Psalms 38 - Quichua Imbabura Bible

Nalita rurashcamanda ninanda llaquirishpa mañashcamiDios yarijuchun nishpa, David rurashca Salmomi.

1Mandaj Dioslla, ama ñapash fiñarishpa rimahuaichu.

Ama ninanda fiñarishpa llaquichihuaichu.

2Cambaj flechacunami, ñuca jahuapi urmamurca.

Cambaj maquipash ñuca jahuapimi llapimujushca.

3Can fiñarishcamandami, ñuca cuerpoca

tucuilla ungushca.

Ñuca juchamandami, ñuca tullucaman casilla

ali causaitaca na chari ushani.

4Jatun nalita ñuca rurashcacunami,

ñuca umapi shinllita llapimujun.

Llasha quipishnami, ñuca jahuapi shinllita llapimujun.

5Locoshna nalita rurashcamandami,

carachahuan ismushpa ashnajuni.

6Ninanda pingai tucushpami, urai cumurishcalla purijuni.

Yana churajunata churajushcashnami, punllandi purijuni.

7Ñuca huashatapash tucuillata rupajujpi

ñuca cuerpopash tucuilla ungushca

cajpimi, chashna purijuni.

8Ushai illajmi cani, ninanda ñutushcashnami cani.

Ñuca shungu nanaihuanmari aij nijuni.

9Jatun Dioslla, tucui imatalla ñuca

munashcapash, cambaj ñaupajpimi.

Jatunda ñuca llaquirijushcapash,

canmandaca na pacallachu.

10Ñuca shunguca, ninanda llaquichi tucushcamari.

Ñuca ushaipash, ña illanmi.

Ñuca ricujpi ñavipash amsayanmi.

11Ñuca cumbacunapash, ñucahuan purijcunapash,

ñucapaj ung:uita ricushpami caruyanajun.

Ñuca ladolla causajcunapashmi caruyashca.

12Ñucata huañuchingapaj mascanajujcunaca,

lazunshna urmachinatami yarinajun.

Ñucata llaquichingapaj munajcunapash,

nalicunatallami parlanajun.

Umachishpa quichunatallami, punllandi yarinajun.

13Ashtahuangarin ñucaca, rinri na

uyanshnami, imatapash na uyani.

Na rimai ushanshnami, imatapash na rimani.

14Shina cashpami, na uyaj runashna cani.

Ñuca shimihuanga, imata tigrachitapash na ushanichu.

15Mandaj Dioslla, candallami shuyajuni.

Ñucata Mandaj Taita Dioslla, canmi tigrachipangui.

16Ñucaca cashnami nircani: “Ñuca chaqui

lluchajpipash, ama cushijunajuchun,

ñucata ama jariyanajuchun” nircanimi.

17Ashtahuangarin ña urmanallapachami cani.

Nanaipash, ñucataca catipi catipimi japihuan.

18Shinamandami, nalita ñuca rurashcataca canman villasha.

Juchata ñuca rurashcamandaca, ninandami llaquirisha.

19Ñucata fiñajcunaca, ali yachashca,

ninan shinllicunami.

Ñucata yangamanda millanayachij runacunaca,

ashtahuanmi mirashca.

20Alita rurajpi nalita tigrachijcunaca,

ñuca alita rurashpa catishcamandami fiñahuan.

21Mandaj Dioslla, ama jichuhuaichu.

Ñuca Taita Dioslla, ama ñucamanda caruyapaichu.

22Ñucata quishpichij Jatun Dioslla,

uchalla ayudahuayari.