ISAÍAS 14 - Quichua Imbabura Bible

Babilonia llactata jatun mandajta fiñashpami, na cazushpa asishca

1Mandaj Diosca, Jacobopaj miraicunataca llaquingami. Israelcunataca, paipajlla cachun cutinllata agllangarami. Shina rurashpami, paicunapaj llactamanllata tigrachimushpa samachinga. Shuj llactacunamanda shamushcacunapash, Jacobopaj miraicunahuan tandanajushpami paipura tucunajunga.

2Shuj llacta gentecuna japishpami paicunataca, Israel llactapi saquij shamunga. Chai shamuj jaricunata, huarmicunataca israelcunami, Mandaj Diospaj llactapi paicunata servishpa causachun japinga. Paicunata prezu charishcacunataca, paicunapashmi prezu japinga. Paicunata punda llaquichishpa charishcacunataca, paicunami mandanga.

3Canguna llaquichi tucujushcamandapash, manllashpa causashcamandapash, ninanda servichishpa charishcamandapash, Mandaj Diosca chai punllapimi llujchishpa samachinga.

4Chai punllapimi, Babilonia llactata jatun mandajtaca, yarichij cai shimicunahuan cashna rimana canguichi: “¡Cai llaquichij nali runaca, llaquinayaitamari tucurishca! ¡Orotalla munashpa causajcunapaj puebloca, llaquinayaitamari tucurishca!

5Mandaj Diosmi, paita na manllajcunapaj tauna caspitaca faquishca. Mandajcuna mandana varatapashmi faquishca.

6Paica, manllanayaita fiñashpami, chugrichishpa llaquichijujlla carca. Shuj llactacunapi causajcunatapash, ninanda fiñashpami mandashpa charin carca. Paicunataca, llaquitapash na llaquishpami catiriashpa llaquichin carca.

7Cunanga, tucui cai pachapi causajcunaca, ima manllaipash illaj, casilla aligutami causanajun. Diosta alicachishpami candanajurca.

8Can chashna tucushcamandaca, Líbano shuti urcupi tiaj ciprés quirucunapash, cedro quirucunapash, ninanda cushijushpami cashna ninajurca: ‘Can huañushcamandapacha, pipash ñucanchitaca na fitingapaj vichai shamunllu’ ninajurcami.

9Seol ucupi tiajujcunapash canda ricushpami, ninanda manllarinajurca. Can chayajpica huañushcacunapash rijcharishpami, canhuan tuparingapaj llujshinajurca. Cai pachapi tucui mandajcunatapash, llactacunapi tucui jatun mandajcunatapash, paicuna tiarinapi tianajushcamandami jatarichirca.

10Tucui paicunami candaca, caparishpa cashna ninajunga: ‘¿Cambashchu ñucanchishnallata irquiyarcangui? ¿Cambash ñucanchishnallatachu tucurcangui?

11Arpacunata tocachishpa jariyashpa causashpapash cunanga, cambashmi Seolman urai shamushcangui. Caipica, jurucunami cambaj camashna, cambaj jatanashna canga’ ninajungami.

12¡Tutamanda pacarichij Luzerolla, jahua pachamandami urmarcangui! Canga, llactacunata mandashpa llaquichij cashpapash, alpamanmi shitai tucurcangui.

13Cambaj shungupica, cashnami yajurcangui: ‘Jahua pachamanmi vichai risha. Chaipica, Taita Diospaj luzerocuna tianajuj ladopimi, ñuca mandashpa tiajunataca churasha. Dioshuan tandanajuna urcupimi, jahua ladoman tiarisha.

14Fuyuta yalishpa, ashtahuan jahuamanmi vichai risha. Chaipi tiarishpaca, jahua pachapi causajuj Diosman rijchajmi casha’ yajurcanguimi.

15Ashtahuangarin canga Seolmanmi, manllanayai ucu ucu ladoman shitai tucurcangui.

16Canda ricujcunaca, cambaj ladoman cumurishpa ali ricushpami, cashna ninajunga: ‘¿Paichu, cai pachapi causajcunata chujchuchishpa, llactacunata mandajcunata tucuchij runa carca?

