JEREMÍAS 49 - Quichua Imbabura Bible

Amonitacunata llaquichinatami villashca

1Mandaj Diosca, amonitacunata llaquichinamandaca, cashnami nin: “Israelcunaca, ¿nachu huahuacunata charin? Paicuna taitamanda imaguta charishcacunata chaupiringapaca, ¿nachu pipash tian? ¿Imashpata Milcom shuti diosca, Gad shuti aillupaj llactataca quichushca? ¿Imashpata paipaj gentecunara, chai pueblocunapi causanajun?” ninmi.

2Shinamandami Mandaj Diosca, cashnatapash nin: “Amonitacunapaj Rabá shuti pueblopica, jatun macanajui callaringapaj caparinajujta uyana punllacunami chayamujun. Chai puebloca, tucuillami urmachi tucunga. Chaipi tiaj tucui caishuj pueblocunapash rupachi tucungami. Israelcunaca, paicunata quichushca pueblocunataca, cutinmi japinajunga” ninmi Mandaj Diosca.

3“Hesbón shuti pueblopi causajcunalla, huacaichiyari. Hai shuti puebloca, ñamari tucuchi tucushca. Rabá shuti pueblopi causajcunalla, ninanda caparishpa huacaichiyari. Cañamuta churajushpa, yarishpa yarishpa huacashpa, pirca huashacunata muyuichiyari. Cangunapaj Milcom diosca, paipaj curacunandi, paipaj mandajcunandimi, prezu apai tucushca.

4Shinlli shungupacha tucushca huarmishna causajcunalla, ¿imashpata cangunapaj pugru pambacunahuan jariyanguichi? Cangunapaj pugru pambacunaca, tucuchi tucurcamari. Canguna imapash ninan valishcacunata charishcacunatalla yariajlla causashpami: ‘¿Pita ñucanchitaca, llaquichingapaj shamungayari?’ ninajunguichi” ninmi.

5Tucuita Mandaj, Jatun Diosca cashnatapashmi nin: “Ricuichi, ñucami cangunapaj tucui muyundi llactacunamanda jatun manllaita apamugrini. Shinamandami tigrashpapash, na ricushpa ñaupajman calpanguichi. Shina calpashpa pacajushca purinajujta cutin tandachij runaca, pipash na tiangachu.

6Ashtahuangarin chai jipaca, amonitacuna prezu apai tucushcataca, ñucallatami tigrachimusha” ninmi Mandaj Diosca.

Edom shuti llactata llaquichinatami villashca

7Tucuita Mandaj Taita Diosca, Edom llactata llaquichinataca, cashnami nin: “Temán shuti llactapica, ali yachaica, ¿ñachu illan imatayari? Alipacha yachajushcacunaca ali yuyaita cunapash, ¿ñachu tucurishca imatayari? Paicuna yachajushcapash, ¿yangachu tucushca imatayari?

8Dedán shuti pueblopi causajcunalla, calpashpa huashaman tigrashpa utuju ucucunapi causagrichiyari. Esaupaj miraicuna llaquichi tucuna punllapillatami, jatun llaquita cachamugrini.

9Uvasta pallajcuna, canda fiñashpa pallaj shamushpaca, ¿nachu asha pallajunata saquinman carca? Shuhuacuna tuta shamushpapash, ¿nachu apai ushanatalla apanman carca?

10Ashtahuangarin Esaupaj miraicunataca, lluchullatashnami saquisha. Paicuna maipi pacajushcapash ricuringallatami. Shinamandami, maipi pacajuitapash na ushanajunga. Chashnami Esaupaj miraicunapash, paipaj huauquicunapash, ladolla llactacunapash, tucuchi tucunajunga. Paicunaca tucuringapachami.

11Taita mama illaj, huahuacunataca saquichilla, ñucami viñachisha. Cangunapaj sapalla huarmicunapash, ñucatami yariajlla causanajunga” ninmi.

12Mandaj Diosca, cashnatapashmi nin: “Ricuichi, ñuca llaquichina copamanda na ufiana nishcacunapash ufiangapachami. Shina cashpaca, ¿canrachu napacha ufiana cangui? Ashtahuangarin na chashnachu. Canga ufianapachami cangui.

