SANTIAGO 2 - Quichua Imbabura Bible

Shujtaca alicachishpa, shujtaca nalicachishpa ricujcunata tacurishcami

1Ñuca juyashca huauquicuna, panicuna, punchapamba ñucanchi Apunchi Jesucristota crijcuna cashcamandami, na ñavita ricushpalla na chasquina canguichi.

2Canguna tandanajushpa tianajuj ucumanmi, oro surtijasta, punchapamba churajunata churajushca, ninan charij runa yaicun. Shinallata mauca churajunata churajushca, imagutapash na charij runagupashmi yaicun.

3Shina yaicujpica, punchapamba churajushca chai runataca: “Canga, ali pushtupi tiaripai” nishpami, cushijushpa tiachinguichi. Ashtahuangarin imagutapash na charij runataca: “Canga, chaipi shayajuilla, na cashpaca ñuca ura chaquiman tiari” ninguichimi.

4Chashna rurashpaca, ¿nachu canguna purapillata ñavita ricushpalla chasquishpa, nali yuyaicunata charij juezcunashna tucushcanguichi?

5Ñuca juyashca huauquicuna, panicuna, caita uyapaichi: ¿Nachu Taita Diosca, cai pachapi causanajuj imagutapash na charijcunatara agllashca? Paita ninanda crishpa charijyashpa, paita juyajcunaman pai mandajuj llactaguta carashapacha nishcata japigrichunmi agllashca.

6Ashtahuangarin cangunaca, imagutapash na charijcunatamari rimashpa pingaichishcanguichi. ¿Nachu ninan charijcunaca, cangunata llaquichishpa charinajun? ¿Nachu paicunallata cangunataca, juezcunapajman aisashpa apanajun?

7¿Nachu chai charij runacunallata, cangunamanda mañashca juyailla shutiguta nali shimicunahuan rimanajun?

8Diosca, pai escribichishca Shimipimi, cashna nishpa tucuita yali mandajun: “Cumba runagutaca, canllata juyarinshnallatami juyana cangui” nijunmi. Cashna mandashcata pactachijushpaca, aligutamari ruranajunguichi.

9Ashtahuangarin ñavita ricushpalla chasquishpaca, juchatami ruranajunguichi. Chaimandami canguna nalita ruranajujtaca, mandashca shimillata ricuchinga.

10Mandashca shimicunata tucuita pactachijushpapash, shujguta na pactachishpallatami, mandashca shimicunataca tucuillata na pactachijuj ricuringui.

11“Cazarashca jahua, na shujhuan causanachu cangui” nijuj Diosllatami: “Ama huañuchinguichu” nishca. Canga, cazarashca jahua na shujhuan causashpapash huañuchishpaca, mandashca shimicunatami na cazushcangui.

12Huatashcashna causanajujmanda cacharichij mandashca shimimi, canguna imata rurashpa causashcatapash ricuchimunga. Shinamandami aliguta rimashpa, aliguta rurashpa causana canguichi.

13Shujcunata na llaquijcunataca, Diospash na llaquishpami llaquichijunga. Ashtahuangarin llaquishpa causanami, llaquichi tucunatapash mishajun.

Crij cashpapash, alita ruranacunata na rurashpaca huañushcashnami

14Ñuca juyashca huauquicuna. Crijmi cani nijushpapash, alita ruranacunata na rurajushpaca, ¿imapajllapash alichu canga? ¿Crishcamandalla quishpiringachu?

15Crij huauqui cashpa, pani cashpapash churajuna, micunagu illaj causajujta ricushpapash,

16canguna puramanda maijanga, cashnami ninguichi: “Aliguta ripanguichi. Aliguta churajupanguichi, micuitapash aliguta micunguichi” ninguichimi. Cashna nijushpapash, cuerpopaj imagu illashcata na carashpaca, ¿alichu canga?

17Shinallatami crij cashcapash, alita ruranacunata na rurashcamanda, pai crishcapash huañushcashna tucushca.

18Maijan cashpapash: “Canga crishpallami purijungui, ñucami alita rurashpa pactachijuni” ninguichimanmi. Shina nijcunataca, alita ruranacunata na rurajushpapash, crij cajta ricuchihuai ninimi. Ñuca crij cajtaca, alita ruranacunata rurajushcahuanmi ricuchisha.

19Cambash, shujlla Taita Dios tiajtaca cringuimi, chaica alimi. Ayacunapash, shinallatami crishpa chujchunajun.

20Upashnamari cangui. ¿Alita ruranacunata na rurajujpica, can crishcapash huañushcashna cajta yachangapaj munanguichu?

21Ñucanchi ñaupa taita Abrahamdaca, ¿nachu paipaj churi Isaacta altarpi Diosman carajpi, imatapash cashcatapacha rurashcatashna ricushpa chasquirca?

22Abrahamga, chai ruranacunata rurashpami, pai crij cajtaca ricuchishca. Chai ruranacunata rurashcamanda, pai crishcapash ashtahuan alipacha tucushcataca, ¿nachu ricungui?

23“Taita Diosta Abraham crijpimi, imatapash cashcatapacha rurashcatashna ricushpa chasquirca” nijunmi. Shinallata Taita Diospaj ali cumbagumi ni tucushcapashmi carca. Shina cajpimi, escribishcapi villajushcapash pactarca.

24Alita ruranacunata rurashcamandapash Diosca, imatapash cashcatapacha rurashcatashna chasquinllami. Ashtahuangarin na crijllapi chasquijtami, ña ricunguichi.

25Culquimanda huainayaj Rahab shuti huarmica, paipaj llactata ricungapaj rinajuj runacunataca mingachishpa, shuj ñanda ricuchishpami cachashca. ¿Nachu shina alita ruranacunata rurajpi, Diosca imatapash cashcatapacha rurashcatashna chasquishca?

26Imashnami cuerpoca, alma illajpi ña huañun, chashnallatami crishcapash alita ruranacunata na pactachijpica, huañushcashna yanga tucun.