EZEQUIEL 33 - Quichua Imbabura Bible

Chapariashpa cuidaj runa imatalla ruranatami villajun(Ez. 3:16-21)

1Mandaj Diosca cai shimicunatami, cashna nishpa villahuarca:

2“Huañuna aichayu runa, cambaj llacta puracunaman cashna nishpa villai: ‘Ñuca espadata cai llactaman cachamujpica, cai pachapi causaj gentecunaca, paicunapaj llacta puramanda shuj runata agllashpami, chapariashpa cuidachun churanajunga.

3Chai runaca, ñuca espada chai llactaman shamujujta ricushpaca, trompetata huacachishpami gentecunaman villanga.

4Maijan cashpapash chai trompeta huacajta uyashpapash na pacajushcamandami, espada shamushpa chugrichishpa huañuchinga. Shina huañuchijpica paipaj yahuarca, paipaj jahuallatami canga.

5Chai trompeta huacajta uyashpapash na pacajushcamandami, paipaj yahuarca paipaj jahuallata canga. Ashtahuangarin trompeta huacajta uyashpa pacajushpaca, paipaj causaitami quishpichinga.

6Ashtahuangarin espada shamujujta ricushpapash, chapariashpa cuidaj chai runa trompetata na huacachijpica, gentecunaca na pacajungachu. Shinamandami espada shamushpaca, chai pueblopi causaj puramandaca, maijanda cashpapash paipaj juchamanda huañuchinga. Ashtahuangarin paipaj yahuarca, chapariashpa cuidaj chai runapaj jahuami canga.

7Huañuna aichayu runa. Candaca, israelcunata chapariashpa cuidaj cachunmi churarcani. Cunanga, ñuca imatalla nishcata ali uyangui. Paicunataca, ñucapaj randi shinllitapacha tacuringui.

8Ñucaca, ñucata na manllaj runataca: Ñucata na manllashcamandaca, huañunapachami cangui nishami. Shina nijpipash ñucata na manllaj runa nalita ruranata saquichun, can na villajpica, ñucata na manllaj runaca, paipaj juchamandami huañunga. Ashtahuangarin paipaj yahuarca, cambaj jahuami canga.

9Ashtahuangarin ñucata na manllaj runa nalita runata saquichun, can rimashca jahua na saquishpaca, paipaj juchamandami huañunga. Ashtahuangarin canga, cambaj causaitaca quishpichinguimi’ nishpa villai.

Taita Diospaj ñanguca aligupachami(Ez. 18:21-32)

10Huañuna aichayu runa. Canga, israelcunataca cashna ni: Cangunaca, cashna nishpami rimarcanguichi: ‘Ñucanchi na cazushcapash, ñucanchi juchacunapash ñucanchi jahuallatami. Shinamandami ñucanchica tucurinajunchi. Shina cashpaca, ¿imashnata causashunyari?’ nircanguichimi ni.

11Cashnatapash ningui: Mandaj Jatun Diosca, cashnami nin: ‘Ñucaca causajunipachami. Ñucata na manllaj runa huañuchunga, na munanichu. Ashtahuangarin ñucata na manllaj runaca, pai imashna causajushcata saquishpa, causaita charichunmi munani. Shina cashcamanda nalita ruranajushcata saquishpa, ñucapajman tigrarimuichiyari, tigrarimuichiyari. Israelcunalla, ¿imashpata huañunguichiyari?’ ninmi ningui.

12Huañuna aichayu runa. Cambaj llacta puracunataca, cashna ni: ‘Maijambash ñucata na manllashpa jariyajui punllapica, imatapash cashcatapacha ruraj runa, imatapash cashcatapacha rurashcapash na quishpichingachu. Shinallata ñucata na manllaj runa nalita rurashcapash, nalita rurashcata saquishpa ñucapajman tigrarimujpica na jarcangachu. Imatapash cashcatapacha ruraj runa juchata rurashpaca, imatapash cashcatapacha rurashcamandaca na causangachu’ ni.

13Ñucaca, imatapash cashcatapacha ruraj runataca: ‘Causanguipachami’ nishami. Shina nijpica paica, imatapash cashcatapacha rurajmi cani yashpami, nalita ruranga. Shina rurajpica, tucui imatapash cashcatapacha pai rurashcacunataca napacha yarishachu. Ashtahuangarin nalita rurashcamandaca huañungapachami.

14Shinallata ñucata na manllaj runataca: ‘Huañunapachami cangui’ nishami. Shina nijpica nalita ruranata saquishpa, ñucapajman tigrarimushpa ima pandatapash na rurashpa, imatapash cashcatapachami ruranga.

15Shinallata ñucata na manllaj runaca, prendata quichushcatapash cutin tigrachishpami, imata shuhuashcatapash tigrachinga. Shina rurashpaca, pactachinajuchun cushca causaita cuj shimicunatapash pactachishpami, ima nalitapash na rurashpa causanga. Shina causashpaca na huañungachu, causangapachami.