13Bosra shuti puebloca, llaquinayaitami tucuchi tucushca. Nalicachishpami rimai tucushca. Chulunlla pushtumanmi tigrachishca, ima llaquipash japishpachari ali canman ni tucushcami canga. Chai muyundi tucui caishuj pueblocunaca, tucui causaipi llaquinayaita jichui tucushcami canga. Chaitaca ñucamandallatami juramenturcani” ninmi Mandaj Diosca.

14Mandaj Diosca, shuj llactacunapi cashna nishpa villachun, shuj villajta cachamushcatami uyarcani: “Edom llactapi causajcunahuan macanajungapaj tandanajushpa vichai shamuichi.

15Ricuichi, cangunataca tucui uchilla llactacunamanda yali uchilla cachunmi ruragrini. Tucui gentecuna nalicachishcami canguichi.

16Jaca rumi jatun utujucunapi, jatun urcu lomacunapi causajcunalla, canguna na cazushcallata, cangunapaj shungupi jariyashcallatami, cangunataca umachirca. Jatun angashna jahuacunapi tazinda rurashpa tiajujpipash, chaimandaca uriajuchishami ninmi Mandaj Diosca” nishpa villajtami uyarcani.

17“Edom llactaca, llaquinayaita tucuchi tucushcami canga. Shinamandami, chaita tucui yalijcunaca, manllarishpa ricunajunga. Tucuita chashna llaquichishcata ricushpami asinajunga.

18Chai llactaca, Sodoma shuti, Gomorra shuti pueblocunata, chai muyundi pueblocunandi tucuchi tucushcashnami canga. Pipash na chaipica causangachu, huañuna aichayu shuj runallapash na causangachu. Mandaj Dios ñucami, chashna nini.

19Uyaichi, virayashca juyailla animalta japingapaj, Jordán yacu manña sachamanda león llujshinshnami, paicunataca llaquichingapaj vichai risha. Ñallapachami chaimandaca calpachisha. Ñuca agllashca runatami, chashna rurachunga mingasha. ¿Pita ñucashna cangayari? Ñucahuanga, ¿pita chimbapurai ushangayari? Ñuca llaquichijujpica, ¿maijan michijta shayari ushangayari?” ninmi.

20Shina cashcamanda Edom llactapi causajcunata, Temán shuti llactapi causajcunata, Mandaj Dios imashna llaquichingapaj yarijushcata uyaichiyari: “Paicunapaj llamacunataca, ashtahuan uchilla llamacunatapash aisashpa apangapachami. Paicuna shayana pushtucunataca, paicunandimi tucuchinga.

21Edom llacta culunlla urmajpica, alpapash chujchungami. Ninanda caparinajushcapash, Puca Cuchacamanmi uyaringa.

22Ricuichi, Bosra shuti pueblopi causajcunata llaquichingapaca, alasta pascashpa jatun anga shamunshnami, vichai shamunga. Chai punllapica, Edom llactapi causaj ninan shinlli runacunapaj shungupash, huahuata unguna nanaihuan huarmipaj shungushnami canga” ninmi.

Damasco shuti pueblota llaquichinatami villashca

23Damasco pueblopi causajcunamandaca, cashnami nijurca: “Hamat shuti, Arfad shuti pueblocunapi causajcunaca, paicunata jatun llaqui japigrin nijta uyashpami musparinajurca. Yacuyashpa tucurijunshnami, shaijushpa na ushanajurca.

24Damasco pueblopi causajcunaca huañunalla tucushpami, pacajushpa calpangapaj tigrarinajurca. Paicunataca manllashpa chujchunapash, ninan llaquipashmi japirca. Huahuata unguna nanaihuan huarmitashnami, nanaicuna japirca.

25¡Ricuichi, alicachi tucushca jatun pueblota, ñuca cushijuna pueblotaca chashnamari tucuchishca!