17Paica, tucui llactacunatami jichushca pambatashna saquirca. Tucui pueblocunatami tucuchin carca, prezu tianajujcunatapash napacha cacharinllu carca’ ninajungami.

18Llactacunata tucui jatun mandajcunami, paicuna pambai tucuna utujupillata pambashca, alicachi tucushca sirinajun.

19Ashtahuangarin canga, canda pambashca utujumandapash, millanayai retoñoshnami shitai tucushcangui. Espadahuan huañuchi tucushpa, pambana utuju ucuman rishcacunapaj mapa churajunashnami cangui. Huañushpa sarui tucushcashnami cangui.

20Canga, cambaj llactapi causajcunatallatami tucuchircangui. Cambaj gentecunatapashmi huañuchircangui. Chaimandami candaca, caishuj jatun mandajcunatashna na pambanga. Ashtahuangarin nalita rurajcunapaj miraicunataca, ima horallapash na yarinajungachu.

21Taitacuna jatun nalita rurashcamanda huañuchingapaca, paicunapaj huahuacunata ña alichishcalla caichi. Ama cutin macanajungapaj jatarishpa llactacunata japichun, cai pachapi tiaj pueblocunapi ama ashtahuan jundachunga, paicunata huañuchichi” ninami canguichi.

22Tucuita Mandaj Diosmi, cashna nin: “Ñuca jatarishpami, Babiloniataca chingachisha. Huaquinlla huahuacunapajpash, nietocunapajpash shuti ama ashtahuan tiachunmi tucuilla tucuchisha” ninmi Mandaj Diosca.

23“Chai pueblopica, erizo nishca animalcuna causachunmi saquisha, yacu cuchacunatami churasha. Tucuillata tucuchij fichanacunahuanmi, fichashpa tucuchisha” ninmi tucuita Mandaj Diosca.

Asiria llactaca tucuchi tucungami

24Tucuita Mandaj Diosca, cashna nishpami juramenturca: “Ñuca yarijushcataca rurashapachami. Imatalla rurangapaj yarijushcataca pactachishapachami.

25Asiriocunataca, ñuca llactapimi huañuchisha, ñuca urcucunapimi sarushpa tucuchisha. Shina rurashpami, ñuca gentecunapaj yugotaca anchuchisha. Paicunapaj huashapi apachishca quipitapashmi uriajuchisha” nircami.

26Tucui cai pachataca, chashna ruranatami yarishca. Tucui llactacunata llaquichingapajmi, maquita chutashca shuyajun.

27Tucuita Mandaj Diosmi chashnatapacha rurangapaj yarishca. Paita jarcaitaca, ¿pita ushangayari? Paipaj maquita chutashcataca, ¿pita jarcai ushangayari?

Filistea llactata llaquichinatami villashca

28Jatun mandaj Acaz shuti huañushca huatapimi Isaiasca, Dios villashcata cashna villajurca:

29Tucui Filistea llactapi causajcuna, cangunata llaquichijushca vara faquirishcamandaca, na cushijunachu canguichi. Culebrapaj miraimandaca, shuj millai culebrami cutin llujshinga. Chai culebramandacarin, alasta charij culebrami llujshinga.

30Tucuita yali imagutapash na charijcunaca, michijpimi causanajunga. Imagupash illajcunapash, imatapash na manllashpami sirinajunga. Ashtahuangarin cangunapaj miraitaca, yarjaihuanmi huañuchisha. Huaquin puchushcacunatapash tucuchishami.

31Filistea llactapi tiaj pueblocunapaj pungupi cuidajcuna, huacaichiyari. Chai pueblocunapi causajcunapash, ninanda caparichiyari. Cangunaca tucuicunami, yacuyanshna tucuringuichi. Jahua lado llactamandaca, yana cushnishnami shamunga. Chai shamuj puramandaca, paicuna tandanajushcapica, shujllapash na puchungachu.

32Llactacunamanda villaj shamujcunataca, ¿imatashi nina canga? “Mandaj Diosmi, Sion urcutaca churarca. Pai agllashcacuna llaquita apanajushpaca, caipimi aligutapacha pacajunga” ninami canga.