1Jatun mandaj Ezequías shuti runaca, chuscu chunga huatata ña mandajujpimi, cashna tucurca: Asiria llactata jatun mandaj Senaquerib runaca, jatun pircacunahuan jarcashca Judá llactapi tiaj pueblocunapi causajcunahuan macanajungapaj vichai shamushpami, chai pueblocunataca japirca.
2Asiria llactata jatun mandajca, paipaj cati mandaj Rabsaces nishca runatami, ashtaca soldadocunahuan Laquis pueblomandaca, Jerusalenbi jatun mandaj Ezequías runahuan macanajuchun cachamurca. Paicuna shamushpaca, janaj ladopi tiaj tanqueman shamuj yacu larca ladopimi, carpacunata shayachishpa tianajurca. Chaica, Tajshajcunapaj alpaman rina ñambimi carca.
3Chaipi cajpimi, jatun mandaj Ezequías runapash, mayordomo Eliaquim shuti runapash, escribij Sebna shuti runapash, jatun mandajpaj randi rimaj Joa shuti runapash, chai mandajta tuparingapaj llujshinajurca. Eliaquim runaca, Hilcías shuti runapaj churimi carca. Joa shuti runaca, Asaf shuti runapaj churimi carca.
4Paicunatami Rabsaces nishca mandajca, cashna nijurca:
—Cunanga, Ezequiastaca cashna nigrichi: Asiria llactata alipacha jatun mandajca, cashnami nin: ‘¿Imata yarishpata shinlli taunarinshna tucungui?
5Ñucaca cashnami nini: Jatun macanajuita rurangapaj ushaita charinimi yashpa can parlajushcapash, yanga shimicunallami. ¿Canga, maijanda yariashpa causashpata, ñucata na manllashpa jariyangui?
6Ricui, canga cai tucurinalla sucus taunashna Egipto llactatami yariashpa causangui. Maijambash caipi taunarijpica, jamzi caspi maquipi yalijta yaicushpa chugrichinllami. Egipto llactata jatun mandaj Faraonga, tucui paita yariashpa causajcunapaca, chai taunashnami.
7Cangunaca: Ñucanchita Mandaj Taita Diostami yariashpa causanajunchi ninguichipashchari. ¿Nachu cai lomacunapi tiaj huasicunata, altarcunataca Ezequiasllata anchuchirca? Chaicunata anchuchishpaca, ¿nachu Judá llactapi, Jerusalenbi causajcunataca, cai altar ñaupajpimi Diostaca ninanda alicachina canguichi nishpa mandarca?
8Cunanga, Asiria llactata jatun mandaj ñuca amoman soldadocunata cupairi nipanimi. Caballopi tiarij soldadocunata can cui ushajpica, ñucapash ishcai huaranga caballotami canman cusha.
9Egiptomanda carretacunata, caballopi tiarij soldadocunata yariashpa causajushpapash, ñuca amopaj soldadocunata mandaj puramanda ashtahuan cati mandajhuambash, ¿imashnashi shinlli tucushpa macanajui ushangui?
10¿Cai llactata tucuchingapaca, Mandaj Dios na mandajpitachu shamushcani? Mandaj Diosllatami, ñucataca: Chai llactaman vichai rishpa tucuchigri nihuarca’ ninmi nigrichi— nijurcami.
11Shina nijpimi Eliaquim, Sebna, Joa shuti runacunaca, Rabsaces nishca mandajtaca cashna ninajurca:
—Canda servij ñucanchitaca, arameo shimipi rimapai nipanchimi. Ñucanchica, chai shimitaca yachapanchimi. Ashtahuangarin ama cai Judá llactapi causajcunapaj shimipi rimapaichu. Can imatalla nijtaca, pirca jahuapi tianajuj gentecunaca uyanajunmi— ninajurcami.
12Shina nijpimi Rabsaces nishca mandajca, cashna nirca:
—¿Ñuca amoca, cai shimicunataca canman, cambaj amomanlla villachunlla cachamuhuashca? ¿Nachu cai jatun pirca jahuapi shayanajuj gentecunamambash villachun cachamuhuashca? Paicunapash, cangunahuanllata paicuna mapayachishcata micungapaj, paicuna yacu ishpashcata ufiangapajmi shuyanajun— nircami.
13Shina nishca jipami, Rabsaces nishca mandajca ali shayarishpa, Judá llacta rimaipi shinllita caparishpa, cashna nijurca:
—Alipacha jatun mandaj rimashcata uyaichi. Paica, Asiria llactata jatun mandajmi.
14Pai jatun mandajca, cashnami nin: ‘Cangunaca, Ezequías umachijuchunga, na saquinachu canguichi. Paica, na cacharichi ushangachu.
15Ezequías runaca, Mandaj Diosta canguna yariashpa causanajuchunga, cashnami nijunga: Mandaj Diosca, ñucanchitaca quishpichingapachami. Cai pueblotaca, Asiria llactata jatun mandajpaj maquipica, na churangachu nijungami.
16Ezequiastaca na uyanachu canguichi. Asiria llactata jatun mandajca, cashnami nin: Casilla ali causai tiachun ñucahuan parlashpa, ñucapajman llujshimuichi. Shina rurashpaca, tucuicunami cangunapaj uvas chagramanda, olivos chagramanda micunguichi. Yacutapash, cangunapaj pugyumandami tucuicuna ufianguichi.
17Cangunapaj cai llactapishnallata, ali granocunapash, vinopash, tandapash, uvas chagracunapash tiaj llactaman ñuca pushaj shamungacamanmi, chashna causanguichi.
18Ricuichi: Mandaj Diosca cacharichingallami nishpa, cangunata Ezequías umachijuchunga, na saquinachu canguichi. Caishuj llactacunapaj dioscunaca, ¿maijan diospash paipaj llactataca, Asiria llactata jatun mandajpaj maquimanda cacharichi usharcachu?
19¿Hamat, Arfad, Sefarvaim shuti pueblocunapi causajcunapaj dioscunaca maipita? ¿Chai dioscunaca, Samaria pueblotaca ñuca maquimanda cacharichi usharcachu?
20Cai llactacunapi tiaj dios puracunamandaca, paipaj llactata ñuca maquimanda quishpichi ushaj diosca, ¿maijan diospash tianllu? ¿Mandaj Diosrachu Jerusalendaca, ñuca maquimanda quishpichi ushanga?’ ninmi— nijurcami.
21Chashna nijujpipash paicunaca, imatapash na nishpa upalla uyanajurcallami. Jatun mandaj Ezequiasmi, paicunataca: “Imatapash na tigrachinachu canguichi” nishca carca.
22Chai jipaca, mayordomo Eliaquim shuti runapash, escribij Sebna shuti runapash, jatun mandajpaj randi rimaj Joa shuti runapash, paicunapaj churajushcata liquishpami, Ezequías runapajman shamurca. Shina shamushpami, Rabsaces nishca mandaj imatalla nishcata villanajurca. Eliaquim runaca, Hilcías shuti runapaj churimi carca. Joa shuti runaca, Asaf shuti runapaj churimi carca.
Who We AreWhat We EelieveWhat We Do
2025 by iamachristian.org,Inc All rights reserved.
