JOB 28 - Quichua Imbabura Bible

Ali yachaita mascaj runamandami villajun

1Culqui maimanda llujshina pushtutapash charimbachami. Orota rupachishpa yacuyachina pushtupash tianmi.

2Jirrutaca, ñutu alpamandami llujchin. Cobretaca, rumimanda surcushpami yacuyachin.

3Yana yana tutatapash tucuchinajunmi. Chaitaca, ucuta allashpami mascanajun. Chaica, manllanayai yana, huañui japinalla llandu ucupimi tian.

4Gentecuna causanajuj pushtumanda caruta rishpa, pipash na purij pushtucunapimi allashpa mascanajun. Shujcunamandaca carupimi, huarcurishpalla huairapi caiman chaiman cuyurinajun.

5Micunapash, alpamandallatami llujshin. Chai alpa ucupica, rupajuj ninami tian.

6Chai pushtupica, zafiro nishca rumicunapash, oropash, ñutu alpashnami tian.

7Chai ñandaca, alasyu animalca, ima horallapash na rijsircachu. Jatun angapash, na ricurcachu.

8Millai animalcunapash, chaitaca ima horasllapash na sarurcachu. Leonbash, chaitaca na yalircachu.

9Paipaj maquitaca, yacu rumi jahuapimi churarca. Urcucunatapash, sapimandami urmachirca.

10Jaca rumicunata faquishpami, jatun yacucunata llujchirca. Imalla juyaillacuna tiajtaca, paipaj ñavihuanmi ricurca.

11Jatun yacutapash, maipi llujshijuj pushtupimi jarcarca. Pacallapi ima tiajujtapash, michamanmi llujchirca.

12Ashtahuangarin ali yachaitaca, ¿maipishi tariringa? Ali yachajuna pushtuca, ¿maipishi?

13Chai yachajuna mashna valishcatapash, runaca na yachanllu. Causaita charijcunapaj cai pachapica, ricuritapash na ricurinllu.

14Manllanayai ucu ucu yacuca: ‘Na ñucahuanllu’ ninmi. Mama cuchapash: ‘Ñucahuambash na canllu’ nircami.

15Chaitaca, orota cujpipash, na cunallachu. Pezashca culquita cujpipash, na jatunallachu.

16Chaitaca, Ofir shuti llactamanda orohuambash, punchapamba ónice nishca rumihuambash, zafiro nishca rumihuambash, na randi ushanallachu.

17Oropash, punchapamba diamante nishca rumipash, chaihuanga na chimbapurai ushanllu. Chaitaca, alipacha oromanda juyailla rurashcacunahuambash, na cambiai ushanallachu.

18Chai yachaimandaca coraltapash, perlastapash cushallami nitaca, na ushanachu. Ali yachaica, juyailla punchapamba rumicunatapash yalimi.

19Chaihuanga, Etiopía shuti llactamanda topacio nishca rumipash, na chimbapurai ushanllu. Alipacha orohuambash, na randi usharinllu.

20Shina cashpaca, ali yachaica ¿maimandashi shamun? ¿Pai tiajuj pushtuca maipita?

21Causaita charijcunapaj ñavipica, pacallami chaica tiajun. Jahuata rij alasyu tucui animalcuna ricunamandapash pacallami.

22Abadonbash, huañuipash: ‘Pai tucuipi rijsishca cajtaca, ñucanchi rinrihuambachami uyarcanchi’ ninajurcami.

23Ali yachai maipi purijujtapash, maipi tiajujtapash, Taita Diosllami yachan.

24Paica, cai pacha tucuri manñacamanmi ricujun. Cai pachapi imalla tiajtapash, tucuitami ricujun.

25Paica, huairatapash pezashpa, yacucunatapash medishpami churarca.

26Tamiatapash, imashna tamianata mandashpa, punchalla shitajcuna culun nishpa purichun, ñanda ricuchijushpaca,

27paira ali ricushpami, tucuicunaman ricuchirca. Aliguta alichishpami, tucuicunaman ricuchirca.

28Runataca, cashnami nirca: ‘Ricui, jatun Diosta manllanaca, ali yachaimi. Nalimanda anchurinaca, ali yuyaimi’ nishcami” nijurcami.