chaupica lanzacunahuan, escudocunahuan, arcocunahuan, jirru churajunacunata churajushcami shayanajurca. Paicunapaj huasha ladopica, Judá shuti runapaj huasi ucu puracunata mandajcunami cuidanajurca.

17Jatun pircata rurajcunapash, imatalla yalichijcunapash, rumita aparijcunapash, shuj maquihuanllami chai ruranataca ruranajurca. Shuj maquihuanga, espadatami charinajurca.

18Pircata shayachijcunaca, tucuicunami paicunapaj cinturaspi espadata huatarishcacuna carca. Chashnami, jatun pircataca shayachinajurca. Trompetata huacachij runaca, ñuca ladopimi shayajurca.

19Alicachi tucushcacunatapash, mandajcunatapash, tucui caishuj gentecunatapash, cashnami nircani: “Cai runacunaca, ashtacapacha cashcamandami, tucuicunallata shujmanda shujmanda shicanyarishca, carupi canchi.

20Canguna maipi cashpapash, trompetata huacachij uyarijpica, tucuicuna ñucanchihuan chaiman tandanajunguichilla. Ñucanchi Taita Diosmi, ñucanchimandaca macanajunga” nircanimi.

21Ñucanchica, pircata shayachishpa trabajangacamanmi, narapash ali punllayajmandapacha tutayangacaman, caishuj chaupicunaca lanzacunata chaririaj shayanajurca.

22Shinallata chaipi imatalla rurajcunataca, tucuicunatami cashna nircani: “Tucuicunami cangunata servijcunandi, cai Jerusalenbillata quedana canguichi. Tutacunaca cuidashpa, punllacunaca pircata alichishpami ali canga” nircanimi.

23Chaimandami ñucapash, ñuca huauquicunapash, ñucata servij chairalla viñaicunapash, churajunacunataca tutallapash na surcurcanchi. Armangapajllami churajunacunataca surcunajurcanchi.