1Gaza shuti pueblopi causaj filisteocunata Faraón nara llaquichijpillatami, Mandaj Diosca, filisteocunata llaquichinamandaca, pai ima nishcata villaj Jeremiasman villarca:
2Mandaj Diosca, cashnami nirca: “Ricuichi, jahua lado llactamanda yacu jundashpa vichai rishpami jicharimunga. Chai yacumi, ninanda jatarimushpa chai llactapi jundashpa, imalla tiashcatapash, chaipi tiaj pueblocunatapash, chaipi causajcunandi pambanga. Runacunapash ninandami caparinajunga. Tucui chai llactapi causajcunapashmi huacanajunga.
3Caballocuna calpamujta uyashpa, carretacuna huacamujta uyashpa, ruedacunapash culunlla shamunajujpimi, taitacunaca paicunapaj maquihuanga imata ruraitapash na ushashpa, huahuacunataca jichushpa saquinajurca.
4Tucuilla filisteocunata tucuchina punllami chayamujun. Paicunata ayudanajuj Tiro shuti, Sidón shuti pueblocunapash tucuringami. Mama cucha chaupipi tiaj Caftor shuti llactapi huaquin puchushca filisteocunatapash, Mandaj Dios ñucami tucuchisha.
5Gaza shuti pueblopi causajcunaca, ajchatami rutui tucunajurca. Ascalón shuti pueblopi causajcunacarin tucurircami. Chai pueblo pugru pambapi huaquin puchushcacunaca, ¿ima punllacamanshi quiquin aichatallata chugririnajunguichi?
6Mandaj Diospaj espadalla, ¿ima horasta samagripangui? Canda alichinapillata cutin yaicushpa, casilla samapairi.
7¿Imashnata samanguiyari? Mandaj Dios ñucallatamari candaca, Ascalón shuti pueblopi causajcunata huañuchijuchun cachamurcani. Mama cucha manñapi tiaj llactapi causajcunata huañuchijuchunmi, chaipi churarcani” nircami.
Who We AreWhat We EelieveWhat We Do
2025 by iamachristian.org,Inc All rights reserved.