16Shina rurajpica, pai juchata punda rurashcacunataca, maijan juchatapash na yarishachu. Alita rurashpa, imatapash cashcatapacha rurashpami causanga. Shina rurashpaca causangapachami.

17Chaicunata rurajta ricushpaca, cambaj llacta puracunaca: ‘Jatun Diosta catishpa causanaca, napacha alichu’ ninajungami. Ashtahuangarin paicuna nalita rurashpa causashcamari nali.

18Imatapash cashcatapacha ruraj runa imatapash cashcatapacha ruranata saquishpa nalita rurashpaca, chai nalita rurashcamandaca huañungapachami.

19Shinallata ñucata na manllaj runapash, nalita ruranata saquishpa, ima pandatapash na rurashpa, imatapash cashcatapacha rurashpaca, chai alita rurashcamandaca causangapachami.

20Cangunaca: ‘Jatun Diosta catishpa causanaca, napacha alichu’ ninajurcanguichimi. Israelcunalla, canguna imashna causashcataca ñucami tucuicunaman ricuchisha” nihuarcami.

Jerusalén urmashcatami villashca

21Ñucanchica, ñami chunga ishcai huatata prezu tianajurcanchi. Chai huatapimi, cashna tucurca: Chunga quillapaj picha punllapimi shuj runaca, Jerusalenmanda pacajushpa ñucapajman shamurca. Chai runaca: “Pueblotaca ñamari quichushca” nishpami villahuarca.

22Pacajushpa shamuj chai runa, tutamandata ñucapajman nara shamujpillatami Mandaj Diosca, chishillata paipaj maquita ñuca jahuapi churashpa, cutin rimachihuarca. Shina rimachijpimi, cutinga na upalla quedarcani.

23Mandaj Diosca cai shimicunatami, cashna nishpa villahuarca:

24“Huañuna aichayu runa. Llaquinayaita tucuchi tucushca Israel llactapi causajcunaca, cashna nishpami rimanajun: ‘Abrahamga shujllami carca. Shina cashpapash, cai llactataca japircallami. Ñucanchicarin taucacunamari canchi. Cai llactataca, ñucanchipaj cachunmi ñucanchiman cararca’ ninajunmi.

25Shina cashcamanda, cashna nishpa villai: Mandaj Jatun Diosca, cashnami nin: ‘Cangunaca aichatapash, yahuarcunandimi micunguichi. Yanga dioscunatapashmi vichai ricunguichi, huañuchishpa yahuarta jichajcunapashmi canguichi. Shina ruranajushpapash, ¿llactata japinallachu canguichi?

26Cangunaca, espadatalla yarishpa causashpami, millanayaita rurarcanguichi. Tucuicunami, cumba runagupaj huarmita nalita rurashpa mapayachircanguichi. Shina ruranajushpapash, ¿llactata japinallachu canguichi?’ ninmi nishpa villai.

27Paicunataca cashna ningui: Mandaj Jatun Diosca, cashnami nin: ‘Ñucaca causajunipachami. Llaquinayaita tucuchi tucushca llactapi causajcunaca, espadahuanmi huañuchi tucunga. Pambacunapi causajcunataca, millai animalcunaman micuchunmi cusha. Shinlli torrecunahuan jarcashca pueblocunapi, jatun utujucunapi causajcunaca, jatun ung:uihuanmi huañunga.

28Chai llactataca, jichushca pambata, chulunlla pushtutami saquisha. Ninan ushaita charishpa jariyashpa causanaca chingangami. Israel llactapi tiaj urcucunapash, llaquinayaitami tucuchi tucunga. Chai urcucunapica, pipash na puringachu.

29Chai tucui millanayaicunata rurashcamanda, chai llactataca chulunlla pushtuta, jichushca pambatalla saquijta ricushpami ñucataca, Mandaj Dios cajta yachanajunga’ ninmi nishpa villai.

30Huañuna aichayu runa. Cambaj llacta puracunaca, pata ladocunapi, huasi pungucunapi shayarishpami, can rimashcataca nalicachishpa asinajun. Paicuna purapash, caishuj chaishujmi: ‘Mandaj Dios imatalla villachishcata uyangapaj shamuichi’ ninajun.

31Paicunaca, ñuca agllashca gentecunashnami cambajman shamunajunga. Ñuca agllashca gentecunashna, can imatalla rimashcata cambaj ñaupajpi uyashpapash, na pactachinajungachu. Ashtahuangarin mishqui shimicunahuan rimashpapash, shungupica charijyanatalla munashpami purinajunga.

32Ricui, canga paicunapaca juyaimanda candaj runashnami cangui. Juyaillaguta tigrachishpa ali candaj runashnami cangui. Paicunaca, can villashcacunata uyashpapash, chaitaca na pactachinajungachu.

33Cai shimicunaca pactamungami, (ñallami pactamunga). Shina pactamujpimi, profeta runa paicuna purapi tiashcata yachanajunga” nihuarcami.