26Shinamandami, chai pueblocunapi causaj chairalla viñaicunapash, plazacunapi huañushpa urmanajunga. Tucui soldadocunapashmi, chai punllapica huañunajunga. Tucuita Mandaj Dios ñucami, chashna nini.

27Damasco shuti pueblo muyundi jatun pircapica, ninata japichinajuchunmi mandasha. Ben-adad shuti runapaj huasicunapashmi tucuringa” nijurcami.

Cedar shuti llactatapash, Hazor shuti pueblotapash llaquichinatami villashca

28Cedar shuti llactata, Hazor shuti pueblota mandajcunatapash, Babilonia llactata jatun mandaj Nabucodonosor shuti runami tucuchirca. Paicunamandami Mandaj Diosca, cashna nijurca: “Cedar nishcacunahuan macanajungapaj tandanajushpa vichai shamuichi. Indi llujshimuj lado llactapi causajcunataca tucuchichi.

29Paicunapaj carpacunatapash, animalcunatapashmi japinajunga. Paicuna quilpana telacunatapash, tucui imalla tiashcacunatapash, camellocunatapashmi, paicunapaj cachun apanajunga. Paicunata fiñashpami: ‘Tucui muyundipimi manllai japirca’ nishpa caparinajunga” ninmi.

30Mandaj Diosca, cashnatapashmi nin: “Hazor shuti pueblopi causajcunalla, caruman pacajushpa rishpa, jatun utujucunapi causagrichilla. Babilonia llactata jatun mandaj Nabucodonosor runaca, cangunata llaquichinatami yarijushca. Imashna japinatami, ali ali yarijushca.

31Imatapash na yashpa, ima manllaipash illaj, paicunalla causajcunataca llaquichigrichilla. Paicunaca pungucunapash, aldabacunapash illaj pueblocunapimi causanajun” ninmi Mandaj Diosca.

32Mandaj Diosca, cashnatapashmi nin: “Paicunapaj camellocunata, ashtacapacha animalcunataca quichushpa apanguichilla. Paicunatapash, cai pacha manñacunamanmi, caita chaita llujchishpa cachasha. Paicunata llaquichijcunataca, tucui muyundimandami apamusha.

33Hazor shuti puebloca, causaita causaicamanmi chulunlla pushtupi causaj chacal nishca animalcunallami causanajunga. Pipash na chaipica causangachu, huañuna aichayu shuj runallapash na causangachu” ninmi.

Elam shuti llactata llaquichinatami villashca

34Judá llactata jatun mandaj Sedequías shuti runa mandai callari huatapimi Mandaj Diosca, Elam shuti llactata llaquichinamandaca, pai ima nishcata villaj Jeremiasman cashna villachun mandarca:

35“Tucuita Mandaj Diosca, cashnami nin: ‘Uyaichi, Elam shuti llacta runacunapaj arcocunataca faquigrinimi. Paicuna ashtahuan shinlli tucunatami faquigrini.

36Cai pacha chuscundi ladomanda, jahua pacha chuscundi ladomandapashmi, jatun huairata apamugrini. Elam shuti llactapi causajcunataca, chai huairahuanmi caita chaita cachasha. Elam shuti llactapi causajcunaca, tucui llactacunamanmi pacajushpa rinajunga’ ninmi.

37Mandaj Diosca, cashnatapashmi nin: ‘Ñucaca, ninandapacha fiñarishpami, Elam llactapi causajcunataca, paicunata fiñajcunapaj ñaupajpi, paicunata huañuchingapaj mascajcunapaj ñaupajpica, ninanda manllanajuchun saquisha. Espadahuan huañuchishpa tucuillata tucuchinajuchunmi, paicunapajman cachamushpa jatun llaquita rurasha’ ninmi.

38Mandaj Diosca, cashnatapashmi nin: ‘Elam shuti llactapica, ñuca mandashpa tiarinata churashpami, chaipi jatun mandajtapash, shuj mandajcunatapash tucuchisha.

39Ashtahuangarin tucuri punllacunapica, cashnami tucunga: Elam shuti llactamanda prezu apai tucushcacunataca, cutinmi tigrachisha’ ninmi Mandaj Diosca” nishpa villachunmi mandarca.