Psalms 59 - Quichua Imbabura Bible

Fiñajcunamanda cacharichijuchun, Diosta mañashcami(1 Sam. 19:11)Ama tucuchihuaichu nishpa candana tonopi, candajcunata mandaj candachijuchun, David rurashca juyailla candanami. Cai candanataca, paita huañuchingapaj Saúl cachajpi, paipaj huasipi chapanajushca jipami rurashca.

1Ñuca Taita Dioslla, ñucata

fiñajcunamanda cacharichihuayari.

Ñucata llaquichingapaj jatarijcunamanda quishpichihuayari.

2Nalita rurajcunamanda cacharichihuayari.

Huañuchij runacunamanda quishpichihuayari.

3Ricui, ashtahuangarin ñucata

huañuchingapajmi pacalla chaparianajun.

Ushaita charij runacunami,

ñucata llaquichingapaj tandanajushca.

Mandaj Dioslla, imapash nalita ñuca rurashcamanda,

juchata ñuca rurashcamandaca, na canllu.

4Ñucataca, juchata na rurajpitami,

catishpa calpamunajun.

Ñucata tuparij shamungapaj jatarishpa ricuhuayari.

5Tucuita Mandaj Taita Dioslla,

canga israelcunapaj Taita Diosmi cangui.

Tucui llactacunapi causajcunata

llaquichingapaj jataripairi.

Canda na cazushpa, nalita tucui

rurajcunataca, pitapash ama llaquipaichu. Selah

6Chishi tigrashpaca, alcushna

huacashpami pueblota muyunajunga.

7Ricuichi, paicunapaj shimihuan jariyashpami rimanajun.

Paicunapaj shimipica, espadashnami tian.

Shinamandami: “¿Pita uyangayari?” ninajun.

8Ashtahuangarin can Mandaj Diosca,

paicunataca asinguimi.

Llactacunapi tucui causajcunataca,

asishpami ricungui.

9Ñucata fiñajcuna ninan ushaita

charishcamandami, candalla shuyajusha.

Taita Diosca, ñucata mitsashpa

ayudaj cajpimi, chashna shuyajushca.

10Ñucata llaquij Taita Diosmi,

ñucata ñaupashpa ringa.

Taita Diosmi, ñucata fiñajcunataca,

ñuca munashcata rurashpa ricuchihuanga.

11Ñuca llacta gentecuna ama cungachunga,

ama huañuchipaichu.

Paicunataca, cambaj ushaihuan caita chaita

cachashpa, ñavita urai cumuchipailla.

Mandaj Dioslla, canga jarcarina

ñucanchi escudoshnami cangui.

12Paicunapaj shimihuan juchata rurashcamanda,

paicunapaj shimihuan llaquichishcamandaca, paicuna

jariyashpa rimashcapillata prezu japi tucunajuchun.

Llaqui japishpaca alichari canman nishcamanda,

llullashpa rimashcamanda, chashna tucuchun.

13Ñapash fiñarishpa tucuchipairi,

ama ashtahuan tiachun tucuchipairi.

Jacobopaj mirai llactapica, tucui cai

pacha manñacunacaman Taita Diostaca

mandajujta yachachun, chashna rurapairi. Selah

14Chishi tigrashpaca, alcushna

huacashpa pueblota muyunajuchun.

15Paicunaca, micunata mascashpalla,

maitapash purinajuchun.

Vijsa pactajta na micushpaca, tucui tuta

aij nishpa pacarinajuchun.

16Ashtahuangarin ñucaca, cambaj tucui ushaitami candasha.

Tutamandaca, can llaquij cashcamandami alicachisha.

Ninan llaquita apajui punllapi ñucata ayudaj,

ñucata pacaj cashcamandami, chashna alicachisha.

17Ñuca shinlli torreshna Dioslla, candami candasha.

Taita Dioslla, ñucata pacaj, ñucata

llaquij Taita Dios cashcamandami candasha.