1Mandaj Dioslla, na ñucanchitaca
alicachinachu cangui, ama ñucanchita alicachinguichu.
Ashtahuangarin cambaj punchapamba shutita alicachipai.
Can llaquij, na llullaj cashcamanda chashna rurapai.
2¿Imashpata gentecunaca: “¿Cunanga, paipaj
Taita Diosca maipitayari?” ninajunga?
3Ñucanchi Taita Diosca, jahua pachapimi.
Paica, tucui ima munashcatami rurashca.
4Paicunapaj yanga dioscunaca orota, culquita,
runacunapaj maquihuan rurashcacunami.
5Shimita charishpapash, na parlanajunllu.
Ñavita charishpapash, na ricunajunllu.
6Rinrita charishpapash, na uyanajunllu.
Singata charishpapash, na ashnachinajunllu.
7Maquita charishpapash, na tacanajunllu.
Chaquita charishpapash, na purinajunllu.
Cungata charishpapash, na rimanajunllu.
8Chai dioscunata rurajcunaca, paicunaman rijchajcunami.
Pipash chai dioscunata yariashpa
causajpash, chaicunashnallatami.
9Israelcunalla, Mandaj Diosta yariashpa causaichi.
Paimi, cangunata ayudaj, canguna jarcarina escudo.
10Aaronbaj miraicuna, Mandaj Diosta yariashpa causaichi.
Paimi, cangunata ayudaj, canguna jarcarina escudo.
11Mandaj Diosta manllajcunaca,
Mandaj Diosta yariashpa causaichi.
Paimi, cangunata ayudaj, canguna jarcarina escudo.
12Mandaj Diosca, ñucanchita yarircami,
ñucanchitaca bendiciangami.
Taita Israelpaj miraicunataca bendiciangami.
Aaronbaj miraicunatapash bendiciangami.
13Mandaj Diosca, paita manllajcunataca,
uchillacunatapash, jatungunatapash bendiciangami.
14Mandaj Diosca cangunataca, ashtahuan
ashtahuanmi bendicianga.
Cangunatapash, cangunapaj miraicunatapashmi bendicianga.
15Cangunaca jahua pachata, cai pachata ruraj
Mandaj Dios bendiciashcami canguichi.
16Jahua pachaca, Mandaj Diospaj jahua pachami.
Cai pachataca, huañuna aichayu runacunamanmi cushca.
17Huañushcacunaca, Mandaj Diostaca na alicachingachu.
Chulunllaman urai rijcunaca, na alicachingachu.
18Ashtahuangarin ñucanchica, Mandaj Diostami
cunanmanda causaita causaicaman alicachishun.
Mandaj Diosta alicachinguichi.
Who We AreWhat We EelieveWhat We Do
2025 by iamachristian.org,Inc All rights reserved.
